مميزة جدا جدا :

هلا اخواتي والله اشتقت لكم .. انا اعتذر لاني مارديت عليكم من يومين واشكر كل من سأل عني وكل من دعى لي الله يجعله في موازين اعمالهم . قبل يومين قلت لكم اني ماقدرت اسوي فطور وزوجي زعل علي وكان حتى مايطالعني ، كان ياحرام مرررررة متضايق متضايق من كل شي ، المهم قلت له خلاص انا ماسويت فطور بسوي سحور ان شاء الله بس انا محتاجة اروح لبيت عمي اولا عشان اغير جو وثانيا محتاجة اغراض من بنت عمي ، قالي انا مااقدر ارجعك ، قلت مو مشكلة هم يرجعوني ، قالي المهم السحور لاتنسينه قلت ان شاء الله ، رحت وقعدت ساعتين وكل مابغيت اقوم صار شي وقعدت مثل طلبات ولدي وغيره ، المهم رجعت متاخرة ولا امداني اسوي سحور ، كلمت زوجي على جواله وقلت له ماسويت سحور ، زعل اكثر من اول وصك السماعة ، وراح تسحر برا ، ويوم رجع للبيت كان شوي وينفجر ، قعدت اتكلم معاه واحاول ارضيه وقلت له اني ابي اتغير بس مو قادرة وانه لازم يتعاون معي ويدعمني ، وقلت له بكره قومني الظهر عشان اطبخ فطور ،و كالعادة بنتي سهرت ولا نامت الا 11 الصباح تقريبا ، وانا نمت ولا حسيت بنفسي الا الساعة 6 وزيادة وكان زوجي يفطر جايب فطور من المطعم ويفطر ، قمت ولاتكلمت ولا قلت اي شي ، هو زعلان وانا مالي وجه اقوله شي ولا اعتذر ،وكنت شوي واموت من الاحباط ، الساعة 10 طلع زوجي قمت عقدت العزم ورتبت البيت وكنسته ومسحته وعطرته وبديت بالسحور طبخت كبسة لحم حاشي ، الساعة 12:30 رجع ، جيت اكلمه لقيته مرتاح وعادي يكلمني قلت له لاحظت شي ، قال طبعا البيت منظف، المهم تسحرنا والحمدلله عدت على خير، وبعد الفجر نام زوجي وانا قعدت ارتب غرفتي وارتب دواليبي طبعا دواليبي حوسة بشكل ماتتصورونه ، والحمدلله خلصتها " يعني سبقتك يالباسقة" . وكالعادة بنتي مانامت الا 11 وانا نمت بعدها وقبل ماانام حطيت 4 منبهات وقعدت اسبح وادعي اني اقوم، ونمت والساعة 4 العصرقمت ، وعلى طول رحت المطبخ وسويت شوربة ومكرونة وسمبوسة دجاج واصابع جبن والمغرب حطيت فطوري وقهوة طبعا وشاهي وعصير وفطرنا انا وزوجي ، وبعد الفطور عادة زوجي ينام لانه يكون زعلان علي ولا يبي يشوفني واليوم مانام وقعدنا نتقهوى ونتكلم وكان راضي واحمد ربي واشكره ، فعلا صدقتي هنادي ج الطريق الى قلب الرجل معدته، بنات واللي رفع السما وبسط الارض اني صادقة ومعاناتي كبيرة وغصب عني وانا محتاجة لكم ولدعاويكم ،وبصراحة ماالومكم ماتعرفوني واذا ظنيتوا فيني اي شي ماتنلامون ، شي ثاني بنات انا بكره او بعده بسافر عشان العيد لاتقلقون علي ولا تحرموني من دعائكم ، وانا بعد ماراح انساكم بدعائي .

هلا اخواتي والله اشتقت لكم .. انا اعتذر لاني مارديت عليكم من يومين واشكر كل من سأل عني وكل من دعى...