اصلا ما يحتاج راينا, الدين قال رأيه و ان النظره افضل و انصح صديقتك لا ترسل صورتها, خلوه يجي البيت و تدخل علي بحجابها, يعني يشوف وجهها و كفيها بس, و تحط كحل و قلوس و بس

الرؤية الشرعية من السنة النبوية ..
ولا يجوز ان نفتي بغير علم .. الله يوفقكم يابنات ..
لازم ننتبه لكل كلمة نقولها ..



اختي ألف معنى الله يوفقك ويسعدك

انا مؤيده النظره وبشده كمان

سؤال للبنات المعارضين مع ان محد له الحق يعارض ويؤيد شي ديننا سمح لنا فيه

الحين هذا اللي متقدم مو من حقه يشوف البنت اللي بيعيش معاها طول عمره ؟؟؟
انتي نفسج مو منحقج تشوفينه ؟؟؟
ولا يتزوج على عماها يعني حظ ونصيب ياتصيب معاه او تخيب
صار مثل اللي يشتري سمج بالبحر

واذا عن سالفه اهله يشوفونها .. البنت بتتزوج اهله ولا بتتزوجه اهو ؟؟؟
وهل ذوق الاهل ونظرتهم للبنت اهي نفسها نظره الخاطب لها ؟؟؟


وليش ماخذين فكره ان البنت اللي ترضى بهالشي تعتبر مثل البضاعه المعروضه .. هذا اعتقاد خاطىء ولو كانت مثل ماتقولون ماكان سمح فيها الدين

بالعكس اطلع للناس وانا كلي ثقه بنفسي وكلي ثقه ان الناس اذواق ( مافقد الثقه بنفسي اذا ماحصل نصيب )
اطلع للناس بلبس مرتب محتشم محد يعترض عليه
ولا احط مكياج اطلع على طبيعتي ولا اخاف من نظرتهم لي

انا مريت بحاله الاهل والصوره والنظره ويه بويه
بخصوص ان الاهل يشوفوني ويكلمونه عني ويوصفوني له صارت معاي وعجبت الام بس ماعجبت الولد ( والناس هذيل من جماعتنا ) الام تقوله اخذها واهو يقول البنت والنعم فيها وباهلها بس مو هذي اللي ابيها ولا فيها المواصفات اللي احبها ( طبعا هالكلام انا ماعرفته الا بعد فتره ) وبعدها راح تزوج وحده ثانيه والله يوفقه ان شاءالله .. سؤالي لو الام اصرت على ولدها انه يتزوجني هل انا ساعتها بكون سعيده يعني ماتزوجني الا بس عشان يرضي امه واهو مومقتنع فيني ولا بفكره اني اكون زوجته ؟؟ هذا واهو شايفني عيل اللي الام تختارلهم ومايشوفونها الا يوم العرس شيسوون !!!!!!!!!!!


بخصوص الصوره ارفض الفكره ومستحيل اوافق عليها
والله يشهد على كلامي انا جربت موضوع الصوره اخت اللي متقدم يابت صورة اخوها وشفت الصوره الحمدلله الريال مافيه اي شي وكنت موافقه مبدئيا ( طبعا ماشفت بالصوره غير ويهه) ،، واخته طلبت من امي صورتي عشان توريها له طبعا رفضنا لان مانطلع صورنا لاحد امي قالت لها اذا يبي يشوفها خل يشوفها عالطبيعه بين امها واخوها اما الصورة لا
وثاني يوم كان موجود مع اخوي وامي واخته وانا دخلت قلت السلام عليكم وقعدت عند امي
المهم اخته كانت تتعمد تسولف معاي وانا طبعا مضطره ارد عليها مايصير اطنشها ،، بس والله لما رفعت راسي وشفته بغيت اترك لهم الصاله واطلع واخوي حس فيني لاني اول ماشفته ظليت اطالعه واطالع اخوي ... الزبده الريال طلع مريض الله يشفيه ويعافيه وشخصيته وكلامه كلللللللشششش موحلوه

من يومها قلت مره ثانيه يا اني اشوف المتقدم ويه بويه ولا يفتح الله
بالذمه الصوره فادتني بشنو غير اني شفت ويهه شسوي بويهه انا !!!!!!!


والله هذا رايي وقلته لكم عن تجربه شخصيه
مستحييييييييييييييييييييل اتزوج واحد ماشفته ولا شايفني


سوري طولت عليكم :)