الي تروح الأندلس مول بجدة تجيني هنا أبغاها في موضوع

السلام عليكم ..

في حاجة قاهرتني مرة في هذا السوق والي تعرف المول هذا وتزوره باستمرار حتفهم قصدي وأكيد عانت من نفس الموضوع
أنا ساكنة قريبه منه وأزوره باستمرار وأكثر أغراضي أشتريها منه وذلك من سنوات ،،
الموضوع ومافيه المول يوجد فيه مصلى للنساء ومصلى للرجال...

النساء مصلاهم بعيد عن ملاهي الأطفال ، وهذه بحد ذاتها سلبية غبية لأن أغلب النساء مع أطفالهم يعني صعب تجرجرهم معاها للمصلى لكن لو المصلى في الملاهي بيسهل عليها كثير و لو هم أكثر من وحدة يتناوبوا وحدة تصلي والثانية تمسك الأطفال وهكذا خصوصاً المرأة مو واجب عليها صلاة الجماعة

طبعاً أكثر من مول أو ملاهي شفتهم مصلى النساء قريب أو في نفس الملاهي يعني وضع طبيعي وممتاز..

المهم فيه صالة تزلج في نفس الملاهي بجنبها ركن للبس أحذية التزلج وكان فيه سجادة يبدو ان العمال في الملاهي يصلوا فيها..
أنا كنت في البداية أصلي في هذا المكان لأني ألقاه فاضي.. وكان مستور ومكان مثالي لأن يكون مصلى نساء .. بس لو وضعت سجادة كبيرة ولوحة مكتوب عليها مصلى النساء..

لكن للأسف احتكروه الرجال والعمال كسلاً تركوا المصلى الموجود في المول وتركوا المول بكبره ليصلوا في هذا المكان... كانو أفراد في البداية.. ثم صاروا يصلوا جماعة!!! ناقصهم بس مكرفون ماشاء الله!!!

في البداية قبل لايتطور الوضع لهذي الحال كنت لازلت متمسكة في المكان وأصلي فيه قبل لا أعرف ان الرجال ماشاء الله احتكروه.. فمرة صليت.. وتفاجأت الرجال منتظريني برا يبغوا يصلوا !! خلصت صلاتي بسرعة وخرجت وأنا محرجة!!

طيب اسألوني وضع الحريم كيف ؟

الحريم طبعاً مع الوقت استثقلوا الروحة للمصلى الي قلت لكم بعيد.. صاروا يصلوا في الملاهي في كل مكان يفرشوا ويصلوا.. عند المطاعم.. عند الملاهي .. برة دورة المياه.. عند مدخل دورة المياه.. ايوة والله لاتستغربوا.. أنا ماقلت حرام مدام مكان طاهر بس مقهورة موت يعني عاجزين يضبطوا مكان محترم للصلاة في الملاهي!! وانتوا يالحريم عاجبكم وضعنا!! يعني مافي حل!! حتقولوا روحي طيري أي مول ثاني بقولكم ممكن بس ودي أهزأ و أقول لإدارة المول الي في قلبي وبكيفهم انتو ايش رايكم ايش نسوي!! هل ممكن نسوي تغيير ايجابي!! ياهوو بس نبغا ساتر وسجادة ولوحة مصلى النساء والله وضعنا مرة غلط !!

وأنا صرت أروح المصلى أضرب مشوار بس ولا البهدله لكن ساعات أستثقل والله وأصلي أي مكان

آخر مرة لقيت الحريم يصلوا عند المطاعم صليت جنبهم خلصوا وبقيت أنا وحرمة فتح المحل و جوا الرجال يطلبوا أكلهم يميننا وشمالنا واحنا نصلي!!! آآآآخ خلاص انقهرت

انتو عارفين هذا السوق زي بيتي الثاني ومتعودة عليه من سنييين تماشينا ومقاضينا كلها فيه عشان قريب بس خلاص ناوية أقاطعه لين يضبطوا الوضع بس ببرد قلبي وأهزأ الإدارة بس ياليت زوجي يرضا ماخد الموضوع عادي

مافي رجال عنده نخوة وحياء يجي يقول ياجماعة مايصير خلو الحريم يصلو هنا واحنا نروح مصلى الرجال هو صح بعيد بس بكيفهم واجبة عليهم صلاة الجماعة احنا ربي رفع عنا الجمعة والجماعات عشان المشقة والأولاد

بالله قولولي أنا مبالغة ؟أحد حاسس بشعوري؟إذا ايوة فهموني ايش نسوي؟أكتب خطاب ؟أفكر اكتب ورقة والصقها على المكان.. يمكن يستحوا شوية