هلا اختي
بالنسبة للغيل سهل لكن يحتاج حرص منك واذ كنتي متكيسلة خليه لحد ما تروقين لأن خلط الغسيل مع بعض يخرب لك قطع حلوة وثمينة وانت اللي بتتحسرين عليها.. هذي بعض النصايح اتمنى تفيدك..
الملابس البيضاء
اهم شي تنقعيها بالماء الدافي والصابون .. طبعا انتي شغلي الغسالة وخليها تعبي لك الحوض ماء دافي بعدين حطي الصابون وعلى نصيحة البنات اما اريال او تايد وخلي الغسالة تلف شوي لحد ما يختلط الصابون بالماء بعدين طفيها وافتحيها وحطي كل الملابس البيضاء واغمسيها بيدك وسكريها وخليها نص نهار او ليلة او اذا كنتي مستعجلة ساعة او ساعتين وبعدين شغلي الغسالة وخليك ملاحظتها اذا فرغت الموية والصابون وقفيها وطلعي كل الملابس البيضاءبعدين خليها تعبي لك موية الشطف واثناء ذلك حطي اللينور او الملطف اللي انتي تستخدمينه واذا كانت الملابس من النوع اللي تتنيل حطي النيلة وخلي الغسالة تلف عشان تختلط الموية باللينور والزهرة بعدين وقفيها ورجعي كل ملابسك البيضاء وخلااص خليها لحد ما تخلص.. مهم انك تطلعين الملابي البيضاء قبل ما تحطين اللينور والنيلة عشااااان ما تتبقع معك...
اما الملابس الملونة اعزلي الالوان على درجتين او ثلاث حسب غسيلك فاتح وسط غامق
الفاتح(سماوي بيج اصفر زهري فاتح....)
وسط(سماوي غامق بيج غامق اخضر ....الخ)
غامق( كحلي. اسود .زيتي. جينز...)
الوان فاقعة(فوشي احمر برتقالي ....)
كل درجة تحطينها لحالها ودائما استخدمي الماء البارد لها ليش؟؟؟لأن المويه الحارة تتسبب بتحلل الالوان واختلاطها وتشهب الملابس.. واغسيلها عادي بدون نقع لكن قبل تحطين اللينور طلعيها وحطي اللينور على المويه وخليه يختلط بعدين رجعيها .. لاتحطين اللينور مباشرة على الملابس والا ترا بتطلع لك بقع زي الكلور ..
واغسلي الالوان الفاقعة دائما لوحدها حتى لوكانت قطعة وحدة لأن هالقطعة اذا حطيتيها مع اي مجموعة بتخرب وتخرب لك باقي ملابسك..
ونصيحتي لك لتوفير الكهرباء بالنشافة اذا كانت الملابس قليلة اجمعي غسلتين او ثلاث مع بعض بالنشافة فقط لآن النشافة تستهلك كهرب كثير
طبعا ملابس الصوف دااااائما تغسل باليد
واللينين دائما على اخف درجات الغسيل لأنه ما يتحمل واذا كان اللينين ابيض انقعية بالماء الدافىء والصابون
اذا كانت الملابس فيها بقع دم احذري تغسلينها بماء حار لكن نقعيها بفانيش السائل واقري التعليمات على العلبة وطبقيها بحذافيرها
اي قطعة قبل تحطينها بالغسالة اقري تعليمات الغسيل عليها بعضها ما تتحمل النشافة وبعضها غسيل يدوي وهي قطن يعني ما تدرين كل قطعة ولها تعليماتها
واحذري تغسلين المناشف مع الملابس لآن المناشف يطلع منها كور زي المنديل اذا نسيتيه بجيب احد الملابس يحوس عليك الغسيل كله
واحذري تغسلين المناشف الغامقة مع الفاتحة لآنها بتطلع لك كور قطن وتخرب المنشفة حتى لو كانت اصلية
فيما لو صار مع الغسيل منديل ما انتبهتي لها حطي الغسيل بالنشافة والهواء
الحار راح يفصلها لكن اول ما تطلعينها نفضيها قطعه قطعة وهي ما زالت حارة.... ونضفي الغسالة والنشافة من قطع المناديل قبل استخدامها مرة ثانية...
العبايات والتنانير السوداء اغسليها بشامبو خاص بالعبايت وحطي لها لينور بموية الشطف عشان يعطيها نعومة ورائحة حلوة وايضا ما يخلي العباية تقش من تحت (تجمع قشاش ) فهمتي قصدي؟؟
واكويها وهي مقلوبة عشان ما تطلع تلمع بعد الكوي..
هذا اللي عندي الان واي سؤال انا بالخدمة ..
ترى الغسيل سهل لكن كثر الحكي والكتابة مخليته صعب لكن انا حاولت اكتب بالتفاصيل لأن المبتدئة دايما تخربط.. والله يعينك..وادعي لي انا وزوجي ننجح ونخلص هالغربة على خير....
mam Iam
•
شكرا لنصحائحك المفيدة حبيبتي mam Iam الرائعة قرأت في المنتدى أنه ممكن بدل النيلة (لأنها تعدم الملابس خصوصا للتي لا تعرف استخدمها )اضافة الخل أو بيكربونات الصوديوم , انا فرحت للمعلومة هذه لاني أكره النيلة مرة واستخدم لغسيل الابيض بونكس او اومو والحمدلله ملابس لونها حلو حتى زوجي مبسوط منه بس لازم كل فترة وأخرى أحط قليل كلوركس.
الصفحة الأخيرة
ههههههههههههههههاي