الى محبات الاكل الاردني والمنسف، بقدملكم أكلة الرشوف

السلام عليكم جميعا

هادا اول موضوع الي.. وبما انو شفت كتير مشاركات بالنسبة للمنسف، حبيت انزللكم اكلة ان شاء الله تعجبكم وتكون جديدة عليكم

الاكلة هي الرشوف
وهي زي الشوربة، ولكن تؤكل كأكلة رئيسية لانها غنية جدا وعلى الاغلب بينفت معها خبز
وهي طيبة دائما ولكن ايام البرد الها نكهة خاصة لانها بتدفي

المقادير/ عدس حب مش مجروش (تقريبا كوب او كوب ونص)
كمشة رز بالايد يعني مو كتير حسب قبضة ايدك (تقريبا ملعقة ونص كبيرة الى ملعقتين)
لبن (جميد منقوع ثم يخلط بالخلاط ويصفى ثم يضاق اليه لبن عادي يخلط ايضا بالخلاط- ممكن لبن بقر او لبن نعاج اطيب( تقريبا العلبة الكبيرة يعني الكيلو) بالنسبة للجميد انا بحط لهادي الكمية نص راس او اقل شوي.
بصلة مقطعة مكعبات ومقلية بسمنة بلدية او سمنة عادية
ملح
نعنع ناشف

الان، يسلق العدس نص سلقة، ثم يضاف اله الرز ويتركو لينسلقو وتبطل الرزة والعدسة يابسة

في هذه الاثناء بتكوني حضرتي اللبن (نفس لبن المنسف يعني) ويوضع على النار ويحرك الى ان يغلي (لا يجوز ابدا ترك اللبن بدون تحريك حتى تصلي لمرحلة الغليان حتى لا يخرب ويفرط)

هلأ لما يغلي اللبن وطي تحتي واتركيه يغلي
لما يستوي العدس والرز، صفيهم من ميتهم وضيفيهم على اللبن
وحركي
خليهم يغلو وضيفي ملعقة كبيرة نعنع ناشف، ودوقي ازا بدو ملح- لا تنسي انو الجميد مالح، فحطي الملح بعد ما يغلي اللبن

الان قبل ما تستوي وتسبك ضيفي البصلة المقلية
وازا حاسة نكهة النعنع مو كتير واضحة مكن تضيفي كمان

كمان ازا اللبن تقيل ضيفي ماء لتحسي انو مقبول ومتجانس ومو خفيف

يسكب في زبدية وبالعادة بتفني خبز وبتنقعي في ويؤكل شرب او فتة
وجنبه بصل اخضر وفجل وجرجير ورشاد وكل الاشياء يلي بتحبيها
يا رب الصور تظهر
مع تحياتي..

ادعولي يوفقني ببيتي الجديد ومع زوجي واولادي سواء عجبتكم الاكلة ولا لأ :)
ملاحظة: ممكن اضافة كوب من الحمص المسلوق كما يفعل البعض واستخدام الجريشة (قمح ناعم) او البرغل بدل الرز، ويمكن وضح قليل من بهارات السمنة البلدية" :)