الناهيات عن خلق وفاعلات (اشد ) منه ,, وش السواة معهم ؟

زوجة عمي امرأة حبيبة ومتدينة وشخصيتها مؤثرة خصوصا في والدتي ..

هي طبعا اصغر من والدتي بكثير بمعنى ان عمي تزوج بعد ماانولدت انا وبكذا اكون سابقة بنتها في المراحل العمرية ( يعني لما كنت انا طفلة كانت هي ماخلفت , ولما صرت مراهقة كانت بنتها طفلة , وهكذا )

تحبني وتقدرني ولكن تمووووووووت بإنتقادي ..

لما كنت صغيرة كنت البس فساتين قصيرة كانت تجي عندامي قدامي وتقول والله غلط البنت تلبس قصير وتطلع بالشارع والرجال يشوفونها وابليس حريص وووووالخ >>>> وش حصل بعد كذا ؟ شددت علي امي الرقابة وحرصت على عدم خروجي بالشارع ومنعتني من لبس القصير والشفاف ..

الى هنا مافيه اي مشكلة لكن المشكلة انه لما صارت بنتها بنفس عمري اللي كانت تنتقد فيه هالمظاهر صارت تطلع بالشورت للأسواق ووصلت للصف الثالث متوسط وهي ماتعترف بالعباية والآن البنت بثاني ثانوي ويادوب تحط عباية الكتف على ظهرها لكن ماتغطي وجهها !!

لما كنت مراهقة بالثانوي كنت اموت بلبس البنطلون ,, جت زوجة عمي المصونة وقالت لأمي والله انا مستغربة كيف تخلين بنتك تلبس بنطلون قدام الحريم ؟ عيب وشق جيب

لدرجة انها لما صار عندها عزيمة مره اتصلت علي وانا البس وقالت يالينا اذا جيتي لعزيمتي مع امك لاتلبسين بنطلون علشان لاتفشليننا !!

الآن بنتها ماتلبس بس بنطلون الا ماتمشي الا بالبرمودا والتنانير القصيرة لين حفظنا فخوذها حفظ وياليت قدام الحريم وبس لا حتى عند الرجال من المحارم طبعا خوال وعمام !! والله اني انحرج لها وانا اشوف عمامي يتصددون عنها يمين ويسار وزوجة عمي مستانسة ومتشققة من الفرحة

ومشكلتي كل ماشفتها انقهرت على المبادئ والفلسفة اللي حرمتني من طفولتي وخلتني احرص على شعورها وآخرتها بنتها شوي وتمشي مصلوخة قدامنا وهي لاحس ولاخبر

نسيت اقول لكم : بنتها تحكي نكت بذيئة في المجالس يستحون حتى المتزوجات منها , معها موبايل مقفل برقم سري وياويل اللي يقرب له , تكشف للسواق , لما نكون بمطعم او مقهى تسولف وتضحك مع اللي يجيب لنا الطلب , مره كنا راكبين بالسيارة وطالعين من الفيصلية ولاحظت سيارات الشباب حولنا التفت عليها لقيتها كاشفه وجهها وتبتسم لهم وامها معانا بنفس السيارة , تكشف لعيال عمها وتجلس قدامهم بالقصير وبالبنطلون واحيانا تتعمد تمشي قدامهم

مشكلتي كل ماشفت حركاتها اموووووووووت قهر من امها , يعني تنتقدين غيرك وبنتك ماتنتقدينها ! لكن اصبر نفسي واقول ليه انبش الماضي واقول انتي قبل كم سنة قلتي والآن مانفذتي

لكن اللي حاصل لي هاليومين انها رجعت تنتقدني ( وانا اللي احسب مالها وجه تهوب ناحية الانتقاد عقب تصرفات بنتها )

مشكلتي انها تنتقدني بأشياء بسيطة ماتقارن بسواد وجه بنتها ,,

انا الآن في حيرة هل انفجر فيها واقول لها ياعمة شوفي حركات بنتك اول وبعدين تعالي انتقدي الناس ؟ والا احشمها واتغيبى واسوي نفسي مافهمت انتقادها وامشي السالفة لأنها طبعا زي ماذكرت انها تحبني وتقدرني وتعاملني معاملة ممتازة وتتمنى لي الخير ( والا كان من زمان مشرشحتها هي وبنتها )

وش رايكم ؟