كيف يا بنات الخياطة عندهم في الخبر التعلبمي وهل يعطوك ابرة ظهر اذا طلبتي ...

التعليمي أنا والده فيه قبل خمس سنوات الحمدلله غرفه الولاده كنت لحالي بس اسمع صراخ اللي تولد بالغرفه اللي جنبي هالشي وترني يمكن لاني كنت بكريه
لما ولدت دخلتني النيرس دورة المياه كان فيني المغذي وازعجني انها قالت ادخلي وخلي المغذي برا حسيت بصعوبه والباب مفتوح قلت لها ابي اقفل الباب قالت لا :/
غرفة التنويم كان معاي 5 غيري مره مزعجه ويسولفون الحريم 
اي ونسيت اقول انهم وقت الولاده دخلوا علي حوالي 4 طالبات طب الظاهر بدون اذن مني هذا أكثر شي ازعجني

الحلو فيهم انهم مخلين البيبي عندهم ويجيبونه لي وقت الرضاعه وحبيت هالشي لاني كنت محتاجه للراحه

الحين ابي اسأل هل هو زي ماكان ولا تحسن وهل تنصحوني اولد فيه مره ثانيه ولا اجرب الولاده بالدمام :(

ولدت فيه مرتين رووعه ونظافه واهتمام غرفه الولاده خااصه فيك ويحطونك بالملاحظه ساعه او ساعتين والتنويم مافي الا ثنتين بس والبيبي يجبونه الصباح والمغرب وابره الورك يعطون انا طلبتها واعطوني وحتى كمام الاكسجين.. وممرضاتهم فلبينيات والله انهم حنونات ويتحمسون وقت الولاده 😆😆 

فيدونا اكثررر عن المستشفى ياصبايا 

المستشفى الجامعي فيه نواحي ايجابية وسلبية
الايجابيات:
- يعطونك ابرة الظهر اذا طلبتيها. احلى ميزه ومو  متوفره بمستشفى الولادة الدمام. 
- نظيف
- الغرفة فيه ثنتين
- الطفل ياخذوه بعد الولاده ويجيبوه للام ترضعه فيه امهات تفضل كذا انا طبعاً لا.  .( مو  متوفر بولاده الدمام للولاده الطبيعية) 
العناية جيده 
السلبيات:
الاطباء امتياز وقليلي الخبرة في معظم الاحيان.
الخياطه حسب الطبيب الي بيولدك. حضرت ولادة الخياطه فيها كانت سيئة والطبيبة كانت مبتدئة. 
غرف الولادة مافيها ستاير يعني اذا الباب مفتوح ممكن تنكشف المراة.( الولاده فيه ستاير وهذا مريح ويحافظ ع الخصوصية).  
- اي احد ممكن يدخل عليك وانتي تولدي متدربات وغيره بدون اذنك حتى عاملة النظافة. وهذا شي يقهر. 
- الممرضات فلبينيات واسلوب في التعامل مش مريح وماعندهم خبره منع حدوث التمزقات ( تمريض الولاده عنده خبره وتم تعليمه الطرق الحديثه في منع حدوث تمزقات الولاده ويحاولوا بالولاده بدون شق العجان ) .  الولاده الطاقم التمريض سعودي  ومريح في التعامل والطبيبات في الاغلب سعوديات والاطباء قليل عددهم. 




انا ولدت بمستشفى الولاده الدمام وكانت التجربة حلوه خاصة في غرفة الولاده وباذن الله اولد هالمره فيه. التعليمي بالرغم من ميزه ابره الظهر وانا اشوفها الحسنة الفعليه الوحيده الا ان انعدام الخصوصيه واحتماليه الاخطاء الي ممكن تصير تغطي على هالشي.
وفي النهاية وقت الولاده ماتدري وين الله يكتبلك تولدي بس نسأله يسخر لنا خلقه ويكتب لنا الخيره. واسفه ع الاطالة.