الوسواس في الغسل

اسعد الله صباحكم / مسائكم

أتمنى الجميع بصحة وعافيه

جايتكم بزي مساعده او استشاره لصديقة عمري متزوجة وبخليها تقرا الردود منكم

نفسي المتزوجات يساعدونها

هي بنت جميله وذكيه جدا جدا ,, فجأه صابها العام وسواس قهري بالصلاة والصوم والوضوء والنجاسات وكل شي
انا صراحه شكيت انها عين لما قرأت إنها من ضمن أسباب الوسواس
والحمدلله قدرت تسوي برنامج علاجي وتخلصت من نسبه كبيييييييره منه بحمد الله
راح منها بالصلاة ووالوضوء ,,الخ
بس تحكي لي عالماسن الحين انها تعااااااني جدا في الغسل حق الطهاره ( الدوره - الجنابه)

تقول صرت اتجنب زوجي جدا لاني اقعد احوس ساعه وانا اتروش هذا بعد ما تحسنت ولا أول أردى

تشكي لي تقول تقشرت من الصابون والشامبو خاصة لو تكرر الغسل مرتين باليوم
قلت لها انو الماء كفايه بالذات لا صار الغسل واجب عليك يوميا او اكثر من مره باليوم << فهمتوني

, تخيلوا تقول لما اغتسل واقرب اخلص ارجع المس (... )والقا زي الافرازات واقول لازم اعيد الغسل ,, تقول اتعذب ونا اغتسل من الجنابه ,, لو قررت اسرع وافحط يبي لي ساعه كامله

قلت لها على كذا يكفيك ماااء بس من راسك الى رجولك وتمضمضي واستنشقي واطلعي ,, تقول احس ما ينفع
و تشرح لي انها اول شي تغسل كل جسمها وراسها بمويه وتطوول عشان تتاكد انها وصلت كل مكان
بعدين المرحله الثانيه لازم شامبو وصابون ولا تحس الجنابه ما تروح

المصيبه وراها دوام وتقعد كل صبح تحت الدش الين تنسلق تقول نفسي اتروش بسرعه واطلع بس تعرفون الوسواس لازم تتاكد ان الماء وصل هنا ووصل هنا ,, واحيانا تقول اذا وصلت نص الاغتسال أقول نسيت اسمي بالله وترجع تسمي وتعيد

واذا قربت تطلع تقول القى اثر رطوبه او افرازات وتخاف انه (مني)

المهم علموها شلون الخلق الطبيعين ماخذين الدين يسر ويغتسلون ويمارسون حياتهم طبيعي

انا نصحتها باللي اعرفه وانها تتعوذ من ابليس ولا تلتفت للشك أبدا ,
و قلت لها انا عزباء ومستعده افصخ الحيا وانزل مشكلتك بيوزري :)

وخلي المتزوجات يفيدونك و يجاوبونك

اادعوا لها بالشفاااااء ,, وهي في انتظار ردودكم