النظــــافة الداخليــــــة

النظافة الداخلية
عارفة يعني إيه لما تفضلي تدعي ربنا بحاجة نفسك فيها ومش قادرة تعمليها ، وفجأة تلاقي ربنا بيسخرها ليكي ، أو بيسخر حد يساعدك فيها و تنفذيها.
عارفة يعني إيه لما تكوني قاعدة زعلانة والحزن ماليكى والدموع مالية عينيكي ، وفجأة تلاقي حاجة تفرحك وتخليكي زي الفراشة الطايرة في سما ملونة وجميلة .
تخليكي زي البنوتة الصغيرة اللى بتنطط من الفرحة ، و عاوزة تصرخي وتقولي { بحبگ يارب }.
عارفة يعني إيه لما دموع الحزن في عينيكي تتحول فجأة لدموع فرحة .
عارفة دي اسمها إيه ؟ اسمها نضـــــافة أيوة نضافة داخلية ، يعني جواكي وجوة قلبك نضيف ،قلبك طيب ونقي ، يعني ربنا بيحبك ، يعني أنتي قريبة من ربنا .
الإحساس دا إحساس حلو أوي بيخليكي تبكي ، يخليكي تقومي تتوضي وتصلي ، تسجدي لربنا سجدة شكر والدموع مغرقة سجادتگ.
خليكي دايما مع ربنا ، راضية بكل حاجه بيقدمهالك ، بس بشرط يكون رضا حقيقي من جواكي ، مش كلمة تتقال على شفايفگ وخلاص.
إحمدي ربنا على كل نعمة بتملكيها حتى لو صغيرة ، هي يمكن صغيرة في نظرگ أنتي ، لكن عند غيرگ كبيرة وبيتمنى يملكها .
النظافة الداخلية دي مهمة اوي لكل واحدة فينا ، جربوها ، هي خلطة بسيطة خالص مكونة من شوية رضا على شوية قناعة على شوية تسامح وعليهم تحبيشة من حسن الظن بربنا ، صدقيني بعد ما تستخدمي الخلطة دي هتلاقي دموع الفرحة ملازماكي.
اعذروني المشاعر دي مش عارفة أكتبها بالفصحي ؛ لأنها مشاعر طالعة من قلبي ليكم مباشرة ، ومينفعش تتحس بكلام الفصحي.
#فتحية_السيد