الولد عدواني هالك العيال بالضرب

السلام عليكم و رحمة الله و بركاته

بدخل في المشكله على طول

هذا ولد مع ابني في نفس الصف .. KG2 .. هالك ولدي بالضرب .. كل يوم تقريبا يضربه .. ضرب ، عض ، قرص ، رفس ، دز .. كل ما يخطر على بالكم .. و مش بس ولدي كل عيال الصف .. تخيلوا كل عيال الصف هالكنهم .. أنا ما ابالغ و الله .. شفته كم مره يضربهم .. ما يحشم من حد و ما يخاف

في المدرسه مسويلهم نظام تعزيز سلوك .. انا مسميتنه غسيل مخ للأولاد .. انهم ما يضربون بعض .. ها النظام ماشي على الكل الا ها الولد .. وصلت لدرجة قلت لولدي اضربه ، قالي لا المدرسه بتعاقبني و ما اريد اخسر نجماتي

و الله قهر .. ما يهون علي ولدي كل يوم ايي مضروب .. ليش و الله

كلمت وحده من المدرسات قالت مش عارفين كيف نحل مشكلته .. كلموا البيت مش متعاونين و شكلهم عادي عندهم و مش معتبرينها مشكله ان ولدهم يضرب العيال .. و بما ان البيت مافيه تجاوب سووا حق الولد نظام تأهيل عشان يتأدب شوي .. بس شكله مش متجاوب معاهم

مرات اقول الا عمره خمس سنين و ان شاء الله الله بيهديه .. بس حتى ولدي -ما ابغي اتكلم عن الباقيين- عمره خمس سنين .. انزين شو الحل الحين ؟ .. و الله ما يهون علي ولدي جي ينضرب .. حرام .. يعني انتو تشوفون ها شي عادي ؟

شو اسوي ؟ .. اروح اشتكي عند الاداره ؟ .. آخذ رقم ام الولد و اكلمها ؟ .. اذا هي ما اهتمت من المدرسه بتهتم بكلامي ؟ .. شو اسوي .. بصراحه لاعت جبدي من ها الوضع .. حتى المدرسه لاعت جبدي منها لها الدرجة يبون عيال مسالمين ؟ .. انزين العيال في الشوارع شياطين باجر أخاف واحد يزخه في الشارع يضربه ، يمشي عنه و ما يقول شي عشان ما يخسر نجماته .. مب كل حد ماشي على ها النظام

الحين شو الحل ما هذاك الولد

و آسفه طولت عليكم بس من الغيظ الي فيني .. و أنا من زمان ما شاركت معاكم

يزاكم الله خير