شلونكم .. وش علومكم .. بخير؟ الحمد لله ..
طيب بدون مقدمات يلا ندخل في الموضوع ..
أنا اليووووم جاية وجايبة معاي وصفات "مجرّبة" لكل زوجة اتّبعتها زوجات كثيرات، وتناقلن الخبرات فيما بينهن واستفدن من نصائح الصديقات المدمّرة، ولم يتراجعن عنها أبداً بالرغم من كل التحذيرات والنصائح المضادة، وانتهى زواجهن إما بالطلاق العاطفي أو بالطلاق الفعلي، أو بخيانة الأزواج لهن ..
النصيحة الأولى: مدي بوووزك دائما هذي أول وأهم وصفة مضمونة للتخلّص من حُب الزوج، كشري في وجهه أول بأوّل، حسسيه دائماً بالذنب والتقصير تجاهك وتجاه أولادك، وبأنه ما يستحق "النعمة" التي وهبها له الله، وبالطبع فالمقصود بالنعمة هي أنتِ شخصياً .. واحكيله كيف قبل ما تتزوجيه اتقدملك شباب كثييرين أحسن منه لكن النصيب !!..
النصيحة الثانية: احفظي الجملة التالية وردديها ليلاً ونهاراً على مسمعه ودون ملل (انت ما تحس فيني أبدا) أو قولي: (عمرك أو من يوم عرفتك وانت ما تحس فيني) وهذي نتايجها أفضل .. ولمزيد من الفائدة قولي: (ولحد ما أموت ما راح تحس فيني) وبالطريقة هذي حبيبتي بتسكرين في وجهه كل الطرق والمنافذ علشان يدافع عن نفسه ..
النصيحة الثالثة: احرصي على شتمه بمناسبة وبدون مناسبة؛ بسبب علاقته بأهله وأصحابه، وكيف أنه رامي نفسه عليهم ويذل نفسه علشان يسعدهم .. وهم ما يحترمونه أصلا ولا يقدمون له نص اللي يقدمه لهم .. وأنه ما عنده سالفة ولا يدري وين مصلحته لأنه يفضلهم عليك، ولو كان ذكي كان المفروض يقطع علاقته فيهم من يوم ما اتزوجك ويكتفى بكِ وبأهلك ..
النصيحة الثالثة: لا تنسيين أهله هم أعداءك اللدودين خليك رسمية معهم وأسيئي معاملتهم لما تزوريهم بشكل مباشر وغير مباشر، ولنتيجة أفضل أجلسي ساكتة مثلك مثل الكرسي اللي انتِ جالسة عليه. وانتقديهم في كل شئ فيهم بدءاً من مستواهم الاجتماعي، وأثاث بيتهم اللي ما فيه ذوق، ومذاق طعامهم الماسخ، ومزحهم السخيف ولبسهم اللي كأنه لبس قراوة ..ولا تتركين شي بدون تعليق سيئ، وتنهدي في النهاية وقولي يا ربي انا وش زوجني من هالعائلة ...
النصيحة الرابعة: اسخري من أهل زوجك أمام أولادك، واتكلمي بانبهار عن نفسك وعن أهلك وحرّضي أولادك عليهم وخليهم يحبونكِ أنتِ وأهلكِ بسسسس، وحفظيهم كم جملة علشان يتفننوا في مضايقة أهله لو زاروهم ..
النصيحة الخامسة: اذا جلس زوجك أمام التلفزيون ضايقيه والزقي فيه وقت مشاهدته لمباراة مهمة أو برنامجه المفضل علشان ما ينشغل بشي غيرك. واذا مافاد خذي منه الريموت وقولي له في برنامج طبخ مهم ولا بتابع المسلسل ..
النصيحة السادسة:شوفي حبيبتي اذا لقيتيه قاعد مع نفسه يفكر لا تتركيه افرضي نفسكِ عليه، واسأليه تحبني؟ ليش ما تجلس معاي؟ ورا متغير علي؟ وووو ولا توفرين سؤال بخاطرك ما تقولينه ..
النصيحة السابعة: قارني بينه وبين أزواج صديقاتك اللي يتنافسوا علشان يكسبوا رضاهن .. مع أن أقل واحد فيهم أحسن منه أصل وفصل ومكانة اجتماعية ومادية وانهم شيك وذوق واخلاق و و و ولا تنسين التنهيدة اللي تذكره بحظك العاثر اللي طيحك في أبو الشباب ..
النصيحة الثامنة: اذا رجع من الشغل تعبان وقرفان خليه يجلس غصب عنه يسمع أخباركِ كلها بالتفاصيل المملة .. ابتداءا بإيش سويتي مع العيال أو في العمل لو كنتِ موظفة وما في مانع لو تتكلمين عن زوج فلانة وعلانة واستغلي الفرصة علشان تتكلمي عن إنسانيتهم وذوقهم ومهاراتهم، وتنهدي بحسرة في آخر الكلام، وأنتِ تقارنين بينه وبينهم.
النصيحة التاسعة: انكشي شعرك وقاطعي المشط والفرشاة، و أدوات التجميل، احرصي على زيادة الوزن .. واتهميه انه السبب في اهمالك لأناقتك وجمالك .. ولولا الحمل والولادة والزواج لكنت أطلق من عارضات الأزياء .. بس وش تسوين مع الحظ الردي !!
النصيحة العاشرة: لما تكونين متضايقة لا تصارحينه "وتوقّعي" أن المفروض هو يعرف وش مضايقك من نفسه ، مع التعهد انه يقاتل من أجل سعادتك وما يسمح لأحد أبدا يضايقك تقديرا لتضحيتك بالزواج به ..
النصيحة الحادية عشر: خليه "يُجبر" أهله على حسن معاملتكِ يا كذا يا يقاطعهم تماما، وأن يضعونك في مكانة أعلى من زوجات اخوانه وحتى من أخواته البنات بل ومن أنفسهم ومنه هو شخصيا ..
النصيحة الثانية عشر: ردّي عليه الكلمة بعشرة وقولي له دائماً إنه معيشك في الهم اللي كنتِ ما تعرفين عنه شي من قبل .. وإذا قال كلمة لاااااا تسكتين له وردي عليها مع اختيار مفرداتك بعناية فائقة، ولا تتسامحي معه أبداً.
طبعا هذي مو نصائح هذي رسالة بشكل ساخر .. يعني اي واحدة تسوي هالحركات مع زوجها تحط في بالها انها تطفشه وتكرهه فيها بها الأسلوب ..
حابة اقول ان النساء هم النص الحلو في الحياة .. والمرأة خلقت لتكون اجمل شي موجود في حياة الرجل ..
ولكل سيدة متزوجة أو فتاة مقبلة على الزواج في يدك تخلي حياة زوجك جنه وفي يدك تخلي حياته نار بشكلك واسلوبك ومعاملتك (كوني له أمةَ يكن لكِ عبدا) ولتعلم الزوجه ان معظم الأزواج عليهم ضغوط كثيره ومنهم من يتحمل عذاب في عمله حتي يوفر لأسرته حياة كريمه، ومنهم من يستدين احيانا فلازم نوفر لهم الهدوء والراحة ..
ولازم ما ننسى ان اكثر حطب جهنم هم النساء لأنهن يكثرن الشكوى ويكفرن العشير
ولمعشر الرجال اقول لهم (خيركم خيركم لأهله) (استوصوا بالنساء خيرا) والرجل عليه العبء الاكبر علشان يسعد زوجته ويساعدها علشان تفهمه وتكون الحياة الزوجية بدون ملل ولا مشاكل ..
* الفكرة منقولة والصياغة والتحريربأسلوووبي والتعليق لي
NiDoOo @nidooo
عضوة فعالة
الوصايا الخنفشارية لتدمير الحياة الزوجية .. اللي تبي تطفش زوجها وتكرهه عيشته تدخل
9
1K
يلزم عليك تسجيل الدخول أولًا لكتابة تعليق.
الصفحة الأخيرة
وجاري التطبيق
اهو يجي بس