الى متى بتكون ثقتكم عمياء للخادمات

السلام عليكم ... كيف حالكم خواتي ؟
حابه اتكلم عن موضوع منتشر .. المدام و ثقتها الشديده بالخادمه .. تحط اولادها عندها و تطلع من البيت .. انا مدري وين ضميرك و انتي مو عارفه ايش قاعد يصير في طفلك ؟! اذا مضطره حطي كاميرات على الاقل و تقدرين تكلميها و انتي برا البيت و تشوفيها .. و انصح تقولين لها فيه كاميرات عشان ما تشوفين شي يضايقك .. انا حاطه كاميرات و مع ذلك ما احط عيالي عندهم .. بنت عمي كانت تحط طفلها من هو رضيع عند الخادمه و ياما حذرتها و الجميع نبهها ما فيه فايده .. الولد صار عمره ٥ سنين و عنده توحد لانها اكتشفت الخادمه تضربه ليل نهار و حتى لما تيجي تنومه .. دايره فيه الحين بين الدكاتره مشتهيه تسمع كلمة ماما منه ... ما يتكلم نهائي بسبب العنف الجسدي يلي تعرض له .. صحصحت بنت عمي بس بعد ايش ؟ و مره كنت في مول لقيت وحده تاركه ولدها مع الخادمه تطعميه و راحت تدور في المول الام ... الخدامه كانت تأكله ملعقه و هي تآكل معاه من نفس الملعقه عشره .. قررف ... انتبهوا على عيالكم .. هدول امانه من رب العالمين ... و راح تسالوا عنهم
سؤال ... اذا كان عندك شنطه مليانه فلوس و دهب ... حتخليها الشنطه مع الخادمه و تطلعي من البيت ؟ هل تامنيها ؟ اظن الاجابه لا .. اجل كيف ابنك حبيبك .. من لحمك و دمك يلي اغلى من كل الفلوس و الدهب ... و الدنيا كلها .. كيف تامنيها ؟؟ لا تقولوا طيب ابني كبير و يتكلم اذا تاذى .. و قسم بالله كنت تالت ابتدائي و الشغاله كانت تجبرني اسوي شغلها و تهددني اذا قلت لماما ... لدرجة اذا لفت امي ظهرها .. تمسح الشغاله يدها بدقنها .. زي يلي اسكتي و انا اوريكي اذا تكلمتي .. كنت اموت رعب منها .. بعدها امي لاحظت انو ثقتي بنفسي تحطمت و فيه شي مو طبيعي الين ما شافت امي بعينها الخادمه نازله فيني هواش .. و اشتكيت لها بعدها .. و امي سفرتها على طول .. و امي ما كانت تخليني لوحدي معاها .. بس كنا ساكنين في فله كبيره .. و كل واحد في غرفته .. و كانت تستفرد فيني الله لا يوفقها .. اجل كيف لو كنت لوحدي تماما معاها ايش كانت سوت ؟؟؟؟ تالت ابتدائي يعني كبيره
لا و يلي تطلع و تخلي غرفتها مفتوحه و يلا تعالي نظفيها .. تاكدي انها تجرب قمصان نومك و تشوف ايش عندك و تنسدح على سريرك و يمكن تآخذ اثرك بكل سهوله .. و حريم تعطي الخادمه الملابس الداخليه حقتها و لا حقت زوجها و يلا غسليها ... ؟؟؟؟؟ انا حتى زبالتي اكرمكم الله اقطها انا .. ما اخليها تعرف اي شي عن خصوصيتي ..
انا حاطه كاميرات في بيتي كله ... و قلت لها انو فيه ... اول يوم ركبت الكاميرا .. فتحت حقت المطبخ .. لقيت الشغاله سوري على الكلمه .. قاعده تنقف انفها و تحط الوسخ عالطاوله و تنظف غمس عينها و تحطه عالطاوله .. شكلها مو مغسله وجهها المقرفه ... رحت واجهتها و انكرت ووريتها .. شكلها لسه ما كانت متعوده عالكاميرات و نسيت نفسها .. طبعا سكتت من غير اي كلمه


و بلاوي كتير لو نقعد نكتب ملاحم ما حنخلص .. انا ما اطلب منك تكوني موسوسه او ظالمه او شكاكه .. بس انتبهي على عيالك و زوجك و بيتك .. لا تخلي الخادمه تآخد مكانك ... هي للمساعده فقط ... خليها لكرف البيت و ممكن تساعدك بعيالك تحت اشرافك .. زوجك ما تدري عنه .. نبهيها مستر اي غرفه يدخلها انتي تمسكي بعضك و تتوكلي ... صحصحوا الله يخليكم قبل فوات الاوان .. عشان كدا فيه شباب منحرفين و لا حقون مخدرات و لا شذوذ لانهم و للاسف تربية خادمات .. و الام يا ويلها من ربها هي المسؤوله ...