هلا أختي

أول شيء ليه اسلوب الهجوم بالكلام..

مهما سويتي وحطيتي ما راح تحبينهم اكثر من حبي لهم
خصوصا انك خارج الدائرة..وما جربتي هذي الحياة
والحمد لله انا ما بقلبي عليهم اي بغضاء..
وعارفة انهم مراهقات..

ولكن معاملتي لها برسمي..
لا يعني اني ما اسمع شكواها..
لا يعني اني..ما اتسلى معها بشي
وانا كنت مراهقة وعند زوجة اب..وعارفة حساسية البنات
فقصدي بالرسمية اني ما اكون صفحة مفتوحة..وما لها هيبة

لكن الحمد لله
حنا نطلع السوق سوى
وويثقون برايي..
حنا نطلع نتمشى سوى..
حنا نجلس سوى ونلعب احيانا..ونستهبل..
واحط لهم مكياج وتسريحات بحكم انها هوايتي..
واحيانا يقولون لي عن احلامهم..وما ارضى احد يهبط من عزيمتهم
الحمد لله لاشفت عليهم قاصر اذككر ابوهم..
واحيانا ازعل من زوجي..واتناقش معه
لاني ابيه يحدد وقت يجلس مع عياله وبدوني..
وكم مرة انبهه انهم فقدوا الام فمحتاجين لك الحين اكثر

وابغاه يحدد يوم على الاقل كل اسبوعين يطلع
ويمشيهم ولحالهم..

فيه اشياء..كثيرة حلوة بحياتنا..
لكن انا اطمع للأكثر فطرحت الموضوع..
ابغى تجاربكم كأخوة..

وكل هذا انا حاسة فيه..
لاني كنت عند زوجة اب..الله يهديها حرمتنا من ابوي
وحنانه..
غير ان ام عيال زوجي...كانت من اقارب اهلي
وتأثرت وتألمت لوفاتها قبل اجي عندهم..
فزيادة على مشاعركم كأخوة لهم..
انا احس اني قريبة لهم قبل ما اكون زوجة اب

وما طرحت الموضوع الا ابي نصايح
ما له داعي الهجوم..

فالرسمية اللي اقصدها ميب اللي ببالك..
انه كأنها رسمية عمل..

وسبحان الله من كل الموضوع كأنه تصيد اخطاء..
ولو فرضنا انه فعلا خطأ..
اعتقد فيه اسلوب مناسب تتكلمين فيه

اعتقد لو ولدك او اختك وغلطت..تسوين نفس الحركة
وممكن تعاتبينها لكن انا حتى عتاب ما اعاتب..
وتراي عايشة بينهم ومجربة...اني اعاتب
وبالعكس..يوم كنت انسحب وارجع اذا هدى الوقت
كانت المشكلة تمر بسلااام
لكن جربت مرة وعاتبت..وحتى حضنتها بناهية عتابي
وحلفت لها اني ما اكن لها اي حقد..

وقلت لها اي شيء يضايق قولي ممكن تكونين فاهمة خطاء
وممكن اكون غلطانة وما انتبهت لخطئي..

لكن اكتشفت ان زعلها كان اقووووى..
رغم اني يوم اجي اكلمها ما كانت زعلانة

بالنسبة لماما..وكلمة ماما
انتي ودك تتهاوشين الظاهر
انا قلت اني ما احب ينادوني ماما لانه موب من حقي
وقلت اني احبهم ينادوني باسمي لان احس كلمة خالة
فيها كلافة..
وموضوع الولد الصغير موضوع جاااانبي...
يعني هو اللي كان وده يقول...انتي تركتي الجانب الحسن
من انه لقى حنان ويبي يقول ماما....ورحتي لجانب سيء
وانا رفضت هذا الشيء..وقلت لزوجي..اني احس اني
اضايق ام العيال الله يغفر لها اذا سمحت انهم ينادوني ماما
وقال لي..انه الولد هو من نفسه وده لانه حاس بالنقص
والحمد لله انتي دايم تذكرين البنات بأمهم..
فاكيد انه اذا صار كبير بتذكرينة دايم يدعي لامه..
وانا عتبت على البنت بقلبي....لكن ما رحت احاسبها
وعارفة انها امها..وطبيعي ما تبي احد ياخذ مكان امها
لكن انا كنت ابي الصغاار ما يدخلون بهالصراع عشان نفسياتهم
شوفي الولد الحين...والله ان تبكين دم على حالة..تايه محد يعطيه
وجه..حتى اخته اللي منعته..مالها خلق ولا حتى تدخله غرفتها
ولو تسمعين ترجيه....أنا لحالي..دخلوني معكم..كان تبكين اكثر
ومع هذا..لو قالت له بحب وحنان..حبيبي امي تنتظرنا بالجنة
وما يصلح ننادي احد ماما غيرها ترى امي تزعل كان ما قلت شيء الا هذا اللي احس انه صح..



انا اتغااااضى...
انا ما اتهاوش معهم
انا حطيت موضوعي..
ابي افكار حلوة...اراء بحكم انكم امهات..
وانا صغييرة ...وتربيت عند زوجــــــــة اب
يعني ما عندي ام اقتدي فيها بتربية عيالي..
فقلت انكم خوااااتي وبتساعدوني

ولو كانوا ما يهموني ما حطيت لهم موضوع

فماله داعي الهجووووم

ليه زوجة اب ترهبكم وتظلمون بدون ما تفكرون

من كل موضوعي..ما طلعتي الا اني ظالمة
وقسيت على بنت زوجي..

وطلعتي اني ظالمة
واني ابيهم ينادوني ماما..

طيب وكلمتك اني طيبة وحنونة من وجهة نظري!!!
ليه انا قلت بموضوعي...تراي طيبة...تراي حنونة
لا والله ما قلت...واتمنى ان ربي يعطيني مزييييييييييييد
ومزيييييييييد من الحنان عشان أحاااول اعوضهم
وركزي على احاول....لان عارفة ان الام ما فيه احد يجي مكانها


انتي ما شفتي زوجة ابوي كيف كانت
ممنوووع اكلم ابووي..ولازم اذا احجت شيء يجي عن طريقها
ممنوع طبعا اجلس جنبه...فما بالك يحضني:44:
وانا دوم اقول لزوجي...احضن البنات لانهم مراهقات
وفوق انهم فاقدين امهم ...هم بسن يحتاجون لحنان مضاعف
اسألك انتي جربتي هاشيء؟؟؟

انا ما نبهت زوجي عليه الا لاني جربته

وقيسي على هذا اشيـــاء كثيرة

ولو كنت بنت نشأت ببيئة منعمة
كان ممكن اني حتى ما فتحت الموضوع

فعلا ردك يجرح...

هجووم وكأني قايلة انا بضربهم...

يا اختي أنا ما عطيت اخطائهم بالتفصيل
لاني ما ابي افقد تعاطفكم معهم

ما قلت انهم يحطون ارجولهم بوجهي
ما قلت انهم يستهزون بي..
ما قلت انهم اذا مريت سكروا الباب بوجهي..طبعا مع كلامات سيئة

لان افعالهم افعال اطفال ومراهقين..
وبعد فترة يرجعون لي..

يا اختي انا اطق ولدي
واهاوشه..وامنعه من حضني قدامهم
كل هذا عشانهم..

ووالله ان زوجي جالس يهاوشني قبل فترة اني قاسية
على ولدي...وانه حرام امنعه من حضني..

انا احاول اسوي اللي اقدر عليه..
وانا مع هذا اقول انا موب مثالية
واكيد عندي اخطاء................لكن موضوعي
فتحته ابي باسلوب توجهوني...

على فكرة....زوجي عارف عن هالموضوع
ودايم كل ليله يتابع ردودكم

عشان ما تشكين بعد............اني اتهمهم ظلم!!

جزاك الله خير

ليس لدي اكثر من ان اقول
دوما ضعي الله امام عينك
واحتسبي الاجر

وعليكم السلام ورحمة الله وبركاته

اول شي اهنيك يا اختي على صبرك واحتسابك وسعة صدرك وباين ماشاء الله عليك انك امراه واعيه ومحترمه والدليل

اسلوبك ويكفي طرحك للموضوع ليدل على مدى خوفك ومراقبتك لله عز وجل ولا يضيق صدرك اذا سمعتي من

يجرحك ويطعن في نواياك وامانتك التي لا يعلمها الا الله وليس من حق اي من كان ان يفسرها على هواه وعلى ضوء

كلمه او موقف لانهم خلاص مبرمجين عقولهم زوجة اب يعني ظالمه حاقده سبحان الله ما كان زوجات الاباء بشر فيهم

الظالمه وفيهم التقيه التي تعتبر ابناء الزوج منحه الهيه انما اراد بها سبحانه ان ييسر لها باب من ابواب الاجر وهي في

قعر بيتها اليست المراه ماجوره على خدمتها لزوجها وابنا ئها ان هي احتسبت الاجر فكيف بمن ترعى حاجات اولاد

زوجها النفسيه والماديه0000000

ثانيا اختك تكلمك عن تجربه لنفس وضعك لكن باختلاف الاعمار لان اولاد زوجي دخلت عليهم وهم اقل من خمس سنين

لذلك احس المساله كانت اسهل علي الحمد الله تعودنا على بعض بسرعه وحبينا بعض الحمد لله وكان عندي خادمه

تساعدني فالحمد لله احس الامور ماشيه بسلام ماشاء الله والله يتمم 00

انتي تبغين تسمعين تجارب لذلك انا ما راح اقولك سوي كذا وخلي كذا لاني بصراحه اخاف انصحك بشي مايناسبك

واكسب اثم لاني بشر ممكن اخطي واصيب فما ابغى اتحمل وزر احد انتي ادرى بنفسية اللي عندك وطريقة التعامل

معهم لكن انا بقولك على جوانب من حياتي وحنا نستفيد من بعض اذا شفتي خطا وجهيني ولك الشكر

- من بداية زواجي جلست مع زوجي وناقشنا موضوع الاولاد بكل صراحه وكل واحد طرح ماعنده 0

- اتفقنا على مبدا الحوار في كل صغيره وكبيره بعيد عن الاطفال واهم شي ركزت عليه انه مو كل غلط او تقصير

يفهمه انه ظلم اوحقد انا في النهايه بشر ممكن اخطي حتى مع اولادي ومستحيل اني اكون ميه في الميه ولا يكلف الله نفسا

الا وسعها

- الحمد لله من ناحية الرعايه والاهتمام بصحتهم ونظافتهم وتربيتهم وتعليمهم ماينفعهم من امور الدنيا والدين والاهتمام

بدراستهم واناقتهم احاول قد ما اقدر ما اقصر والحمد لله 0

- احاول قد ما اقدر اني اكون طبيعيه جدا معهم وقت ما الواحد يكون صح اكا فاه ولما يكون خطا اوجهه واناقشه

-الاحترام اهم شي مستحيل اتنازل عنه انا اتعامل معهم مثل معاملتي لاولادي اربيهم واعلمهم الادب والاحترام 0

- بالنسبه لكلمة ماما كانت رغبه ابوهم وانا ماشوف فيها شي لاني احس انه اريح لنفسياتهم لما يحسون اني زي

امهم ويشوفون انه مافي فرق بينهم وبين باقي الاطفال وهم المستفيدين انا ما راح اكسب شي 0

- ماقول اني مثاليه لكني اجاهد نفسي ودايما اراجع حساباتي واذا غلطت احاول اصحح غلطي واعوظهم0

فيه اشياء كثيره ماذكرتها واسفه على الاطاااله 0000000

ان شاءالله تلقين نصاايح مفيدة
اهم شيء..شاركيهم اهتماماتهم علشان يثقوون فيك وفي حبك لهم
سولفي معهم كأنك صديقتهم
كثرة السواالف والحكي مع بعض عن الدرااسة و المجتمع و التلفزيون تقربك لهم اكثر
الله يعطيك على قد نيتك

اول شئ اسمحي لي اقول لك انك رائعه وقلبك كبير
صدقيني مااجاملك بس نادره فعلا
وخلي عنك اللي تفلسفوا بردودهم لايضيقون صدرك كلها طقطقه كيبورد لاراحت ولاجت..المهم تعاملهم لو كانوا بمكانك..
انا يااختي وصلت للرد رقم 45 وكتبت ردي
اسمعيني الله يرضى عليك انتي مشكلتك في زوجك
يبدو لي انها سياسته الشده كنوع من التربيه
وايضا الطامه انه ينقل لك كل شئ الحلو والمر!!
المفترض انه يستقل بالحل مااظنه يحتاج لمشورتك في امور اولاده الخاصه
هالشئ بعد بينكم كثير
صدقيني يفهمون هم كل شئ حتى لو ماتكلمتوا
زوجة الاب تقبلها ماهو بالشئ السهل
بس
من يفعل الخير لا يعدم جوازيه *لا يضيع المعروف بين الله والناس ...
تصدقين اعرف وحده والله انها تقول كانت زوجه ابوي تنشر الغسيل كله
الحبل ملياااان
واذا خلصت انا واخوي نجي ونفك البحل ونطيحها
ترجع بهدوء وتعيد الغسيل
تدرين انها تدعي لها بكل وقت
حتى اخوها يوم مرضت زوجه ابوه جلس يبكي
مثل الطفل
لانها منومه بقسم نساء ومنعوه يرافقها
يقول ماتمنيت اني بنت الا هذا الوقت

لاتتعجبين من عدم تقبلهم
ترى النفسيات ماهي على الكيف
لكن انصحك بالتسامح وعدم التدقيق
وصلي لزوجك انه يتغاضى لان نفسياتهم على شفا جرف هار
لايصير هو والزمن ضدهم
يااختي تقولين زوجك حكيم؟؟!!
لاتزعلين مني بس يظهر لي العكس!!
شكله يتكلم كثير ومتسرع وعجول
وهذي الصفه قاتله لك ولهم
غصب على الواحد يتاثر
ويبدو لي انك حساسه فكملت..
وهم وضعهم مصدوم ذكرتي انه تزوج بعد وفاة امهم بوقت قصير
كل هالاشياء مجتمعه متعبه ومنهكه
تحتاجون اعاده نظر في تعاملكم
وخصوصا زوجك
الدقه والشده على غير سنع ماله داعي
كون بنته مانزلت للضيوف ونامت عادي جدا
الضغط النفسي قد يسبب لهم ازمات تتعبكم انتك
الاحتواء افضل حل
الحب والحنان مالهم مثيل
كلامي من واقع وليست فلسفه
شفت من عاش بالحب وشفت من شرب العكس
الرفق مع الاحتواء مع التغابي
راح تخفف عليكم
البنات بهالعمر مع امهاتهم يسوون كذا واشد
فتره وتعدي
وارجوك الولد الصغير هو اللي خنقني
ابكاني دممممم
اه
لاتتركينه
يبدو لي ان اخواته هددوه او منعوه بطريقه ما بالجلوس بكثره معك
ولاتلومينهم غصب عليهم
فصار متذبذب
احتويه
صدقيني الام اللي تربي ماهي اللي تولد
قالوها كثير عانوا..
والله يعينك ويسهل امرك..
لو ماقلتي عندك ولد كان قلت انتي اللي اعرفها
تزوجت واحد له اولاد امهم ماتت بولادتها
ونجحت معهم
لكن الحق حق
زوجها شخصيته مسهل عليها كثير
فيه لين وحبابه وتغاضي
عوضهم كثير
والخاص تحت امرك
وانصحك باستشاره مختصين
كونك خضتي التجربه ممكن يساعدك لكن تحتاجين معرفه اكبر وارشاد اوسع
الدكتور عبدالرحمن المحرج
مستشار اسري بارع
0504457410
وهذا مكتبه
مكتب المحاماة , بعد ما يرد السنترال اطلبي منه المحرج
4621988
:26: