اليكم قصة ولادتي(الم+ صراخ+ رومنسيه )

كيفكم ياحلوات؟؟؟؟؟؟؟
بحكي لكم قصة ولادتي اللي كنها فلم هندي :)
وعقبال كل الحوامل يحكون لنا قصصهم
ويارب ترزق كل محرومه بالخلف الصالح يارب

القصه تبدأ
اليوم: الاربعاء الماضي
التوقيت: المغرب
المكان: كنت اتصفح عالم حواء

مثل ماقلت كنت قاعده اتصفح ملف حوامل الشهور الاخيره بموقعنا الحبيب عالم حواء
كانت وحده من البطوطات في الملف داعية لي دعوه حلوه ان ربي يسهل لي ولادتي ويسرعها لانها نصحتنا بعدم الاكتئاب في الشهر الاخير وانا قلت لها اني اليوم اللي قبله صحيت الصباح لقيت شويه مويات نازله وبغيت اكتئب بس ما اكتأبت :)
عاد هي حبت تكافئني بهالدعوه الله يجزاها الف خير
حبيت اني ارد عليها
وفجأه وانا اكتب لها الرد جاني الالم قلت عادي الم ويروح اصلا باقي لي اسبوع على موعد الولاده
بس الالم قعد يزيد ويزيد
ويروح ويجي
وشوي صار منتظم كل 10 دقايق
عاد انا قلت مدام صار منتظم مابدهاش اكيد الليله بعملها
اتصلت على زوجي وجاء بسرعه وانا مابعد جهزت اغراضي بس مجهزه اغراض البيبي لاني كنت اظن اني بكمل الاسبوع
وبسرعه نزلت السياره واحنا ماشين في الطريق تذكرت اني نسيت الحلتيته اللي شريتها مع مجموعة اعشاب عشان تسهيل الولاده :eek:
قلت لزوجي بسرعه ارجع البيت جب لي الحلتيته
ورجعنا وطلع يدورها مسكين ماعرف شكلها وانا في السياره اكلمه في الجوال اوصف شكلها وريحتها له وهو مرتبك ويقول اصلا انتي فاتحه في الدولاب محل عطاره كله اعشاب
بعدين قلت خلاص تعال مو لازم حلتيته
مع اني متحسفه عليها هي وكف مريم اشتريتهم مااستخدمتهم :09:
المهم في الطريق الطلق يجي ويروح وكل ماجت الطلقه اعد من واحد لعشرين عشان انسى الالم
قلت لنفسي ليه مااستغفر عشرين مره احسن من العد وصرت كل ماجت الطلقه استغفر واسبح الله
فعلا ذكر الله يطمن القلوب يلهي عن الالم
وصرت ادعي لثنتين من زميلاتي ان ربي يرزقهم الذريه الصالحه وادعي لكم يا بنات المنتدى
وزوجي مرتبك ويقول ادعي لنفسك اول وبعدين ادعي للناس :(
وصلت المستشفى وكشفت الدكتوره قالت الرحم مفتوح 2 ونص
وطلعت قسم الولاده وانا حاطه ببالي اني اصارخ مدري ليه جتني نوبة صراخ
وكل ماجت الطلقه صرخت
اعطوني اكسجين عادي صحت عليهم ابي الاكسجين القوي
اعطوني الاكسجين القوي والحمد لله خفف الالم كثير بس مدري ليه اصارخ كل ماجت الطلقه
وبعد تقريبا ساعتين زاد الالم وقالت الدكتوره يالله ولاده
ووقت طلوع الراس خففوا الاكسجين قمت اصارخ عليهم اكسجين اكسجين اكسجين
وعشان يفتكون من شري زادوا كمية الاكسجين ورحت كأني في غيبوبه كأني في مركبه فضائيه تلف بي
صحيت بعد الولاده والدكتوره تخيطني قمت اصارخ مع اني مااحس بألم بس مدري ليه حاطه براسي هالمره اطلع طاقة الصراخ اللي عندي كلها :30:
الدكتوره تقول خلاص خلصنا ليش تصارخين؟؟؟؟؟؟
بعدين سكت :)
الولادة كانت سريعه مااخذت وقت كثير الساعه 10 بالليل كنت والده
بس وقت طلوع الراس ووقت ماخففوا الاكسجين الم فضيييييييع
الله يكتب لنا الاجر ان شاء الله

اكيد تقولون شفنا قصة الالم وقصة الصراخ وين الرومنسيه؟؟؟؟؟؟؟؟؟

انا اقول لكم :)
لما طلعت قسم التنويم ماجاني نوم قمت كتبت مسج( ابشركم الحمد لله ولدت بالسلامه )
وارسلته لزميلاتي ومعارفي ماخليت احد يعتب علي <<<<<<وحده فاضيه :)

وفي الاخر تذكرت ان اليوم اللي ولدت فيه 14/3 بالهجري يوم الاربعاء
يوافق ذكرى زواجي اللي كانت كمان يوم الاربعاء 14/3 قبل ست سنوات

قمت كتبت مسج الساعه 1 ليلا ( زوجي الحبيب بمناسبة ذكرى زواجنا اهديك احلى عروسه تتربى بعزنا يارب ) :)

وبس
على فكره بنوتتي سميتها ( وسن ) وش رايكم بالاسم؟؟؟؟؟؟؟؟