السلام عليكم ورحمة الله وبركاته
مدخل ومقدمة......
هناك هاك الواحد والواحد الله في سماه العالي والا كل بليس مخزيه الله مثل ماخزاه (مقتبسهامن الوالدة)
ولا هناك الملك الي مل من حياة الترف والمجون والعبث"""" اسمه (الملك زهير)
ومل بعد من الجواري لانه معاد فيه ذاك انشاط الي يخليه يتفاعل مع المواقف والمعطيات الي قد قد يتطلبها الوضع؟
وفي ذاك الوقت والزمن الغابر مابعد اخترعو الحبة الزرقا
وبالتالي لم يكن يستطيع ممارسة سيلسة الانبطاح مع الجواري ولكنه كان يمارسها وباتقان مع الاعداء
المحيطين بمملكته يعني بالعربي زلابة ورخمة ولاهوب حساب ولاتهون الرياضيات
وممازاد الطين موية ان الدش مابعد اخترعوه وساع الصحون قصدي وساع العيون اليابانيين
والي بعد زاد الحمى مليلة ان البلوت مابعد اخترعها العالم العربي عباس ابن فرناس
مالكم في الطويلة الرجال انسدح عقب العشا عقب مالبدها بخاري والحقه لتر لبن
وهو مفهي وقاعد يمزمزفي زقيرة ابوبس
ولاعندك ازين من زقيرة تكنها عقب عشان دسم-------ترى مهيب دعوة للتدخين-------
وقاعديفكر ويقلبها يمين ويسار ولاقطع حبل تفكيرةلاصرخت المعزبة"""وجعن يوجع قلبك اشرقتنا اذاصار وجودك
مثل عدمك رح تتن في البلكونة ؟؟؟؟
صكها بعين الملك ولاها لابسة اخر منزلته بيوت الموضة في بيزنطة من موديلات الانجري
اطلق الملك تنهيدة عميقة وقال :ايه الي كان يتوسط لي عندك مات؟
قالت اقول رح تتن في البلكونة ولا يكثر بس......وش ذالملكة عربجية؟
راح للبلكونة وقعديفكر ثم خطرت لها فكرة عجيبة
تذكر يومه جالس في القصر وذاك الماصل يسولف عليه صح ان سالفته ماصلة بس الملك يعترف في نفسة انه ضاق
ضاق صدرة يوم خلصت السالفة
قال ليش ماحط مسابقة واطلب من الي يبي يشارك يجيب سالفة ما لها نهاية
(شكل ذالملك هوسبب اختراع المسلسلات المكسيكية)
وم جا الصبح طلع الملك مرسوم بالمسابقة وطلب من وزير الاعلام نشر دعاية ضخمة للمسابقة
والجائزة قيمة جدن وهي ان الملك بيتنازل عن العرش للفايز
اما الي يبي يفشل في المسابقة بتطير رقبته
ضحك الملك في نفسه وفال هالحين وداعا للملل والله ياني ابوسع صدري على ذا الدلوخ
بدو الطماعين يتوفدون على القصر الجمهوري الاول خلصت سالفته مع اذان الظهر وطاااارت رقبته
الثاني مع اذان العصر وطااااااااااااااارت رقبته
الثالث والله قاوم لكنه انهار مع صلاة المغرب.......
والملك يضحك ومبسوط لاقاله لعبة يتسلى بها لا ويذب عليهم
يقول ازين مافيهم انهم يخلصون مع الصلاة نصلي عليهم ونرجع...... ماصل صح
وهناك وفي جهة اخرى وعن مملكة (شهارستان) مطلع نجوم يقبع بطل قصتنا (بدرالزمان)
شاب يتقاطر وسامة الحمار والبياض فيه يتطاقن(الحمار اللون الاحمر مهوب يجيني حمار ويحسبني اعانيه)
ولكن مايجتمع علم وفن وعلى قولة جدتي الزينات مالهن حظ
الشاب الاطخم هذا مخلص الثانويةولكن مالقى وظيفة مسيكين وكان يقضي وقت فراغة
في ممارسة هوايته المفضلة تربية الحمام
وكان محصلن وراهن عيشة الين جت افلونزا الطيور وحاست مريرة
لان الاسعار نزلت الى الحضيض
وفي يومن مشمسن جميل وبينما كان (بدرالزمان) في سطيح بيتهم
يحوم الحمام وكانت الشمس تسطع على خديداته الوردية
مما اكسبه لونن برونزين تحسده عليه شكيرا بزمها وعراها
في هالاثناء شاهد (بدرالزمان) حمامة تطير على استحياء وعلى طول عرف بحنكته وفراسته
انها جذبة فقام وكز عليها القطيفي والغرنوق والمقنبر بالاضافة الى باقي
الزلايب من الكويتيات والبصراويات وبعد شد وجذب واستماتة من القائد المحنك
المقنبر اصبحت الحمامة في العشةواكتشف (بدرالزمان) انها حمام زاجل ولقى في رجلها رسالة
فتحها ولقى فها دعاية لمسابقة الملك زهير
فسال لعاب (بدرالزمان)يوم عرف وش الجائزة وقطرت سعابيلة على الزاجل ممااجبر الزاجل ان يقول الله يطملك ياشيخ.....
وفي هاللحظة اسرعت الحمامة البصراوية (شكلها خقت مع الزاجل) وجابت كلينكس وقامت تمسح شفايف الزاجل
بحركة اغرئية دوختني وانا قاعد اكتب القصة (مماجبرني على استكمال القصة في وقتن اخر)
قال (بدرالزمان) بس جا الفرج لازم اشارك في هالمسابقة وامما مماتن يسر الصديق واما حياتن تغيظ العدا
ياحياة الشقا ياشيخ لاتقل شعر مرة ثانية
علم الولد امه وابوة وقامت اميمته تصيح وتقول تكفا لاتروح هذا خالك عبدالرحمن وعدنا بوظيفة على البند
اما الابو فكان اقل عاطفة من الام وقال :لاترح وانا ابوك وبشتريلك حصان واخليك تفحط به في ساحة المدينة
وتقهر ولد خالك عبدالرحمن (ننعنبو النذالة هالحين الخال يدور لولدكم وظيفة وانتم بتقهرون ولدة)>>>صحيح الله ابخص
بعبادة
بس (بدرالزمان) مهوب بسيط ماعلم اهله بشرط الملك اذا انتهت القصة وهو قطم رقبته
لوتدري امه سان تحرج عليه مايروح
يوم شافوه صامل قالو بسلامتك وصلحت له امه جريشة(تصغير جريش) عليه ذيك الكشنة الي تروح ريحتها من بعد طن
وتريمس شاهي اما المويه فقايل لهم (دايخ)مهوب لازم اوقف عند الاستراحات واشرب(مدامك تعرف توقف وتشرب
ورى ماتوقف وتاكل وتريح ذالعجيز مسيكينة كل الليل وهي تعصد )
يوم اصبح الصباح وسكت (مارلبورو) عن الكلام المباح وافطرت العائلة وشربت الراح وودعهم (بدرالزمان) وراح وبدات الام
في النياح والصياح وقالت خلاص وليدي باح
فنهرها الاب نهرتن طيرت العصافير من سدرة السور وقال:اثرس تسمعين سلامة العبدالله من وراي؟
نترك الاب والام بعد ان شغل الاب اغنية فريد(رحنا ورحوا عنا ماحدش فينا اتهنى)
ونتجه الى بطل قصتنا (بدرالزمان)الذي كان يقطع البيداءولاتسمع الا (طرقن طرقن طرقن) ولا يقطع ذالصوت
الاعيون القطط اذا نعس (بدرالزمان) وطلع من السيد
وصل اخونا في الله مملكة (شهارستان) يوم دخل ولا الديرة هادية تصفر
ولاقطع الهدوؤ الاذيك الضحكة الي تشق الاذان عرف (بدرالزمان) بفراسته انه ضحكة الملك
لان فيها عينة مصول
لكن لفت انتباهه شي معلق على دروازة سور المدينة يوم رد النظر فيه ولاه (طرش بحر)معلقن باذانه
ولاهذا بعد ( كنديشن ) منطول عند السور وجنبه الاب توب حقة
والله يوم قام يجم جم ريق خوينا وبدا (........)المرجلة لكنه تمالك نفسه وقال:الله يقلعكم ياحقين الاقلاع
تدورون الريال في ذنب السلب؟
دخل (بدرالزمان) القصر وطلب مقابة الملك الوزير يوم شافه تحسف علية قال خسارة كل هالملح يروح
قال له الوزير: ياولد اقضب الجادة احسن لك ورح لاهلك بس ترى طريقك على
قولة عبد الحليم (مسدودن مسدودن مسدود)
قال (بدرالزمان) الجادة ولاقهوة الاقلاع اقول دخلني وعض على شحم بس
دخل (بدالزمان) على الملك والقى علية التحية.... قال الملك اخلص وعطنا سالفتك ودنا نضحك هههههههههههههههه
قال (بدرالزمان) سمعن وطاعة يامولي
الملك استدرك بعد برهو وحس انه جفس مع واحد بيموت بعد برهة
فعدل جلسته وقال:حل ريقك يابدر من كنافة الملك زهير>>>>>
اخذ بدر الزمان قطعة صغيرة لانه يحس بمر انتبه له الملك وقال له :كبر اللقمة يابدر ولا كنافتنا ماجازت لك
قال (بدرالزمان)ماقدر حلقي زي البلوطة
ضحك الملك حتى بدت نواجذه وقال عطنا سولافتك اجل يابدير
تنحنح (بدرالزمان)وتغر تغرة جعلت الحاضرين وبما لايدع مجال للشك يدرون انه مفطر على جريش ثم قال:
كان يامكان في قديم الزمان قرية فيها تاجر اسمه (حمدان) عندة مزرعة تطامر فيها الثيران كبيرة كبيرة مرة
وكان يزرع فيها بس القمح وعنده مستودع ترمح فيه الخيل وهالمستودع متبوك وعليه دار مادار سور طويل
علشان ماسرقونه الحنشل والحونشية عند هذا المقطع ضحك الملك هههههههههههه هههاي فضحك الحاضرين
مجاملة للملك مهيب حلوة يخلونه يضحك لحاله
لبقرية هاذي جاها عاصفة قوية خربت مزارعهم واهلكت حلالهم وماعاد عندهم شي ياكلونه لانهم يعتمدون
بعد الله على الزراعة........اجتمعو اهل القرية وقاموا يفكرون وش السوات نبز من بينهم واحدن ملقوف وقال:
ورى مانروح لحمدان عنده قمح واجد مهوب ضاره لو عطانا شوي الاعاد ماعنده لاعيل ولا تيل
راحو لحمدان وقام واحدن ملسون من اهل القرية وشرح له الموضوع افتر حمدان ولاقاهم ضهره وقال وانتم هالحين
تبون القمح بلوشي ؟؟قالوا ايه ماعندنا شي نعطيكيه ,,قال حمدان مالكم لوا وروني عرض اكتافكم وصكو الباب
وراكم تراها هابتن شمال اليوم قال واحدن من الشيبان اي والله اليوم ابرد من امس الضاهر ان المربعانية داخله اليوم
قاطعة الملوسن حق القرية وقال :كنك يابوالشباب قلبتها النشرة الجوية مشينا ندور لنا حل راحو كلهم الا الشايب
قعد مع حمدان يسولفون عن النجوم واحوال الطقس>>>>>ترى الشايب هو جد كراني
يوم جا الليل وسلط الله على قمح (حمدان) النمل ويجيك طابور ذاك النمل كنه عمود ورى بعض كنهم المارينز
يكرمون النمل
ويلقون فتحة في الجدار ويدخلون بالدور............تدخل نملة تاخذ حبة قمح وتطلع ,,,تدخل نملة تاخذ حبة قمح وتطلع
تدخل نملة تاخذ حبة قمح وتطلع ,,,,ويمسك (بدرالزمان)بالملك خط ويبتل على هاالموال الين اذن الضهر ثم العصر
والمغرب وبدر يقول تدخل نملة تاخذ حبة قمح وتطلع والنمل كثييييييير والقمح كثييييييير قال الملك :نكمل بكرة
يوم اصبح الصبح ويكمل بدر على نفس الموال اتش الملك ثم قال :خلصنا واترك عنك المصول؟؟
(قال بدر الزمان في نفسه طبعا تبيني اخلص علشان تخلص علي ياالذيخ)>>>>بريفت بين بدر ونفسه...
ثم رفع صوته وقال يامولاي القمح وااااجد مابعد خلصنا خيشة وش مابعد خلصناها نابعد انتصفنا فيه زمان)
في هاللحظة عرف الملك انه تورط مع عيار من الوزن الثقيل ويقن بالهزيمة وقال :عن اذنكم ياخوان ابروح للحمام
وانتم بكرامة وراح للحمام وهي الروحة انحاش ومعد شيف له راس جره في (شهارستان) ويقولون الي يروحون ويجون
انهم شافوه عند الاشارة الي عند تقاطع شارع المدينة مع الابراج يبع موية وكلما شاف نملة على الرصيف رعصها برجلة
جعلها الكسر>>>>>>>>حاقد على الملك زهير
اما (بدر الزمان)فاصبح مللك على (شهارستان) وجابامه وابوه وعشة الحمام بس ماجاب خاله عبد الرحمن >>>>وين بيروح
نذل على ابوه
وخلصت وملصت وجت الدجاجة وعنفصت"""""""""
منقوووووووووووووووووووووووووووووووووول