الموضوع ده للمسلمات فقط مش العرب لو سمحتم

السلام عليكم ورحمه الله وبركاته

اخواتى المسلمات الغاليات من فضلكم تذكروا دائما ان (( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ)) صدق الله العظيم

طبعا العنوان غريب عليكم لان المفروض ان المسلمين عرب وليس بالضروره ان العرب مسلمين يعنى ايه الكلام الغريب ده ؟؟؟
يعنى لو كنت قلت الموضوع ده للعرب كان دخل كللللل البنات من جميع الدول العربيه باختلاف اديانهم الاتي لا يجمعهن الا وحده اللغه والموقع الجغرافي
لكن لو قلت المسلمات هيدخل كل من على كلمة لا اله الا الله محمد رسول الله وهم تحديدا ما اقصدهم .

لو اتكلمنا على وحده اللغه فيوجد بلاد كثيره تتحدث العربيه وعدد المسلمين بها لايذكر
ولو تكلمنا عن وحده الموقع الجغرافي فاعتقد ان وجود اسرائيل بينا كافي ان الجوار وحده لايعنى الحب والود ده غير الدول المجاوره لينا سواء في اسيا او افريقيا ولا تعترف بوجود الله تعالى

يبقي اصلا احنا المسلمين اللى بيجمعنا كلمه ( لا اله الا الله ) الدين يأخوانى الدين هو الذي يجمعنا

كان المسلمين جميعا قديما تحت خلافه ومسمى واحد الدوله الاسلاميه وبسبب الغرب ومصلحتهم في تفكيك قووانا فرقونا دول ورسموا بيننا الحدود التى فيما بعد رُسمت داخل قلوبنا للاسف

دلوقتى بقينا بنسمع كتير كلمه ده سوري وده سعودى وده مصري وده لبنانى ونسينا حديث الرسول عليه الصلاه والسلام ( لا فضل لعربي على اعجمي الا بالتقوى والعمل الصالح ) صدق رسول الله صلى الله عليه وسلم
الرسول كان بيعلمنا اننا العرب لايجب ان نتكبر ونفتخر اننا عرب على دوننا من المسلمين لان الدين هو الاساس وليس الاصل

ياريت تتخيلوا وضعنا ازا كل يوم لقيتم في المجلس هنا موضوع ( شوفوا المغاربه بيعملوا ايه ) ( شوفوا السوريين بيعملوا ايه ) ( شوفوا الكوايته بعملوا ايه ) ( شوفوا المصريين بيعملوا ايه )

ايه رايكم هل سيظل بينا اى وحده او ود ؟؟؟
هل هذا سيرضى رسول الله
وكيف القاك يارسول الله وانا اخذت ذنب بشعب كامل لمجرد تعليقي على خبر لاعلم مدى صدقه وحتى لو كان صادق من منا بلا عيوب
سينا عيسى قال في الانجيل ( من كان منكم بلا خطيئه فليرمني بحجر ) بصرف النظر على مدى صحه النص الانجيلي ولكن لو اعتبرناه حتى ولو حكمه فانا بعتبره بيعبر عن كل ما اريد ان اشرح الان

تعرفوا انا ليه كاتبه الموضوع ده النهارده لانى بجد انا وجميع اخواتى المصريات تعبنا جدا من اسلوب التهكم والسخريه الموجود المواضيع الخاصه ببلادي الغاليه وجميع بلاد المسلمين
عارفين كام عضوه مصريه خرجت من هذا المنتدى الذى احبه واكن له كل الاحترام منذ اشتراكى فيه من 5 سنوات وقررت عدم العوده ابداااا وقلبها مملؤ بالبغض لبعض العضوات باختلاف جنسيتهم

انا بس عايزه اعرف بجد هتقولي لربنا ايه لما يسالك عن كراهيه مسلمه ليكي من كلمه قلتيها بدون ما تغلط فيكي ولا تغلط بشعبك

اخواتى كلنا مسلمااااااااااات انا لايهمنى انى عربيه ولكن مسلمه .

هل تعلمون انك كونك مسلمه اقرب لى من بنت اخري من نفس جنسيتى ولكن مسيحيه ؟؟؟ وهذا مانشعره عند التعامل مع الهنود اننا نميل قلباً للمسلمين منهم .


اتمنى انى ماشوفش تانى ردود ولا مواضيع توغر صدور المسلمين ونفترق أكثر من الفرقه التى نعانى منها جميعاً ياريت كلنا نكون يد واحده في ذلك ونقف ضد اى موضوع ينمى الفتنه بين المسلمين
اللهم بلغت اللهم فاشهد