الوسواس اللي قلب حياتي فوق تحت!!

السلام عليكم ورحمة الله وبركاته..
طبعا كلكم تعرفون وش هو الوسواس القهري
انا كان عندي وسواس الموت وكنت اخاف من الموت وطاريه وكذا بس الحمد لله صرت ما التفت لها الافكار طبعا بداية اصابتي فيه كانت في اولى متوسط الى ثالث واغلب شيء كان ايام الاجازات يمكن لأن كان فراغ كبير وكذا لكن خف كثير الحمد لله وكل ماتجيني الفكرة اتجاهل الله لايعيده كانت ايام اصعب ايام حياتي الناس يفلونها في الاجازة وانا جالسة اصيح واتنافض من الخوف,لكن الحين جاني وسواس اشد واقوى اللي هو وسواس الطهارة والنظافة تقريبا بدايةاصابتي فيه كان في رمضان لكن كنت اتجاهل بعدين خلص عيد الفطر على طول بعده بإسبوع بدات عندي الحالة تزيد صرت اعيد الوضوء وصرت احس ان في ريح تخرج مني بكثرة واعيد الوضوء واعيد الصلاة مر شهر ونص بعدين شهر ذو الحجة قبل العيد اشتد معي الوسواس بقووة كنت اصلي الصلوات واعيد لما اتعب بعدين في الليل اجمعهم كلهم واصليهم وهكذا جات ايام العيد والله لايوريكم قد ايش كنت متألمة نفسيا وجسديا كمان احنا نروح استراحة ثلاث ايام طيب الزبدة رحنا اول يوم صحيح اني اتاخر بس مو نفس لما اكون في البيت مدري احس اني استحي ان الناس يعرفون ان عندي وسواس ,اليوم الثاني قلت لأهلي انا تعبانة ما اقدر اروح وجلست في البيت طبعا امي وابوي كانوا في الحج كانت جالسة معنا عمتي ,خلصت ايام العيد كل يوم لما كل البيت ينام اروح اصلي صلوات اليوم كلها مع اني صليتها بس احس ان وضوئي انتقض او صلاتي كانت مو بالشكل الصحيح واني لمست مقبض الباب يمكن كان نجس او مشيت على مكان نجس يمكن ,لكن من كثرة التعب احس اني انهلكت صرت اتجاهل بعض الاشياء .لكن للحين انا انا ادخل الحمام الله يكرمكم في الصباح لما نكون رايحين للدوام اجلس نص ساعة !!لا اقدر اراجعاللي درسته ولا اقدر اقرا اذكاري ولا اقدر ارتب نفسي زي الناس اللي تأخرت في الحمام الله يكرمكم ,لما ارجع البيت الظهر برضوا نفس الشيء نص ساعة فيه ! لما اتوضا بس استهلك ربع ساعة ولو وضوء واستنجاء نص ساعة واحيانا اكثر ! ولما اغتسل من الدورة اجلس ساعة ونص الى ساعتين ,والله تعبت انا مشكلتي اني لما ابي استنجي اقول طب يمكن البول الله يكرمكم اصاب رجلي او الماء تطاير علي ولازم كل ما استنجي اغسل نفسي من عند الخصر والبطن الى اسفل القدمين ,نجي للوضوء اغسل كفي بعدين اتمضمض لما اجي استنشق اقول طيب يمكن الماء ما دخل انفي؟! واستنشق يمكن خمس او ست مرات ,اجي اغسل وجهي طبعا سمعت انو لازم غسل الوجه يكون من عند منابت الشعر وشحمة الاذنين المهم اجلس افرك جمب اذني وعند شعري واعيد واقول يمكن ماوصل الماء.بعدين يدي لازم ادعكها كثير عشان اتاكد ان الماء وصل شعري لما امسحه اصب فيه ماء كثير لدرجة انه صار جاف الحين بعدين امسح يدي في البلوزة ثم اخذ ماء جديد عشان امسح به اذني بعدين قدمي الله يكرمكم ادعكها كثثثثير كثير عشان اتاكد اذا وصل الماء او لا.
احس اني ما اقدر اعيش حياتي زي باقي البنات ,سمعت انو ممكن يكون عين او حسد
اول شيء انا جاتني الغدة الدرقية وكان شعري يتساقط بكثرة شعري كان كثيف ماشاء الله وقل الحين ,لكن تعالجت منها الحمد لله
وجاتني اكزيما لكن برضوا اتعالجت الحمد لله ,صرت انسى انسى كثثير زمان اول ما اقرا المعلومة اتذكرها الحين لا لازم اكررها كثير كثير
مدري احساني تغيرت للأسوء صرت ما اهتم في نفسي زي قبل كنت احط ماسكات واشياء بس الحين اتكاسل بقوة ,حتى في اهم شيء في الحياة الصلاة
تخيلوا مثلا صلاة الفجر يوم الجمعة والسبت امي تصحيني بعدين اقول لنفس بنام شوي وبعدين بقوم اصلي واسحب تجي الساعة 9 الصباح او كذا اقول دام اني تأخرت خلاص بعدين اصليها مع الظهر
واكمل نوم ,واحيانا صلاة الظهر اكون نايمة اصحى العصر اصلي ثلاث صلوات مع بعض بعدين المغرب اصليها في وقتها بعدين صلاة العشاء احيانا اؤخرها احيانا اصليها الساعة 11 او 10 مدري كذا اخرتها او لا
زمان كنت اهتم بالنظافة واحط بجسمي مسك واتعطر وخلطات وكذا وحالتي تمام واسبوع مكتبتي الدراسية انظفها حتى لو ماجلست عليها لانو احيانا اذاكر عالسرير ,الحين العكس تماما في الشتاء صرت ما اتروش الا مرتين بالاسبوع لاحد يستهزئ لكن مدري مو بيدي ,احس ما الاقي وقت اذاكر فيه وقتي مو متنظم ملخبط ,كنت زمان اول ما ارجع من المدرسة ما انام الحين انام حتى لو في الليل نمت بدري مثلا اقول اليوم مابنام وابغى اصلي العصر بدري انام غصبا عني واصحى المغرب او قبل بربع ساعة على الاكثر
صحيح مشكلتي طويلة لكن ما اقدر اشكي لصديقاتي او حتى امي عشان كذا طلعت لكم اللي بقلبي واتمنى تساعدوني جزاكم الله كل خير.