" النشر هو نصف الكوي "
هذي قاعدتي الدائمة و اللي أمشي عليه في نشري للغسيل دائماً
ألاحظ بعض الحرم تنشر بشكل عشوائي بالمنشر على أساس إنها كاويه كاويه و بعضهم كمان تراكمهم فوق بعض في حال زحمة الغسيل أو العجله
لكن بعد ما جربت هالطريقه وقت ما كنت ساكنه في الخبر و كانت الرطوبه تساعدني ارتحت كثير جداً في موضوع الكوي وأكيد كثييييير مننا نعاني من موضوع الكوي المتعب و الممل جداً
بعد ما نقلت لمدينة جافه جربت نفس الطريقه اكتشفت إن ما زال مفعولها رائع جداً
إذا غسلتي غسيلك امشي على الخطوات هذي :
أولاً : لازم يكون أول ما خلص من الغسيل مباشره تطلعينه سواء كانت أووماتيك تطلعينه من الغساله أو عاديه تطلعينه من النشافه المهم ما تقل رطوبته وهو متراكم على بعضه
ثانياً : لازم تنفضينه قبل تنشرينه
ثالثاً : تواسينه " تعدلينه " وهو على المنشر بحيث إنه ما يكون متعفط أو مرتخي حاولي قد ما تقدرين تشدينه شوي على المنشر
رابعاً : أول ما ينشف على طول سفطي اللي ما عاد يحتاج كوي وأنتِ واقفه قبل تحطينه بالسله و اللي يحتاج شوية كوي حاولي تحطينه بالسله بشكل مرتب علشان ما يتعفط بعدها
استخدمت هالطريقه مع ملابسنا و مفارشي بكل جديه بعضها ما احتجت حتى إني أكويها مثل الفنايل و السراويل الداخليه حقت زوجي
و مثل شراشف السرير و حتى اللي أكويهم يكونون سهلين معي ولا ياخذون وقت لأنهم يحتاجون أعدي عليهم بشكل سريع في المكوى
طبعاً صورت لكم اليوم فقط طريقة نشر الشراشف و أكياس المخدات و إن شاءالله بكره أصور لكم الملابس
هنا أول ما طلعتهم مباشره من الغساله
و هنا نفضت أكياس المخدات و فرشتهم بالمنشر تحت
بعدين فرشت أول تلبيسة مفرش و واسيتها من جميع الأطراف
وهنا الشرشف
وأسأل الله أن ينفع بها أحد بإذن الله :39:
وأعتذر للأخوات الزائرات كان ودي أحمل الصور بمركز تحميل بحيث تكون ظاهره للجميع لكن ما حصلت واحد متاح للظهور في المنتدى ف اضطريت أرفقهم بس إن شاءالله إنكم فهمتوا المقصد :27:
ربي يعطيك العاااااافيه