حبيبتي ..
أول شي :
خلي الاستغفار على لسانك .. والله ان له مفعول عجيب جداً جداً .. ماتتخيلينه الى ان تجربينه ..
ثاني شي :
شوفي اهتمامات زوجك .. وحاولي انك تكونين فاهمه فيها .. وتسألينه عنها ..
(( أنا زوجي عشقه الكورة .. والله صرت أسأل اختي عنها عشانها تحب الكورة .. عشان أقدر اسولف سوالف يحبها ))
ثالث شي :
لاتهملين نفسك عشانه .. انتي تجملي "عشانك" ،، اهتمي ببشرتك وجسمك "عشانك" ،، اهتمي بثقافتك "عشانك"
خلي لك هدف في الحياة .. تلحقين ورا هذا الهدف عشان ماتطفشين ..
رابع شي :
لاتخلين البيت مصدر المشاكل ..
لأنه اذا كان برا البيت ,, وهو راجع يجيه شعور بالخيبه لأنه اذا جاء للبيت .. راح يتنكد
حاولي يكون البيت مكان للراحة .. هدوء البال ..
استقبليه بابتسامه حقيقيه .. يحس فيها ..
وربك ماراح يضيع مجهودك ..
بقول لك شي .. أنا زوجي كان أنواع الجفاء
وبس يرجع للبيت .. متنكد وطفشان .. يجلس عالنت .. ساعتين
بعدين يقوم ينام .. ولا يكلمني ولا كلمه .. ويرد علي بالقوه ..
كم مره سألته ليش هو كذا .. يقول مافيني شي
بس في يوم انفجر ..
قال انا مااستفدت من زواجي غير زيادة المسؤلية ..
البيت مو نظيف "في بيتي مانستخدم غير 3 غرف ,, الصالة مانعرفها فتكون مغبرة .. بس مرتبة ونظييفه"
ملابسي بس وصخه "عشاني والله بس في يوم من الأيام ماغسلت له ثوب لصلاة الجمعة .. لأنه كان معلقه في الدولاب ..
غداء ماتطبخين "لأن الأسبوع كان امتحانات .. ومرة ما أقدر .. مع العلم اني باقي الأيام كلها أطبخ له "
قلت: بس هذا اللي مضايقك
والله بس قلتها .. امتصيت كل الغضب اللي فيه .. حتى انه تلعثم وماعرف وش يقول ..
قلت له : من عيوني .. كل شي تبغاه من اليوم يصير ..
والله إني مازدت على شغلي العادي شي ..
بس صرت اشتغل قدامه .
ومن بعدها وكل شي ماشي من هالناحيه .. والحمدلله على كل حال ..
المهم ..
عيشي حياتك ،، وهبها ربك لك .. عشان تعيشينها لك مو لغيرك ..
أهم شي لاتقصرين في حقوقه ..
ولا في حقوق أطفالك ..
واستمري في الحياة ..
وعندي فيه حل محتمل للتطنيش :
لاتدقين على زوجك .. بس كل يوم ارسلي له في الصباح "وقت دوامه مثلاً" رسالة تصبحين عليه بالخير
وبس
جربي .. ماراح تخسرين شي اذا ماكسبتي
والله يهدي سرك يارب
الصفحة الأخيرة
ارفعي يدك للعزيز الحكيم في ثلث
الليل الآخر
الله يهديه
وموفقة ياقلبي