!!اليوم انصـــدمت بصـــــديقتـــي وامهــــــــا!!

ابقول لكم المشكله من طقطق للسلام عليكم وانتم احكموا
لان رأيكم يهمني وقلت لازم اشوف وش تقولون


صديقتي من اربع سنين تزوجت من كم شهر وبعد زواجها اتصلت على امها بسلم عليها واسأل عنهم
امها قالت لي: ودي انك تدورين لي احد يشتري فستانها ولا يستأجره لاني متسلفه فلوسه وودي ارجعها
قلت لها: ابشري بدور لك
من حوالي شهر
وحده هنا بالمنتدى طلبت مني الفستان وقلت لها تعالي للبيت شوفيه
جابته صديقتي لي يوم الاثنين الظهر
وراسلت البنت انها تجي تشوفه لاني بروح مدينه ثانيه يوم الثلاثاء العصر
البنت ماردت علي بالرسايل الخاصه وماجت تشوفه
انا سافرت واتصلت علي صديقتي قالت نبي الفستان لان فيه وحده بتشتريه
قلت لها والله انا برا المدينه وحتى زوجي ومافيه احد عنده مفتاح البيت عشان يعطيكم الفستان
بعدها بكم يوم رجعت للبيت وكلمتها قلت خليهم يجون ياخذونه قالت ماعندهم اليوم سياره بكرا بيجون ياخذونه
ثاني يوم جت اختها واخذت الفستان(صديقتي بعد ماتزوجت راحت لمدينه ثانيه)

قبل امس
اتصلت علي صديقتي وقالت لي: ان الفستان فيه وسخ ومشقوق
وقالت لي: احلفي بعيالك انك ماأجرتيه وماعطيتيه احد
قلت لها :احلف لك بربي مو بعيالي اني ماحركت الفستان من مكانه من يوم جبتيه الين جت اختك واخذته
حتى الغرفه اللي فيها الفستان مادخلتها من طلعتي من عندي

قالت لي: انا مصدقتك بس عشان اهلي يرتاحون خليتك تحلفين
انا ماصدقتها قلت شكلها هي شكت اني أجرته

امس ارسلت لي وسائط فيها صورة الشق وصوره الوسخ
وارسلت رساله قالت فيها
هذا اللي ماتلبس!
بس من حلف بالله فصدقوه

انا حسيت بشي من الرساله بس قلت ماابي اظلمها وازعل اقول انتي شكيتي فيني
وكلمتها اليوم الظهر وكانت تكلمني عادي جددددددددا


بالليل الساعه 12ونص
اتصلت علي امها
واول مارديت قالت لي: هي كلمه وحده ابيك تقولينها
انتي أجرتي الفستان لاحد ولا اهديتي وحده تلبسه وترجعه

قلت لها اولا تتوقعين مني هذا الشي؟؟
قالت ايه اتوقع منك
وانتي اول وحده بهالعالم اتوقع منك هالشي
قلت لها مدام انك تتوقعين مني هالشي ليه قلتيلي من الاصل اني ااجره ولا ابيعه

وقلت لها انا الحمد لله مو محتاجه فلوس عشان ااجره واخذ فلوسه
اهلي والحمد لله بخير ونعمه وانتي عارفه هالشي
قالت وزوجك
قلت زوجي حالته الماديه جدا كويسه ومو محتاجين
وسبت بأصلي مع انها من نفس الاصل
وقلت لها اللي تسبينهم اهلك ولا حنا الحمد لله مو كذا

قالت عساك تشوفينها بعيالك وجعلك تفقدينهم الاثنين عشان تعرفين ان الله حـــــق

وقفلت السماعه على وجهي

ويوم جا زوجي من برا خليته يتصل على زوج صديقتي وقال له كل شي
وقال زوج صديقتي ان صديقتي تقول انها يوم طلبت الفستان مني تهربت وماعطيتها على طول
واني ماحلفت اني اجرته
وقال له مو مبرر انه ماطلعت حتى من الغرفه اللي هو فيها الا يوم جت اختها تاخذه

وش رايكم بهالصديقه؟؟
وامها اللي ماتوقعتها ابدا كذا..وحده بهالعمر تقول كلام مثل كذا
وعندها عيال وتدعي على عيالي
حتى لو انا اجرت الفستان او سويت فيه اي شي ماتروح تدعي على عيالي

وارسلت رساله لصديقتي وكتبت لها احلف باللي مايخليني اعيش لبكرا اني مااجرته ولا عطيته لاحد ومو محتاجه ريال واحد عشان ااجره ومااقول لكم
وماتوقعت من امك الكلام اللي قالته وانها تدعي على عيالي
وعلى العموم مااسامحكم ليوم الدين وخسارة الصداقه اللي كانت بيننا


ياليت اشوف ردودكم لاني من جد مقهوووووووووووووووووووووره :( :( :(