الى متى وانتي عايشه دور الضحيه ؟

السلام عليكم ورحمة الله وبركاته




إلى متى وانتي كذا ؟؟
ايه انتي اقصدك انتي ؟؟ كثيرة الشكوى
( انا مهمومه وانا تعبانه زوجي يخوني وزوجي وزوجي .... الخ )




الى متى وعايشه دور الضحيه ؟؟
تبين كلمة عطف من الناس تبين الناس تواسيك بكلمة








ترى كل الناس عندها مشاكل وهموم منو اللي مرتاح بالدنيا




(( لقد خلقنا الانسان في كبد )) في مشقه في تعب تطلعين من بطن امك تبكين وبعدها تعانين الم خروج الاسنان وبعدها الم المشي والسقوط وبعدها تدخلين المدرسه وهم الدراسه وبعدها الزواج وبعدها مشاكل الزوج وبعدها هم الحمل وهم الولاده تكبرين وتعانين من تربية الاولاد وهم زواجهم وهم وظايفهم وهم مشاكلهم ونهايتها الموت




حياة كلها مشقه في مشقه تعب في تعب هذا امر مقدر ومكتوب




الانبياء افضل الخلق عانوا كثير وكثير




للأسف اشغلتنا الدنيا والهانا التكاثر في الاموال والاولاد (( الهاكم التكاثر . حتى زرتم المقابر ))




واشغلتنا الدنيا عن ماخلقنا لاجله خلقنا من اجل الله وحده عبادته والايمان به وتوحيده
اغلبكم يقول الحمدالله احنا مؤمنين صح ولكن ايمان ناقص
الايمان ان تؤمن بالله وملائكته وكتبه ورسله واليوم الاخر وبالقدر خيره وشره




هل انتي فعلاً مؤمنه بقضاء الله وقدره ؟؟
لو فعلاً كنتي كذا ماصار هذا حالك
نقرى ايات الصبر وجزاء الصابرين وتعدي الايات ولانفهم ولا نتعظ فيها
ونزيد الشكوى ويضيع اجر الصبر علينا
يعني المشاكل حاصله حاصله لاانتي اللي حليتيها ولا انتي كسبتي اجر الصبر




هذا مايمنع الاستشاره عند من تثقين فيه بس يبقى القلب مؤمن ومطمئن ان كل مايحصل لي خيره وحتى الهم كله اجر
امر المؤمن كله خير ان اصابه خير شكر وان اصابه شر صبر




كثرة شكواك وكثرة تضجرك حرمك هالاجر العظيم (( انما يوفى الصابرون اجرهم بغير حساب ))
هذا في الاخره




وفي الدنيا الناس في البدايه تتعاطف معك بس بعدين صدقيني بتنفر منك بيقولون هذي متشائمه بس تتشكى تاثرين على نفسية الشخص اللي تتشكين له ويروح يدور على ناس متفائله وتكره الناس مجالستك




اتركي عنك دور الضحيه انك انتي المسكينه انتي المغلوب على امرك وتستعطفين الناس بكم كلمه وبعدين
وشنو استفدتي ؟؟








ثانياً : كل شي يصيبنا من اعمالنا (( ومااصابكم من مصيبةً فبما كسبت ايديكم ويعفو عن كثير ))
(( ذلك بما قدمت يداك وان الله ليس بظلام للعبيد))




حاسبي نفسك اجلسي مع نفسك ايامك تضيع ولا سويتي شي لربك كيف صلاتك ؟ كيف قراءتك للقران ؟
كيفك مع الغيبه والنميمه ؟ و و ...... اشياء كثيره




بالمختصر علاقة مع ربك ؟؟
كيف تبين الراحه وانتي لاهيه في الدنيا تركضين وراها (( ومن اعرض عن ذكري فإن له معيشةً ضنكا ونحشره يوم القيامه اعمى ، قال ربي لما حشرتني أعمى وقد كنت بصيرا. قال كذلك اتتك اياتي فنسيتها وكذلك اليوم تنسى ))




(( ومن يعش عن ذكر الرحمن نقيض له شيطاناً فهو له قرين ))




صار الشيطان ملازمك في كل شي يخرب حياتك ويهدم بيتك ويقسي قلبك ويصدك عن ذكر الله
وسلط الله عليك بذنوبك وبعدك عن رب العالمين زوجك واهل زوجك ومشاكل كثيره




عالجي كل هالامور رجعي علاقتك بربك واخلصي النيه لله واجعلي همك الله وحده والاخره
والله هو بيتكفل بامورك وينصرك فهو نعم المولى ونعم الوكيل ونعم النصير




(( من أصبح وهمه الدنيا شتت الله عليه أمره ، وفرق عليه ضيعته ، وجعل فقره بين عينيه ، ولم يأته من الدنيا إلا ما كتب له ، ومن أصبح وهمه الآخرة جمع الله له همه ، وحفظ عليه ضيعته ، وجعل غناه في قلبه ، وأتته الدنيا وهي راغمة ))









اتمنى فعلاً تبدأين مرحلة التغيير وتبدأين من نفسك وعلاقتك مع الله اهم شي صلاتك والمحافظه عليها والخشوع فيها وذكر الله والتقرب بالطاعات وتتجنبي المحرمات قد ماتقدرين




هذا هو الاساس لان الله هو وحده قادر على ان يحول حالك من حال الى حال افضل




هذي اول مرحله هي علاقتك مع الله ،،












والله الموفق ،،