النحافة وعسل التسمين ،،

السلام عليكم ورحمة الله وبركاته
كيفكم حوائيات ؟
اليوم ابغى أتكلم لكم عن عسل التسمين اللي ناخذه من التاجرات ب400 او 500 على امل السمنه وتوديع النحافه والتمتع بجسم صحي رويان انا يا طويلات العمر كان وزني 33 ولا يزيد كيلو المهم ماخليت شيء ما جربته صحي وغير صحي لين طحت ع حساب (ام اسيل) في الانستقرام تبيع عسل تسمين الكيلو 400 مع التوصيل ب100 ونص كيلو 250 المهم وأتوكل ع الله بعد ما نزل لي حافز وقلت هذي فرصه وجتني فلوس وعسل مضمون ع كلام صاحبته بعد ما حلفتها بالله وقَعَدت تحلف لين صدقت واروح واطلب علبه كيلو وتخلص واطلب الثانيه وبديت اسمن وعلبه ورا علبه لين وصلت 8 علب ووصلت الوزن المثالي 51 كيلو في سنه وقلت خلاص يا بنت وقفيه وتمتعي باللبس والطلعات وكل شيء وسألتها وقالت لي أوقفه بالتدريج ووقفته حسب تعليماتها في شهر 5 هجري 1437 وقَعَدت شهر ووزني ثابت بعدها في شهر 7 هجري بدأت شهيتي تنعدم مو تضعف ووزني ينزل تدريجياً وإنفلونزا ورا إنفلونزا وتعب لين وصل وزني 45 ورجعت طلبت في شهر 8 علبه ولرمضان علبه ولا فادت كل مالي انحف وفي اول رمضان جاتني إنفلونزا قويه وسخونه يومين وزاد التعب لين وصلت 43 في نهاية رمضان ووقفت العسل قعدت شهر 10 تمام ودخل ذو القعدة وجاتني إنفلونزا كمان وكانت قويه واستفراغ وأبر ومغذيات وتعب شديد ما يعلم به الا ربي ورحت المستشفى وطلبو مني تحاليل وسألوني اذا كنت استخدمت شيء وخبرتهم بالعسل وطلبو يقيسون وزني وهنا الصدمه كان 39!!! المهم حصلت لي ضروف وما قدرت أحلل ورحت لصاحبة العسل وكلمتها وشرحت لها حالتي قالت انتي الوحيدة اللي صار لها كذا قلت لها خلاص باسوي التحاليل واقول لك من الحين اذا فيني شيء فهو اكيد من العسل يمكن حطيتي فيه شيء نفخني ورجعت نحفت ومرضت من بعدها صار حسابها برايڤت ولاني ما اتابعها اصلاً فما عاد قدرت اعلق المهم مرت الايام ودخل شهر ذو الحجه وانشغلت وكنت اشوف شعري يتساقط واطنش لحد ما لاحظت التساقط زاد وراسي كله فراغات ووجهي ذبلان وفيني تعب وخمووول ونحفت اكثر وع طول رحت المستشفى وطلبت تحاليل شامله وهنا الصدمه طلع عندي خمول في الغده الدرقيه وفيتامين دال ناقص وارتفاع بسيط في الكوليسترول مع اني كنت بخير والله وقد سويت تحاليل من قبل ومافيني شيء الا بعد العسل لاحظت المناعه ضعفت وكل شهر مريضه رحت لصاحبة العسل وقلت لها وش حاطه في العسل لاني تعبانه وطلع عندي خمول غده وارتفاع كوليسترول حسبي الله عليك ونعم الوكيل ما باسامحك وجعل كل فلس اخذتيه مني ومن غيري نار في بطنك اذا كنتي بس بتاجرين بارواحنا وصحتنا وتستغلين حاجتنا للسمنه وبانبه كل البنات ما ياخذون منك لاني خلاص ماعاد اقدر ارجع لا فلوسي ولا صحتي ع فكره خسرت حول 5000 ريال ع العسل وطلع مرض اخر شيء بعت صحتي المهم هي ردت قالت لي فيه وحده بتحلل العسل (تبغى تثبت انه طبيعي مافيه كيماويات) وبارسل لك صورة التحليل قبل انزلها في حسابي هذا اللي عندي وحسابي برايڤت علشانك حبيبتي؟ انا افتح واقفل بعدين قالت ما ودي ادعي عليك وانتي ادعي لين بكره واذا فيه شيء ربي بيستجيب دعواتك وما بيخليني وحذري البنات وحسبي الله ونعم الوكيل في كل ظالم (طلعتني ظالمه!!) وعسى ربي يحرم كل ظالم ما يتمنى بعدين قالت انتهى كلامي معاك واذا حللت البنت العسل بارسل لك الصوره(وانا وش يضمني ان الصوره حقيقيه مو مزوره) المهم بعدين قالت فيه ناس استخدموه سنتين والحين متزوجات ومخلفات وش معنى انتي يا ماما مرضتي ولو كان في العسل مرض كان جاك فشل كلوي!!! كانت تنتظر يجيني فشل كلوي الله لا يوفقها او يمكن متأكده ان فيه بلاء في العسل يسبب ضرو ع الكلى مو ارتفاع ومدري ايش وانتهى وأعطتني بلوك ما امداني أرد وكنت باوريها محادثات وتعليقات البنات اللي تضررو من عسلها وإني مو الوحيده وع فكره اي وحده في حسابها تقول اي شيء عن العسل سلبي او ضرها تبلك او تحذف الكومنتات حسبي الله ونعم الوكيل،،
هذي كانت قصتي والحين من مستشفى لمستشفى وسويت تحاليل لكل شيء مرتين وعدت تحليل الغدد وعندي موعد بعد يومين متابعه مع الدكتور ومقررين لي استخدام دواء للغده والحمدلله ع كل حال والله يجعله تكفير عن ذنوبي فيا بنات انصحكم نصيحه لوجه الله لا تغلطون غلطتي وتثقون في احد وتاخذون عسل او اي شيء مجهول المصدر انتبهوووووو لا تطلبون اي عسل سواء من (ام اسيل) او غيرها من التاجرات اللي معبين الانستقرام حتى البايو تبعهم نفس العباره(كف عينك عن رزق غيرك ترزق) شكلهم عصابه الله المستعان لا تدمرون صحتكم علشان نحافه تكونين عظم هيكل بس صحتك تمام هذا كفايه العافيه مالها ثمن وانا اختكم ولو يرجع بي الزمان والله ما اخذه بس قدر الله وماشاء فعل الحمدلله.. دعواتكم 🌹