بنات لما يطلبون السجل الاكاديمي يدققون على التربية العملي؟؟؟؟؟؟

لان انا في سنه رابع جبت فيها مقبول لاني تركتها وعدتها السنه اللي بعدها

هل يستبعدوني ؟؟ولا ماينتبهون له؟

بليز ردو وقولو لي اش سوو في السجل

حبيبتي مايدققون بالعلامات
اصلا قالت لي انهم الغوا السجل مو مطلوب
بس انا اخذته لان شهادتي من مؤسسة خارجية
دام ترشحتي مايستبعدونك
انا تقديري العام مقبوووول لانه تراكمي
السنة الرابعة جيد جدا بس السنين الاولى مو في التخصص اللي ابي فالعلامات خفستني
سويت مقابلتي واموري مشت

كنت شايله هم من لا شيئ ولله الحمد
كانت روتينية وسهلة

اهم شي الثقة بالنفس وعدم التردد في الاجابات

ياقلبي انتي

الله يسعدك يارب ويريح بالك مثل ماريحتيني

السلام عليكم
امس كانت مقابلتي بالشرقية قسم دراسات من كليه اعداد المعلمات

قبل ما اقول كل شي انصحكم يابنات تروحون قبل الموعد بكثير يعني انا موعدي كان الساعه 5 ورحت 3 وخلصت 6 ونص يعني راح تتاخرون

بالبداية حطونا بقاعة كبيرة ووزعوا علينا 5 اوراق نعبيها وفيه مشرفة تبدأ معانا تعبي خطوه خطوه وماراح تلخبطون بس ركزوا معاها

وبعد كذا طلعنا من هالقاعه وتوجهنا لفصل في كثير موظفات كل وحده على طاوله وقدامها كرسي عشان كل وحده تمسك بنت وتطابق اوراقها من شهادات ودورات وكل شيء عندك جيبيه ومن كل شي 3 صور وتطابق معاك الاوراق وبالاخير تعطيك ملفك تاخذينه معاك للمقابله وياخذونه منك هناك
غرفة المقابله فيها كان مجموعه يمكن 6 او5 مومتذكره بس كل ثنتين مع بعض وقدامهم كل وحده منهم كرسي وحده تكتب بياناتك وتسال الاسئلة التربويه وبعدين الثانيه تسال بالتخصص بس بصراحه كانوا حبوبات ونصيحه للي مو جريئة مثلي اكسبيهم بابتسامتك وربي بيسرها

بالنسبه للاسئلة كانت كالاتي
اول شي كم لك متخرجه وهل توظفتي قبل ومن هالكلام وقمت اقول لها وانا مبتسمه لي 8 سنوات منذ مبطي قامت تضحك قالت احمدي الله انتي احسن من ناس واجد لهم سنين
وتوظفت مرتين حكومي كبديله
قالت من خلال تدريسك هل صادفتي موقف طالبه ممتازه عندك بس من حماسها تجاوب من غير ماتقولين لها قلت لا قالت طيب لو حصل وش تسوين قلت انبهها مره مرتين وبعدها اعاقبها مااقومها على اي سوال عشان تبطل تسوي كذا قامت تضحك ماتت علي من الضحك بس بنات لاتجاوبون مثلي انتبهوا تجيبون طاري عقاب بس انا زل لساني وتوهقت بس مشتها
قالت طيب لو كلفتك المديره بنشاط اضافي تقبلين قلت ايه عادي اصلا انا كنت ماسكه نشاط مصلى
بعدها سالتني عن الوسائل اللي كنت استخدمها في دروسي مع طالباتي قلت اكثرها عروض بوربوينت
قالت كيفك مع الحاسب قلت عندي دبلوم حاسب واعرف لكل شي فيه ولله الحمد
سالتني وش تعرفين عن اخر الاحداث اللي صارت قلت مجزرة اطفال سوريا قالت وش موقفك قلت احنا نتمنى نسوي لهم كل شي لكن اللي نقدر عليه هو الجهاد بالمال والدعاء ونسال الله ان ينصرهم نصر عزيز مقتدر
قالت ممتاز
وبعدها سالتني الثانيه في التخصص خلتني اقرا اية الكرسي وسالتني معاني كلمات العروة الوثقى لخبطت ماعرفتها قلت العقيده الصحيحه قالت صح هي الشهاده يعني حورتها لي ماقالت خطا وسالت عن معنى الطاغوت قلت الشرك وبعدين قلت لا لا الشيطان قالت صح وهي تضحك وبعدها سالتني عناحكام تجويديه فيها مثل المد في شاء مد واجب متصل
وحكم من علمه اظهار وحكم كلمة ثانيه نسيتها كانت ادغام
وقالت خلاص الله يوفقك وقالت لي روحي لغرفة الكشف واخذت الكشف وورقة البنك وكتبت لي مركزاللياقه بالخبر بس توني اقرا اللي كتبتوه عن تحليل المخدرات والله توهقت مدري وش اسوي :(

بنات فيه شي مهم بقوله لكم تدرون هالمقابلات صدق فعلا روتيني والكل باذن الله مقبولين وانا اقولكم ليش

لما كنا باول غرفة اللي عبينا فيها الاوراق سالت وحده من البنات المشرفه قالت انا لي 18 سنة متخرجه ومعلوماتي تبخرت قالت اذا مااجتزت المقابله بيطردوني قالت لها لا ماراح يطردونك راح يعطونك فرصه ثانيه قالت واذا مااجتزتها قالت لا انتي قدها وراح تجتازينها كل تياسير لا تخافين فعرفت انه الكل مقبولين باذن الله وهالشيء روتيني بس:)


عموما هذي مقابلتي بالتفصيل والله يوفقكم جميعا يارب وييسر لكم كل خير ويعطي كل وحده ماتتمنى


وصلى الله على نبينا محمد

الله يسعدك ياارب ويوفقك ريحتينى بكلامك الله يريحك باالجنه يارب ومن قال امين