الموضوع زاد عن حده

السلام عليكم ورحمة الله وبركاته

صديقتي الروح بالروح وجارتي ،، طيبه وحبوبه وإنسانه خيره لكن الله يهديها فيها طبع غريب وكنت أطنشه لانه مامسني لكن الإن صار يمس بنتها المراهقه عمرها 17 سنه باقي سنه وتتخرج من الثانوي
البنت اسم الله عليها أنا مسولفه معاها منطوقها وعقلها وثقلها يوزن بلد ذكيه سنعه طيبه ومؤدبه ومحترمه لو عندي ولد والله ما أزوجه إلا ذا البنت من أدبها غير عن بنات جيلها إذا سولفت معاها كأني اسولف مع حرمه من ثقلها وعقلها ما كانّها مراهقه
بتقولون لي وش السالفه طيب؟؟
بقولكم امها الله يهديها قربت تجننا أنا وبنتها هي طيبه الأم وحبيبه لكن عفويه جدا ومرات تجرح بدون ماتقصد غير كذا عنيده الله يصلح قلبها
بقولكم مواقفها
هي تعشق الناس المتعلمه يعني انت معاك شهاده بكالريوس انت واو ذكي محترم متعلم اضربلك سلام ملكي
انت معاك دبلوم فما اقل تحرقه تشوفه إنسان غبي مستهتر ضيع مستقبله بيده تحقره ماتشوفه شي
ودايما سواليفها عن نفسها كيف اخذت شهادة من جامعة الملك فيصل عن بعد ،،وانا كيف تخرجت من جامعة الملك فيصل عن بعد بقسم علم اجتماع وكيف اجتهدت رغم اني متزوجة وعندي 3 أطفال
هي اخذتها قبل 8 سنوات
دايما إذا اجتمعنا مع احد من الجارات تسأل الجاره لو عمرها 60 انتي إلى وين درستي وأي ام ماتفلت من سؤلها وش تعليمك اخذتي الجامعه
هذا غير اي احد تجلس معاه تبدا تقص قصة تخرجها وتقول اخوانها وش معهم شهادات وبنت عمها دكتوره وولد اختها مبرمج لازم بكل سالفه صار الموضوع متعب جدا
نجي البنتها
بنتها ياعمري تجتهد دراسياً تبي تفرح أمها لكن الأم تكسر مجاديفها ابي نسبه 100 او اقل شي99 ابيك احسن وحده من قرايبنا أبيك احسن من فلانه وفلانه
البنت اجتهده وجابت 95 واعوذ بالله الآم هاوشتها عندي قالت واضح عليك حدك ثانويه ماراح تدخلين جامعه بتصيرين اميه تقل عجوز حدك ثانويه واضح انك فاشله كل هذا قدامي كلمت صديقتي قلت غلط كذا وربي بتعقدين البنت قالت لا أنا كذا احفزها مابيها تصير اقل من بنات عمتنا فلانه قلت لا تقارنين ولا تحطمين وربي البنت بتنجح وتدخل جامعه أسلوبك ورب الكعبه يكره الواحد بالدراسه تحطيم تحطيم تحطيم مايجوز كذا
لكن ما اقتنعت
الشي اللي قهرني ان بنت اخت صديقتي خلصت الجامعه مع مرتبة الشرف والأولى على دفعتها وراحت صديقتي تحط بالسناب شيله مباركة البنت اختها ،،وقالت فخوره فيك ثم قالت البنتها الظاهر مالي حظ افخر فيكم بس بفخر بعيال الناس
وارسلتلي بنت صديقتي تصيح ومتحطمه وتقول تعبت من ماما احس خلاص ودي أموت وارتاح
انا تقطع قلبي عليها ياعمري
هذا غير انه مره جمعت صديقتي مع خواتي ولاحظو خواتي عليها كثرت كلمة أنا تخرجت واخذت جامعه وعلم اجتماع واخوي تخرج ماستر ومرت اخوي دكتوره وكله عن التعليم
تقريباً 90 بالميه سوالفها عن التعليم والشهادات والنصف الآخر عن المال والتجاره وانا أقاربنا ناس هاي وأغنياء
الحين سؤالي لكم هي وش جايها صاير الموضوع عندها هوس وربي اعرفها من 7 سنوات ماكانت كذا لها سنتين صايره مهب صاحيه بموضوع الشهادات وصلت تقول اللي مامعه بكالريوس اعتبره امي وغبي مع احترامي وما أشوفه شي حتى بالمجالس تشوفينهم معزولين ومايعرفون يسولفون.. ياربيه الادميه مدري وش جايها كيف انصحها كيف اخليها تخفف تكفون انجدوني عشان ذا المراهقه المسكينه
صديقتي هذي وش جاها بالضبط ليش صار الموضوع هوس عندها الدرجة الكل لاحظ حتى بناتي لاحظو ؟؟ 
اتذكر مره اجتمعنا عاد قالت كل وحده ترفع يدها وتقول وش تخرجت من اي جامعه وش قسمها هههههه ياربيه ماكانت كذا