السلام عليكم ورحمة الله وبركاته
الى من تتعالى على المهنه وعمل فرص العمل في مصانع الدجاج وغيرها
اسمعي وجهة نظري ولك حرية القرار
عن نفسي انسانه ماديا مبسوطه على الاخر والله يديمها من نعمه
وشهاده اطلق من اللي يصيحون مستوى شهادتي ما يسمحلي
وكذا شهاده في كذا مجال وفي اي مكان قادره اتوظف بكل يسر وسهوله
الا اني اتمنى اني فعلا اتوظف في اي مجال مهني حرفي في اي مصنع غذائي مهما كان مستوى هالمهنه ولا حتى راح اسئل عن الراتب
ومكانتي الاجتماعيه بضرب فيها عرض الحائط
ليه لاني لوعرفت صغائر الامور في الصناعه بكره انا اللي بقدر ادير مصنع باكمله
بنت البلد والسيدات هم اولى بالصناعات الغذائيه من الرجال لسبب واضح وهو انها هي المتعامله بالدرجه الاولى مع المنتجات
الرجل همه سفره طعام تتقدم له وخلاص مهو عارف التعب اللي جالس يصير للمراه في المطبخ
لكن شوفو بعد توضيف النساء في المصنع الدجاج صار يجي منظف وجاهز للطبخ ومقطع وخالص
الدجاج صار يجي مخلي من العظم
الدجاج من خبرة السيدات بعض العوائل بس تاكل صدور فالفخوذ مصيرها الله المستعان خلو لنا الصدور في صحن والفخوذ في صحن
والله ربة البيت ياخذ وقت تقطيع الشاورمااا قطعوه لكم
انتي بس خذي المنتج وباشري عملك
لما وصلت لكم الرفااهيه هذي صرتوو تتبطرون على بنات البلد اللي نفعوكم بخبرتهم وتعبهم
بجد استغرب حالكم يا بنات البلد
اذاعة القران الكريم كل يوم العصر تعرض بيوت مطمئنه والله ثلاث ارباع المشاكل تطرح من النساء وتجي هنا وتقولك اعيش في بيتي ملكه
طيب اذا كلامكم صحيح ليه العالم تشتكي ليه السيدات يشتكون بتقصير الرجال من الناحيه الماديه وحتى تقول ابي لو 500 ريال ماني لاقيه
لازم تكونو واقعيااات واللي تقول هذا الولد ابوه حاط له القصر والا الورث والا والا
يا اختي انتي اشتغلي شغل ابوه مو عشانك عشان اولادك ابدئي وتوكلي على الله واخلصي النيه وتذكري قصة سيدنا موسى مع الخضر لما اقام السور ليه عشان يحفظ ورث الولد وليه عشان الولد لا عشان ابواه كانا صالحين
كوني امراه صالحه وصلاحك مهو بالانتقاد والاسائه لكل شيء حلال
قدمي الخير عشان بكره ربي يحفظلك اولادك ويغنيهم عن حاجة الناس
يا عزيزتي كم بيعطوك راتب الف ريال راح اخذ اقل تقدير
انتي على قولتك في صحه ونعمه وخير ومنتي بحاجة الوظيفه ومكانتك الاجتماعيه ما تسمح وشهادتك الفاضله تمنعك وجالسه في البيت تتقلبين يمين شمال على الفاضي
طيب استغلي هذا الجسد وهذا الوقت وهذه الصحه في معيشة اولادك في المستقبل احسبيها معاااي
1000 ريال كل شهر على اقل تقدير
1000 * 12 = 12000 ريال في السنه
انسي انه لك اي علاوه انسي انه لك بدلات انسي انه لك مكافئه في حال كنتي متميزه انسي انه في كسوة اعياد هذي كلها راح نلغيها
عندك ولد عمره سنه وصل 24 سنه وتخرج ومالقى وظيفه محترمه مثل نظرة امه لانه امه جالسه تغذي فيه الاستعلاء
12000( دخلك السنوي ) * 24 ( عمر ولدك) = 288000 ريال مئتين وثمانيه وثمانين الف ريال انتي بس كل اللي سويته لولدك استغليتي طاقتك وصحتك في خدمتك ولدك في المستقبل هالمبلغ كفيل بانه يقيم له اي مشروع يبدء فيه ويعطيه حقه من الكفايه ولو كان الراتب 3000 ريال لكي ان تتخيلي المبلغ
لا تقولين اضيع وقتي وبيتي اولى وزوجي اولى وعيالي اولى فيه البعض لا جابت خبرالزوج ولا تعرف عن عيالها شي والشغاله شايلة الدنيا كلها وهي ما غير تتقلب تقل دجاج شوااايه في ذا الفراش قومي هزي نفسك تعوذي من الشيطان سوي شي اقل شي احتسبي فيه الاجر عند الله يا عزيزتي ما تبين الالف الريال هذي لا تقدم ولا تاخر عندك عيالك ابوهم متكفل وفاتح لكل واحد فيهم حساب يودع لهم مبلغ يفيدهم في المستقبل اكسبي الاجر وخذي الالف وخليه دخل لاسره فقيره يتيمه محتاجه لا ام ترعى ولا اب سليم والجرايد صارت ما تتحمل قصص المحتاجين والاسر اللي تكالبت عليهم الظروف بتقولين فيه مؤسسات خيريه المؤسسات محتاجه دعم المواطن محتاجه القلب الرحوم
اذا كل ما سبق ما حرك فيك ساكن فسكوتك واحترامك لاختك المحتاجه للوظيفه وعدم انتقاص شخصها ومهنتها يعتبر افضل واسهل شيء تقدميه ولا يكلفك الكثير صدقيني لا يكلفك الكثير سواء القليل من الصمت
وصراخك وعويلك بلد البترووول بلد البترول مجتاجه وقفة ابنائها وبناتها للنهضه هي جالسه تشغل البترول عشان تغطي احتياجات ورواتب الايدي العامله الاجنبيه اللي جات تمسك الوظايف ياللي ولد وبنت البلد ما يتنازلون يشتغلون فيها
ترا ما يجون يشتغلون عندنا بالمجان محتاجين رواتب محتاجين تامين طبي محتاجين سكن محتاجين مواصلات محتاجين الاحساس بالامان من حسد اهل البلد بتقولون وليه هذا كله
روحو اسئلو اللي يشتغلون خارج المملكه ايش ينعطى لهم واكثر من كذا وهذا اقل شي يتقدم له لانه ترك بلده ووطنه عشان يخدم بلد اخر محتاج لخبرته وعقليته ومحتاج للمهاره المهنيه اللي عنده
وكفاااايه بجد كفااااايه تكذبو على انفسكم بالتعالي والفشخره الكذابه والوحده تتكلم وكانها عايشه بقصر وبالاخير لو بقولها اعطيني تقرير مصور عن بيتك يمكن الاقيها تحتاج انه تسجل في الاعانه بس لمجرد التكبر والتعالي وانتقاص وازدراء الناااس ونسيت لا يدخل الجنة من كان في قلبه ذرة كبر
بقولكم شغله جات في بالي مع اني كنت خلاص راح انهي الموضوع
قصة سيدنا عمر بن الخطاب رضي الله عنه وارضاااه وهو خليفة المؤمنين
ما قال انا عمر ولا قال مكانتي الاجتماعيه ولا قال انا مكتفي اروح اوكل احد ثاني محتاج يقوم بالمهمه واعطه كم درهم او دينار لا
كان يقوم بنفسه في خدمة السيده العجوز الكفيفه هل قال انتظر المال لا ..كل هذا لوجه الله تعالى الله اعطاه الصحه ليقوم على خدمة من لم يرزق بالصحه والعافيه
مشكلتنا ابتعدنا عن ماثر المسلمين ماثر ماثر ( اثرت على نفسي )
فلا حول ولا قوة الا بالله العلي العظيم
اكيد وحده بتقول طيب روحي واشتغلي وش يمنعك بقولك ليتني بالقصيم ما ترددت لكن للاسف انا مو بالقصيم
ولازال البحث جاري عن مصنع في منطقتي رغم ان تقديم حافز لغيت كل الوظائف المكتبيه والاداريه والتعليميه وطلبت فقط الوظائف المهنيه في المصانع للمعلوميه في منطقتي وجالسه ابحث حتى لو من باب العمل التطوعي ما ابي راتب يكفيني شرف التعلم
نسيت اوضح نقطه مهمه اتمنى يطبقونها في السعوديه
في امريكااا واستغربت هالشي بصراحه تحدثت مع كذا شخص متطوعين في الاعمال رغم الشهادات والمكان الاجتماعيه وحتى لو حبيتي تعطيهم اكراميه البعض يرفض يقولك انا مو محتاج انا في عمل تطوعي ليه بجد ليه هذا السؤال اللي كان يراودني ؟؟؟
فقالو لي انه ما نحصل على وظائف حكوميه الا بعد ما نعمل عمل تطوعي في 20 مجال او 25 مجال ماني فاكره وتصدق من رب العمل بكفائة الشخص بعدها بامكانه التقديم على الوظائف الحكوميه ...
وهذي بتعطي للشخص مجال في اكتساب الخبره بتعطي للشخص مجال معرفة مهاراته هل هي مهنيه او اداريه او قياديه وين يلاقي نفسه وينجز عمله بمحبه واخلاص
باعتقادكم لو طبق عندناااا ايش راح يكون ردة الفعل للعلم انا جالسه احاول اوصل هالفكره للمسؤلين في البلد بانه لازم ينظرون للموضع هذا بشكل جدي وقتها راح يبان ابن البلد اللي بيخاف على مصلحة بلده واللي يبي يكبر الوساده وعلى قولتهم ضرس فوقاااني والا اكل ومرعى وقلة صنعه
وبس
ادري ثقلت عليكم لكن بجد اتمنى من كل قلبي الاقي جيل اولادي جيل واعي يمتثل بكلام الله سبحانه وتعالى وبكلام رسوله الكريم حبيبنا المصطفى صلوات الله عليه وسلامه
جيل من قال ها انا ذا ليس من قال كان والدي وانا ابن فلان من الناس
اسئل الله لي ولكم الهدايه وسعة الرزق والرضى من رب العالمين وجنة عرضها السماوات والارض
محبتكم
نـــــــــــــــوال
نــــــــــوال @noal_8
كبيرة محررات
يلزم عليك تسجيل الدخول أولًا لكتابة تعليق.
جورى الحب
•
كنت افكر في الوظيفه لكن فكرت بعقل واقتنعت قلت انا جالسه ببيتي وزوجي موفر لي كل الي احتاجه ماناقص علي شي اش الي يحدني اترك اطفالي واهمل بيتي عشان وظيفه مومحتاجه لها كثير
كلي أجنن
•
لا والله ياحبيبتي أتعب حالي عشان الف ريال وش بجيب الف ريال في شغاله والاسواق والا في أحتياجاتي والا في تعبي بصراحه ماأرضى ياراتب فوق الخمسه الالف والا جلوس في البيت أفضل وفوق هذا أكيد مكان العمل بعيد عن بيتي لو كان بيجي بجنب البيت كان هانت أنا مايهمني طبيعه العمل في مصنع والاغيره اهم شي ساعات العمل تناسب المرأه وبعيد عن الاختلاط وراتب يرضيني
عن نفسي انسانه ماديا مبسوطه على الاخر والله يديمها من نعمه
خلاص ياحبيبتي أعملي عمل تطوعي دامك مبسوطه ماديا أما أنسان فقير يدور لقمة العيش يعمل عمل تطوعي هذا صعب يعمل بدون أجر
في امريكااا واستغربت هالشي بصراحه تحدثت مع كذا شخص متطوعين في الاعمال رغم الشهادات والمكان الاجتماعيه وحتى لو حبيتي تعطيهم اكراميه البعض يرفض يقولك انا مو محتاج انا في عمل تطوعي ليه بجد ليه هذا السؤال اللي كان يراودني ؟؟؟
أنتي قلتيها بنفسك تطوعي عشانه مو محتاج أكراميه
عن نفسي انسانه ماديا مبسوطه على الاخر والله يديمها من نعمه
خلاص ياحبيبتي أعملي عمل تطوعي دامك مبسوطه ماديا أما أنسان فقير يدور لقمة العيش يعمل عمل تطوعي هذا صعب يعمل بدون أجر
في امريكااا واستغربت هالشي بصراحه تحدثت مع كذا شخص متطوعين في الاعمال رغم الشهادات والمكان الاجتماعيه وحتى لو حبيتي تعطيهم اكراميه البعض يرفض يقولك انا مو محتاج انا في عمل تطوعي ليه بجد ليه هذا السؤال اللي كان يراودني ؟؟؟
أنتي قلتيها بنفسك تطوعي عشانه مو محتاج أكراميه
الصفحة الأخيرة