مقاديري .. حب هريس .. اربع طماطات وكل ما كثروا صارت الهريسة احلى .. صدور دجاج او لحمه هبره .. ما عندي لحمه فسويتها على صدور الدجاج .. وطبعاً ملح فقط بدون اضافة اي بهارات اخرى فقط ملح وماي يغطي حب الهريس ويرتفع عنه يمكن باربع سانتيات ..
خليتهم على النار من ساعتين ونص الى 3 ساعات وممكن الى اربع اول على نار طويلة لمن يغلي تالي قصري النار خليها هادية مرة ..
هذا اول ما استوى حب الهريس قبل الضراب ..
وبعدين ضربناها .. والله يعينكم على الضراب .. واللي ما تقدر تضرب هالايام مطحنة البصل تقوم باللازم .. وهذا شكلها بعد الضراب ..
وبعدين نجهز الدهن عشان نسطعها في صحن التقديم ..
وهذا شكلها النهائي ..
وبالف هناء وعافية ..