الين متى السكوت كللش ولا مخباتي

من حرتي أبدخل بالموضوع على طول بدون مقدمات

++++++++++++++++++++++++/المشرفة مين يبي يتجر على حسابنا يطب ويقحش من فليساتنا ونحن لا حول لنا ولا قوة : ( ارتفعت اسعار الخضار وحنا مالنا حيلة ساكتين بس نشتري من هالطماط وخلافه ونطمعهم فينا أكثر يعني لحد يقنعني ان الزيادة في الأسعار بسبب الاقتصاد العالمي و وحرب العراق والإرهابيين وانهيار سوق الأسهم ((((((((
لحد يقنعني ان الجوال أبو عشرة الآف كان سعره بسبب تكلفته على شركة الاتصالات ولا بسبب تأثر أسواقنا بالأسواق العالمية ولا وولا وولا مستحيـــــــــــل التعريف الوحيد لهذه الحالة هو الطمع وليس غيرة الجشع والاستغلال من تجارنا وهواميرنا اللي ماغناهم بعد الله غيرنا ( ملاحظة : لحد يقول ذي أفكار اشتراكية شيوعية لا بالعكس بس الربح المعقول مايزعل احد ,,,,, وكل واحد وشطارته ,,,,, بس الطمع قل ماجمع )

ومن الجوال الين الإيجارات ويا قلبي لاتحزن (( الهوامير انسعروا زادو الاجارات الفين وسكتنا همن زادو الفين وهش ولا صوت هميينن زادو بعد الفين وحنا ماغير نكع من هالدريهمات وساكتين ونفرغ هالكبت على اهالينا وعيالنا والله العظيم ظلم وشي مايرضي الله

حسبي الله ونعم الوكيل عليهم الله لا يربحهم ...... يصرفون قروشنا انشالله على الحكمااا انشالله\
الله لا يبيحهم ولا يحللهم كرهونا بعيشتنا على قولة السيدة الفاضلة اللي بالاخبارية : صارت الحياة عندي متساوية 

كل شي ارتفع السيارات ارتفعت أسعارها وبترتفع زود سيارة عائلية يابانية ب 160 مدري 180 ألف ليش ؟؟؟؟؟؟؟؟ اشتري لعيالي جمس أحلى وارخص إيه وش خلى الأسعار نار غير سكوتنا عليهم يعني مستعدين ندفع ونحمل أرواحنا أقساط ولا نقولهم لا ونترك سياراتهم بمعارضهم الين تصدي لو اتفقنا وتكاتفنا وقاطعنا المعارض لمدة شهر بس والله إن يصيحون صياح الأم الثكلى  ترى ماقلت لا تشترون سيارات قلت بس اصبرو شهر رجيم وتسوون وصيام وتصومون واهلكم واصدقائكم اذا زعلتو عليم تقاطعونهم شهر وشهرين وحتى سنين طيب قاطعوا الوكالات والمعارض شهر بس وإذا مانفع بعد أربع أو خمس أشهر نقاطعهم زود شهر
ونوريهم إننا مانسكت على الجشع والطمع ومحناب سهلين و إننا حنا المسيطرين على السوق مهب هم حتى يخضعوا لإرادة الشعب الصامد 
ماقلنا لاتشترون هايلكس بس اجلو لمدة شهر ( اللي هي فترة المقاطعة ) .

واللي قلناه على السيارات ينطبق على الجوال وموبايلي ماقلت لاتكلمون كلمو بس لاتستخدمون رسايل لمدة 24 ساعة
( وكأني أرى جميع القنوات تصفر وأشرطتها واقفة هع هع هع )

قاطعوا سوق الماشية لمدة شهر بس ياولله انهم بيصيحون صياح
شفتوا سهله بسيطة خالص خالص
لا تخافون أو تعيجزون ترانا نقدر عليهم بشوية تكتيك ترا السالفة يبيلها واحد يبداها وبس
لاترحمون ذا التجار ترا مادرو عنكم ولا جابو خبركم همهم قروشكم والا انتم بقريح
وش نقاطع بعد وش نقاطع.....؟؟؟؟؟؟؟؟؟؟؟؟ هاه ؟
( تراي بديت احلم احلام يقظة تكون الديرة رخيصة ورخا والراتب ماينصرف الا نصفه هذا اذا كنا مرة مسرفين )
أجهزة الحاسب والجوالات ( عاد ذي لحاله له باب وجواب )
اصبروا لا تغيرون جولاتكم لمدة شهر بس انت ياللي نويت تشتري جوال هالحين اصبر شهر مهب ضارك ولاهو مخرب برستيجك واللي يقول جوالي انكسر أنسرق طاح بالماء اقوله طللع المسكت ولا الرهيب اللي بالدرج فترة بسيطة اللين ندق خشومهم ونفقرهم شوي بعدين نفك الحصار واشتر اللي تبي وكذلك الاب توبات
منها تأديب للتجار ومنها ترويض للنفس البشرية على الصبر والتحمل والمعاناة
يعني الواحد أو الوحده مايصير يطيع هواه ويشتري شين يبيه مره وحده قل لروحك لا جرب وماراح تندم راح تكتشف انك إنسان واعي يعرف مصلحته وين ويعرف انه هو كمواطن سعودي هو الأساس وهو اللي يتحكم بالتجار والهوامير مو العكس هو اللي يحدد احتياجاته ماهي ؟ وهو اللي يفرض سعرها أو حدود سعرها على الأقل ولا مب لازم يشتري خل سلعهم تقعد بحلوقهم هذولا التجار لا تأخذنك بهم شفقة ولا رحمة اصلاً لو كان عندهم ذرة احساس بالوطن او بالمواطن ماكان رفعوا الأسعار دبل وادبال علينا عشان ايش عشان عمايرهم وقصورهم وشاليهتهم
( والتجار بحد ذاتهم لهم عندي موضوع لحاله بس مب الحين شوي قدام )

ختاماً أقول معليش استحملوني ترى ذا والله من القهر اللي فيني واللي كتبته هنا غيض من فيض وفي جعبتي الأكثر
و اطلب من الجميع آراءه لأنها تهمني وتلهمني وشكراً