neesah :

شوفي يا ست البنات ... انا ما حأقلك سوي رجيم ولا السمنة مضرة للصحة ولا شي من دا الكلام لأنه الناس تحسب إنه الإنسان السمين ما يعرف هادي المعلومات فيتبرعوا بنصايحهم اللي معظمها تكون بأسلوب جارح خاصة إذا كانوا أنحف منك بسم واحد فقط .... بينما الإنسان السمين عالعكس ... فاهم وعارف ولكن المسألة بالنسبة له مسألة اختيار أختاري انتي ايش تكوني ... اللي ابغى اقولك هو .. انو .. احنا اللي بنختار كيف الناس تعاملنا .... اللي طول الوقت حاسس انه سمين حيلفت نظر الناس لسمنته أكتر من شخصيته وحيعاملوه الناس على إنه انسان سمين بس .. انا انسانة سمينة .... ورغم اتفاق البشر كلهم على إنه السمنة مضرة وأنا موافقة معاهم على هادا الموضوع ولكن السمنة كانت بالنسبة ليا مفيدة في شي مهم في حياتي ... هو انه السمنة خلتني أشعر بإحساس الآخرين ... أنا اكره التريقة والحش .... أكره التركيز في أشكال الناس لأني متأكده أن الشكل مو كل شي .... وأحب سمنتي لأنها ربطتني بزوجي الغالي .. انا تزوجت وانا سمينة وحملت وأنا سمينة ... وناوية إن شاء الله بعد الولادة انتبه على نفسي وما أزيد بس باقتناع تام مني إني مو ناقصني شي ... انا حابة نفسي زي ما أنا والناس لازم تحبني زي ما أنا واللي يكرهني عشان شكلي مو على مزاجه فالله الغني .. بعدين تعالي هنا ... انتي سمينة قد ايش يعني ؟؟ لا تكوني من هادولا اللي وزنهم زايد شوية ويطفشونا بأنا سمينة أنا سمينة :hahaha: نصيحتي ليكي ... أقبلي فكرة الزواج وصلي استخارة طبعاً وأكيد اللي بيوصفوكي للعريس حيقولوله إنك ممتلئة ... يعني هو عارف ... وإذا ما يبغوا , الخير وأهله .... وإذا حسيتي انه الموضوع معقدك بزيادة فكري انتي ايش تبغي تكوني وأتأكدي انك قادرة على انك تسويه لأنك مو ناقصك شي ... وأدعي ربنا يرزقك الزوج الصالح لأنه هادا أهم شي تقبلي مروري ..

شوفي يا ست البنات ... انا ما حأقلك سوي رجيم ولا السمنة مضرة للصحة ولا شي من دا الكلام لأنه...