صبحكم الله بالخير يا بنات
موضوعي اليوم ماهو جديد عليكم لكن من كثر ما قريت عن الرعب اللي بتعيشونه خلال هالفتره انا حابه اقدم لكم ملخص تجربتي ل3 ولادات والحمدلله طلعت من الأربعين زي البنت من ناحية الضيق والنظافه
أولا: يا بنات في النفاس مهمه الراحه لااازم تتمددين وتريحين ظهرك وتنامين كلما سمحت لك الفرصه لاااازم
يكفي ال9 شهور اللي ما ريحتي فيها والثقل اللي كنتي شايلته
ثانيا: التغذيه الصحيحه
ثالثا: النظافه
رابعا: الرياضه
======================
نجي للراحه:
حاولي انك تنامين بدري يعني عالساعه 10 أو 10 ونص وتصحين عالساعه 7 أو 8 لا تطولين بالنوم الصباح
بتقولين البيبي ما يخليني أنام أنا بقولك كيف تنوميه اول شي غيري له حفاظته ورضعيه صناعي لو بالليل لا تقولين انا ابي طبيعي لازم تساعديه بالرضعه الصناعيه لأنها ثقيله وتشبعه وتخليه ينام وقت أطول
كل ساعتين أو ثلاث اصحي غيري للبيبي حاولي ترضعيه وارجعي نامي خلي هذا يكون برنامجك الليلي
حاولي بعد الغدا تنامين بس مش على طول ريحي شوي وبعدين نامي لك ساعه او ساعتين
لا تجلسين كثير تحركي بس مو بدفاشه يعني شوي شوي
غسلي ملابس البيبي على المغسله بيدك كل ما غيرتي ملابسه كذا تضمنين انك تتحركين وبنفس الوقت ما تتجمع الملابس
حاولي انك تعرضين البيبي للشمس بين الساعه 8 و8 ونص قبل ما تحمى علشان عظامه
=======================
ثانيا التغذيه الصحيحه:
الفجر خلال اول 10 أيام اشربي منقوع الحلبه الدافئ مقدار كوب واحد محلى بعسل يساعد على ادرار الحليب ويقوي ظهرك وانتبهي تزيديه عن 10 أيام لأنه يسبب رطوبه وانتي حره
دائما وأبدا خلي فطورك وعشاك بدري يعني الساعه 8 بالكثير انتي مفطره والساعه 8 بالليل متعشيه
فطورك لازم يكون فيه حليب دافي مع زنجبيل ومحلى بعسل أفيد لك مع بيضه مسلوقه قطعة حلاوه طحينيه أو محلى أو اي شي تفضليه المهم يكون صحي ومافيه زيت وخرابيط
الضحى ممكن تاخذين تمر مع قهوه نفاس أو الاعشاب الخاصه بالنفاس ماراح احدد شي انتو براحتكم
الغدا حاولي يكون قليل السعرات بدون رز ومكرونه ولا يكون شي ثقيل مثلا شوربه وسلطه ولحم او دجاج مشوي أو سمك مع قطعة خبز بر ( مثال )
العشاء شوربة خضار مشكله مع دجاج أو خضار سوتيه مع سلطه يعني اشياء خفيفه
لا تنسين اذا جعتي تاكلي فاكهه وابتعدي عن الحمضيات والاشياء اللي تسبب غازات او امساك
لا تنسين اللهوم أو السفوف او حوايج النفاس مهمه جدا
لا تاكلين ملوخيه ولا باميه ولا اشياء لزجه ماهيب زينه مهم هالكلام لا تاكلينها
==========================
النظافه يا بنات مهمه اهم شي النظافه تسبحو كل يوم وتفركو واهتمو بنفسكم لا تقولين هوا وخرابيط تسبحي والبسي بالحمام الله يعزكم وتدفي زين واطلعي استشوري شعرك او جففيه بالهوا والبسي شراب برجولك ومايضرك شي ان شاء الله لا تقولين نفاس ومدري ايش بلا خرابيط
البيبي سبحيه كل صبحيه يتنشط ولعبيه تتقوى عضلاته
========================
لا تسين تسوين رياضة كيجل اللي تشد المهبل وسوي رياضات خفيفه تنفع للي توها والد لأنها تقويك
لا تنسين التمريخ والمساج كلها تساعد
الله يسهل ولاداتكم ويهون عليكم
أم تركي