بعدين فجأه أختفى ولا عاد حسيت بأي ألم نهائياً تقريبا مدة شهرين إلى خمس شهور يمكن مو متاكدة ، وبعدها رجع وبشكل مؤلم لدرجة معاد أرتاح بنومي ولا بقهوتي حتى 😪
فقررت أقول لزوجي أنو بروح للمستشفى بحيث أعرف وش السالفة وأرتاح ، حجزت بمستشفى التخصصي الطبي وكان عند دكتورة أردنية جعلها في الجنه
والله ناسية أسمها مايحظرني أبد دخلت عليها وشرحت لها الألم ومكانه وسوت لي فحص الثدي اللي تضغط على الصدر نفس هذي الصورة 👇
تقريباً نفسها مالقيت الا هذي مقاربة لطريقة الفحص👍
بعد مافحصتني حولتني لأشعة الألترا ساوند اممم مادري كذا أسمها صح ولا لا
وبعد ماسويت الأشعة قالت لي اللي تفحص عندك ورم صغير مثل حجم الزيتونه وإن شاء الله كل خير
طبعاً انا ماعندي خلفية ولا توقعت ولا واحد في المية أنصدمت مره وضاق صدري بس الحمدلله بعدها رجعت للدكتورة وأنا مشيتي ثقيلة خفت يكون ورم خبيث لا سمح الله ولما دخلت عليها قالت إن شاء الله الأمور طيبة بما أنو تحسين بألم يعتبر شي كويس + مافيه أي لون ظاهر على صدرك سواء أحمر او بنفسجي ولا فيه كتلة بارزة ومافي أي إفرارات ولله الحمد ، بصراحه ماريحني كلامها لأن مازلت مصدومة قالت انصحك تغيرين طريقة نومك وأكلك وسوي رياضة وممكن تاكلين بذور الشيا مره كويسه طبعا هي تتكلم وأنا بعالم ثاني اهوجس من الخوف😥
وقالت هذا ( ورم ليفي بالصدر ) ورم حميد إن شاء الله مامنه خوف ، بس سألتني تاكلين حبوب منع الحمل قلت أيه قالت أستخدمي بدائل غيرها أفضل لأنها تعتبر مسبب 😪
طبعا أختكم في الله مشت على كلامها الحمدلله بس بعد ماعرف الوالد الله يحفظه صار يسأل ويبحث فمدحو له دكتور بمستشفى الحرس الوطني أسمه عبدالله ، وأشيل نفسي وأروح له
بعد مادخلت عليه صح نسيت أخذت معي إشاعتي ورحت لهم وسوو لي فحص( بجهاز الماموغرام ) كان يعور شوي 😁 بس ياربي العافية
المهم يوم سويته ودخلت عليه قالي عندك ورم ليفي من الدرجة الثالثة ومانبي لاسمح الله يتحول لشي ثاني فأنصح تشيلينه خزعة بسيطة بيوم واحد وتطلعين طبعا نصحني نفس نصائح الدكتورة الله يسعدها ولا أعطوني علاج له قال علاجه تشيلينه أفضل قلت تمام توكلنا علىى الله 💕
طبعا سوو لي موعد وأنا أحسبه موعد عادي مراجعة أبداّ مادققت كان بعد شهر المهم رحت بعد شهر ودخلت عليهم وفجأه لبسوني سوارة عليها أسمي ولبس العمليات وأنا وجهي كذااا😮 وش السالفة قالو الخزعة اللحين والله جاني ضحك هههههههههههههه ورايحه لحالي المهم والله انسدحت وجت الدكتورة كانت إفريقية تجنننننن والله ناسيه أسمها لأن هالسالفه من سنين وبقولكم ليه قلتها اللحين المهم شالته ياربي لك الحمد وطلعت بنفس اليوم ومكان الخزعة صغغغغغغغيييييير مره ولو تشوفون الإبرة بسم الله عليييي كبببييييييرة 😂 وقالو بعد ست شهور لازم مراجعه ونسوي أشعه
طبعاً طلعت ورحت لبيت أهلي أرتاح وكلنا مرتاعين نحسبها مراجعة وزوجي مسكين مايدري يصيح ولا يضحك وزعلان ليش كل هذا لحالي المهمممم مالكم بالطويلة مشت الأيام الحمدلله وبعد ست شهور رحت المراجعة والحمدلله كل شي سليم 😍
الزبدة في الموضوع أنو قبل أسبوعين رجعت أحس بالألم وطبعا حجزت ورحت على طول يوم الخميس اللي راح وطلع عندي ورم حميد بنفس الصدر اليسار ولكن بحجم أصغر بس ماأعجبتني العيادة اللي رحت لها كانت تجربة سيئة بدون ذكر أسماء الله يهديهم .
فاللي أبي أقوله لكم أحرصو كل الحرص على أنفسكم ولا تهملين نفسك أبداً من يوم ماتحسين بألم بسيط روحي تطمني وتعلمي تسوين الفحص الدوري اللي بالبيت 🌷
في أحد منكم صار لها نفس ماصار معي ؟
بعيد الشر عنكم جميع
