النصر الثاني

السلام عليكم خواتي

بتمنى الجميع يكون بالف صحه وعافيه

الحمد لله رب العالمين نصرني النصر الثاني بعد النصر الاول الي هو اعترافه بالخيانه

قضيتي الاصلية ربحتها بس لسه هلا بمرحلة الاستئناف وان شاء الله تخلص قريب مع النصر النهائي

من شهر رفعت قضية مستعجلة طلبت ملابسي وصوري الشخصية وكتب الجامعة والقاضي وافقلي طبعا لانها متعلقات شخصية حاول القاضي يساعدني واتصل عليه شخصيا بس الحقير ما رد وعملوله طلب حضور للمحكمه وما اجى فالقاضي عملي امر ملزم وفوري لاحضار اغراضي للمحكمه ومش انا اروح اجيبها من البيت لا هو يجيبها ويسلمها للمحكمه وانا استلمها منهم
لا رد على اتصالات المحكمة .. ولا حضر الجلسه ... وحتى الاعلان راحوله على البيت اكتر من مره ما كان يقبل يفتح الباب ... ويوم جلسة الاستئناف اجى على المحكمه وكان قبل الموعد بساعتين وما فكر يروح للقاضي تاع القضية المستعجله يشوف شو الموضوع او شو الاغراض الي بدي اياها.. هدفه بس يمرمطني لاطول مده ممكنه

فالقاضي امر بحبسه .... متخيلين اصدر امر بحبسه وتعميم عليه خلال كل ارجاء الدوله وصار من المطلوبين عند الشرطة .... والشرطة تتصل فيه تعمله استدعاء وما رد عليهم (( طبعا هو مش عارف شو القصة لسه)) فاتصلت الشرطة على مديره بالشغل وطلبته ما كان موجود فحكوا لمديره يخبر طليقي انه الشرطة بده اياه ومطلوب عندهم .. متخيلين الفضييييييييييييحه ... كان طليقي عنده صورته وهيئته ادام الناس بتيجي بالمركز الاول دائما عامل لنفسه برستيج وانه فوق البشر وهلا انفضح بشغله انه مطلوب من الشرطة

وطبعا عطول المغرب كان بالمركز وحجزوا هويته واعطوع اخلاء سبيل بس ليوم واحد انه يخلص اموره مع المحكمه والا بنسجن على ذمة التحقيق .. وتاني يوم بالمحكمة من الصبح للظهر وهو براكض من واحد لواحد يترجاهم يعطوه فرصة يلم اغراضي لانه داخلين على ويك اند جمعة وسبت وراح يتاجل للاحد .. بتحكيلي موظفة بالمحكمة (( انا حذرته خلال الويك اند يكون حذر لو عمل اي مشكلة او حادث او اي شي ودخلت الشرطة راح يكون باين بالسستم انه مطلوب وراح ينسجن )) وهلا مفروض بكره يجيب اغراضي للمحكمة زي الكتكوت.

.. وخواته على الواتس بتحسبنوا ومقهورين .. حاطين صورة (( اذا دعتك قدرتك على ظلم الناس تذكرت قدرة الله عليك))تخيلوا !!! بعد ظلمهم الي وتشهريهم الي وتاركيني معلقه ما يقارب 6 شهور وكل الي عملوه في جايين يحكوا عن الظلم!!! حسبي الله ونعم الوكيل فيهم واحد واحد

هاي اخراخباري لكل الي بسال وببعتلي على الخاص بتشكركم حبيباتي لاهتمامكم وسؤالكم
انا بكتب الي بسير معي عشان اعطي دافع لكل وحدة مظلومة انها ادافع عن حقها واذكرها الله موجود مهما كان الظالم قوي الله فوق وتاكدي مادام انتي مظلومة راح ينصرك ولو بعد حين