طيب يالحلوين ممكن تفيدوننا بالضبط كيف تعليمهم وطريقتهم وكم ساعه الدوام وهل يعلمونهم الكتابه والقراءه بالعربي ودي ادخل ولدي بس لازم احد يفيدني انا ماعندي فكره عنها ابد ادري طولت وثقلت عليكم بس ياليت تتحملونا شويات وتحتسبوا انها قضاء حاجة محتاج ودمتم بود

الدوام من الساعه 7ونص الى 1وربع مناهجهم انجليزي طبعا ويدرسون لغتي ودين بس السعوديين غير مسموح لهم دخولها الا اذا كان دارس برا ولا يعرف عربي

صحيح يدرسوهم المنهج العربي والدين وباتقان يعني الحمدلله بنتي تجي حافظه القران المقرر اللي عليها والقراءه نفس المنهج السعودي
ومو شرط انه يكون دارس برا او ما يتكلم عربي المهم يكون عنده قبول من الوزاره
واللحين فيه مدارس هي تجيب لك القبول من الوزاره
بس انا مشكلتي ما اعرف ادرسهم بالبيت واذا صار ابوهم مشغول هنا المشكله والا كلغه الحمدلله بالبيت الكل يتكلم معهم انجليزي وعندهم محادثه حلوه بس الحل حل الواجبات هو اللي صعب

طيب ياحلوين ياليت احد يفيدني وش المدن بالقصيم اللي فيها المدارس وهل اقدر اطلعه لتعليم عام متى مابغيت ومعليش على الاطاله هل يتقن الطفل اللغه العربيه لانها الاهم بالنسبه لي واذا على الانجليزيه نحنا الان بامريكا وهو داخل حضانه ولغته كويسه لكن يحتاج اجيب منهم اوراق اوشي قبل ما أجي

ما صاروا يشددون على موافقة الوزارة خصوصا اذا كان ابنك درس الكي جي مرحلتين
بيكون عنده لغه ويسون له اختبار المدرسه وينقبل عادي
وبخصوص الواجبات
اللي اعرفه انه ممكن تزودي على الرسوم مبلغ اتصور الف على اجمالي الرسوم ويجلس ابنك بالمدرسه ويحل الواجبات مع استاذاته وخصوصا لوكان فرنسي بتكون صعبة علينا
كلمي المدرسة واساليهم
وهي اوفر من مدرس خاص يجي البيت

اتمنى اكون افدتكم