الي تحس ان وزنها يزيد مع ان اكلها قليل تدخل

السلام عليكم بنات
السبوع الى فات كان عندي موعد مع الدكتور
المهم وزنتنى الممرضه وكتبت وزنى فى الملف
ولما رحت للدكتور طالع فى تحاليلي قال لازم تزيدين كلك لان عندك فقر دم
وعطانى فتمينات وقال تعالي لى بعد اسبوع
انا طبعا مازدت فى الاكل لكن صرت اكل زي الناس العاديين ويمكن اقل منهم بعد
بعد تقريبا 8 ايام رحت للدكتور
ولما وزنتني الممرضه انفجعت وجلست شوي تطالع فى الميزان
وبعدين نادت الدكتور والدكتور نفس الشي كان مستغرب
لانه وزنى زاد خلال 8 ايام خمسه كيلوا
انا طبعا ماكنت مستغربه لانى متعوده اذا كلت عادي زي الناس اسمن على
طول
لما قلت للدكتور انه عادي انا كذا من زمان
قال لا مهوب عادي انتى اكيد عندك مشكله مامر على احد يزيد بهذي الطريقه
احنا لازم نشيك على الغدد قلت له اذا الغده الدرقيه
انا عندي مشكله واخذ علاج اما باقي الغدد كشفت عليها والحمدلله سليمه
قالى خذي موعه نبي نبحث الاسباب الثانيه
انا عاد من رحت منه حسيت براحه على الاقل فيه احد اخيرا حس فينى
طبعا انا من طلعت من عنده وانا ابحث فى النت
ومن ضمن الاشياء الى مرت على ان الانسان ممكن يكون عنده حساسيه من بعض الاطعمه وهذا يثير جهاز المناعه
ويسبب احتباس فى الماء فى الجسم ومشاكل ثانيه
طبعا قالوا ان فيه تحليل دم يعلمك ايش الاشياء الى جسمك يتحسس منها
مثلا القمح او بعض الفواكه او الخضار او حتى اللحوم

الى انا ابيه منكم يلي تعانون من نفس المشكله يعنى يكون اكلكم اقل من الناس العاديين وبعد تسمنون
ان احنا نتعاون لايجاد حل لهذي المشكله يعنى نسوى ورشه عمل
كل وحده تدور فى مكان الى يدور فى النت والى يسال دكاتره والى يسال مختبرات وخلونا نجيب النتايج هنا
لان الصراحه انا تعبت من الرجيمات راح عمري والله رجيمات ماعمري تهنيت باكل وفوق هذا كل شي يسمني
يمكن هذا الموضوع ينهي معاناتنا الى الابد ان شاء الله
وربعا تعاونوا ماذلوا
انا بروح للدكتور مره ثانيه وبساله عن التحاليل وبخليه يسويها لى
واي شي بتوصل له بجي اكتبه هنا
واي معلومه تتوصلون لها اكتبوها يمكن تكون هي المفتاح ان شاء الله للخلاص