السلام عليكم
مبارك عليكم الشهر
مادري شو ياني اليوم وانا قاعدة في الدوام قلت خلني اكتب لبنات حواء فديتهن الاشياء الي مرة علي والحمد لله خلصت على خير ’
امممم انا عمري 23, تزوجت كان عمري 14 مرة علي ضروف الله العالم بها لو وحدة عمرها 40 مكانت صبرت بس انا يمكن لاني كنت صغيرة واخاف ماكنت اتكلم, المهم تزوجت وسكنت مع في بيت اهلي انا ماعندي اخوان ولاخوات وحيدة امي الوالد متوفي يعني مالي حد غير الله عمامي وجدي ماعرف عنهم شيء من ماتوفى الوالد واخدوا كل الورث مقابل انهم ماياخدوني انا من امي لان امي الله يحفضها كانت تجهض وايد وانا الي خدتني من الدنيا قلت جي بس لاجل احطكم بالصورة لاجل تعرفوا الظلم الي شفته بحياتي وماعندي ظهر يحميني غير الله
سكنت مع امي وبدت المشاكل من اول يوم زواج الا بليله العرس خوالج لاتسلمين عليهم خالاتج ماتكلمينهم ليش؟ بعدج صغيرة ويلعبون بعقلج لبس لازم البس طوييييل وعريييض حتى في البيت ميكاب ممنوووع وياويلي ادا دخل على غفلة وحصلني قاعدة مع امي بنفس الغرفه يضربني لين اموووت وماقدر اطلع صوت ولا اخبر امي وصلت لدرجة يحط الملعقة في فمي لين يطلع دم من فمي ويهددني يقلع اظافري وانا من الخوووف ما اخبر امي ما ارقد الليل يخليني ارقد بالارض وايام الشتاء وهو راقد بالسرير وياويلي ادا غمضت عيوني كبرت المشاكل وقال بياجر بيت قلت اوك اقل شيء يمكن مايينى حد وهو يتعدل معي وياويلي ويلاه رحت للموووت بريولي ’ يطلع يسكر الباب بالمفتاااح وادا دخل البيت ادا حصلني بالمطبخ لازم اقعد بالمطبخ لين يفتش البيت كله وعقبها اقدر اطلع ماحد ييني البيت امي تيي يقولي ماتفتحين الباب اهله يجون ما افتحلهم الباب لين يي هو من الدوام اهله نااس طيبين وللحين علاقتي معاهم طيبة وامه تناديني بنتي وانا اعشقها لانها طيبة بمعنى الكلمة المهم حملت وفي وقت حملي شفت الويل من ضرب وتعديب ووووو الخ لدرجة ولدت ولادة مبكرة لانه ضربني لين ياني نزيف وبالرغم من جي قلتلهم بالمستشفى اني طحت من الدرج من الخوف رديت البيت وبروحي وبيبي وانا صغبرة ما اعرف اي شيء يوم تبكي بنتي يدق راسي بالجدار ليش ازعاج ضربها وهي عمرها 3 شهور واخيرا اكتشفت سر تصرفاته الريال يتعاطى مخدرات لدرجة قام ييبها ويقولي خديها معاي خلاص هني وصلت حدي وفكرت في بنتي كان وقتها عمري 16 وكانت نقطة النهاية الي هي بداية حياتي
جات امه وابوه يزورونا ووقت عشاء وانا اعرفه يوم يبى يسوي مشاكل وحسيت انه بيسوي مصيبة لانه مايحب حد يزورنا حطيت العشاء وقتله تعال بالعافية يانى الغرفة واحنا قاعدين ابوه يقولي كلي يابنتي ليش ماتاكلين مرررة وحدة قام وقلب الطاولة وسحبني من ايدي قالي شو بينج وبين ابوي قاعدة تخونيني معاه هو يبج ومن الكلام هدا كله انا ماعرفت شو ارد ابوه نفس ابوي الله يرحمه قتله خلاص بس اسكت ليسمعوك وهم ضيوفنا عيب قالي انا بخبرهم طلع وقال لابوه انت شو بينك وبينها ووووو الخ ؟ ابوه انصدم امه تصيح والساعة 12 باللليل لبست امه عبايتها ويبون يروحون انا قلت بروح معاكم دخلني انا وبنتي وسكر علينا باب الغرفه ابوه قال كلمة بصوت عالي وهو يصيح انا راضي عنج انتي وبتج لين يوم القيامة وابني متبري منه لين يوم الدين من 6 سنين للحين ادكرها
راحوا اهله خلاص انا قررت شو بسوي بس مابى ابينله لاجل مايضربن او يدبحني ويشل بنتي مني طلعت وقتله زين انهم راحوا انا اصلا ما ادانيهم خلينا نروح مدينة تانية نعيش فيها احسن لاجل نرتاح من اهلك واهلي هو انصدم متوقع اني بصيح ونضارب المهم مثلت عليه وقمت الصبح جهزتله ريوق وراح الدوام هو طلع من هني وانا البس والبس بنتي واشل دهبي وافتح باب البيت بحديدة كسرته خليت الشقة مفتوحة وطلعت ابا بس تاكسي لانه لو مسكني عادي يدبحني الحمد لله طلعت بتاكسي رحت بعت دهبي وطياران ع المحكمة رفعت قضيت طلاق ورجعت بيت اهلي اول مادخلت امي تصيح كانت ماشافتني 7 شهور خبرتها كل شيء اتصلت على خوالي وخبرت الشرطة وانه ممكن ييني بيت اهلي الحبيب رجع البيت ماحصلني اتصل يهدد اووول مرة اكلمه وانا مب خايفة منه واهدد بعد لدرجة قالي مب انتي الي قاعدة تكلميني لاني خلاص كنت بنفجر المهم بالطيب ماطعت ارجع بالغصب ماطعت ارجع لين موعد الجلسة وكانت الصدمة ان امه وابوه جايين المحكمة معاي واقفين ضد ولدهم وهدا الشيء ساعدني وايد اخر المطاف انحكم بالسجن سنة لاني اتهمته بالضرب وووووو وكنت على حق وهو اعترف وانحكم عليه ب 20 الف طلعت من المحكمة فرحانة وصلت البيت ورديت طلعت رديت المحكمة تنازلت عن القضية وعن الفلوس سالني القاضي ليش ؟ ( قتله عيب هو ابن بنتي بالرغم من كل شيء وباجر اصغر في نظر بنتي ان انا سجنت ابوها حتى لو انا على حق بتكرهني وغير عن جي باجر لو تقدم لبنتي حد وسالوا عن ابوها يقولون امها زمان سجنت ابوها مافيها خير ) رديت البيت وانا حاملة لقب مطلقة وبنت ومصاريف وهموم اول خطوة سويتها بعت باقي دهبي ورحت سجل في معهد اخدت دورة كمبيوتر وانجليزي وسكرتاريا واتش ار اي شيء جدامي سجلت فيه شغلت وقتي عقبها اشتغلت براتب يالله يالله يكفيني وبنتي لاني تنازلت عن نفقتها لاجل اخد البنت كملت دراستي وانتقلت لدوام ثاني براتب اعلى كل الناس مستغربين مني كيف قدرت ادرس واتوظف وانا الي كنت بس بالبيت الباب مسكر علي بس كل شيء كنت اسويه لاجل بنتي وامي
مرة الايام وبنتي بدت تكبر وطبعا مايسال عنها وكل شهر شهرين يبى بس يرجعني وانا ارفض لين قررت اكمل دراستي برا والحمد لله ربنا سهلها وسافرت مع بنت خالي وزوجها هي بعد كانت بتكمل دراسة وهي الي شجعتني والحمد لله تفوقت في دراستي واخدت شهادة خلال الفترة هاي صديق زوجها شافني مرة وحدة واحنا طالعين الشقة وهو بالسيارة مع زوجها وسال عني وقاله قصتي كاملة زوجها عقبها كترت جياته عند زوجها وسواله عني زوجها فهم الموضوع وخبر بنت خالي هي خبرتني طبعا انا ولا حطيت في بالي لاني كارهة شيء اسمه ريال المهم بدت تزززن على راسي بديت مرة افكر فيه مرة استغفر وافكر في بنتي وامي ومستقبلي لين مافتح موضوع الزواج مع زوجها رسمي وعلى اساس يوم نرجع البلد يرجع معانا ويخطبني رسمي من اهلي المهم ولا اهتميت لان قبله رفضت 3 من العايله هو الي غريب بوافق عليه اكيد لا وفي نفس الوقت شيء بداخلي يبااه . رجعنا على خير وياب عمه وعمته واخوه الكبير وخطبوني انا استغربت وين امه وخواته بعدين عرفت ان امه ماتباه ياخد وحدة مطلقة وعندها بنت وهو بعده صغير عمره 26 سنة سبحان الله استخرت وارتحت ووافقت لان اي وحدة تتمناه دين واخلاق وووساااامة وكل شيء والكمال لله بالمختصر احسن من الاول مليووووووون مرة في كل شيء
انخطبنا وبدت المشاكل امه كل يوم لاتتزوج لاتتزوج لدرجة طردته من البيت قاتله هي طمعانة في مالنا وتبى تاخدك منا ووووو الخ لانهم اغنى منا بوااايد ويروح المحكمة خطيبي ويتنازل عن حقه في الفيلا والشركة والمزرعه وراح لامه قالهاالحين بتبين البنت على اصله انا تنازلت لاخواتي البنات عن حقي في كل شيء الحين خلوني اعيش مرتاح خبرني بالموضوع وانا احترت قتله الي فيه الخير الله يجيبه وهاي امك والمفروض تسوي الي هي تباه قالي الي تباه سويته تنازلت عن كل حقوقي المهم وتزوجنا وكنت خايفة من التجربة والحمد لله ربنا عوضني عن سنين الحرمااان الي شفتها وعايشة معاه مللللكة من كل النواحي لدرجة احيانا احسد عمري اللبس الي عمري مالبسته لبسته معاه اماكن ماكنت احلم اروحلها رحتلها دلع في البيت لدرجت ملابسي يحطها بالغساله لاتتحركين لاتسوين شيء يساعدني في المطبخ وهو في الدوام يتصل يطرش مسجات انا مارد عليه لاني اكون مشغوله في الدوام او البيت يزعل هدايا ربنا عوضني عن الدهب الي بعته وزيااادة بعد بدل الشقة غرفة وصاله مع الاول الحين سكنت في فيلا الحمد لله يروح الدوام يرد بسررررعه يقعد عندي في البيت او نطلع مع بعض يوميا الي قبل الشارع ما اشوفه على 6 شهور يابلي خدامة اول ماقتله حاسة بدوخة يتحراني حامل :confused: بنتي شايلها على كفوف الراحة والله يابنات اني يوم اصارخ عليها انها يزعل مني ويواقعني هي تناديه بابا دخلها احسن مدرسة نفسيتها تعدلت وايد يحببببها بجنون احيانا احسها بنته امي ادا مارحتلها يطلع من الدوام يشلها يحطها عندي في البيت ويرجع دوامه الحمد لله كرييييييم لدرجة كبيرة الي قبل مع طليقي قسم بالله اني الدرهم نسيت شكله توظفت بوظيفة مررموووقة كل واحد يتمناها وراتبي عالي بس والله انه مايسال عن الراتب, يعني باختصار الحمد لله والشكر ربنا عوضني على العداااب الي شفته وانا صغيرة . امه بعد مادرت ان ابنها مرتاح واموره اوك اتصلت عليه وقاتله ابا ايي اتقهوى معاكم وخبرني قتله حياها تراها نفس امي وجاتنى البيت والحمد لله تصافت القلوب والحين انا عندها رقم واحد وخواته حبوني وااايد مافي طلعة ولا جمعه الا ولازم اكون موجودة وياخدون رايي في الصغيرة والكبيرة الحمد لله على كل حااال والحين اتريا بس متى احمل ادعولي يابنات الله يرزقني لانه كل شهر يتامل اني اكون حامل وتييني الدورة الله يعين
الخلاصة يابنات ياحبوبات
1- صلاتج والاستغفااااااااار ياما ليالي ما انام وانا قاعدة واستغفر وماطلب شيء غير الله يحفظني ويحفظ بنتي ويغفر دنوبي والصدقة ثم الصدقة انا الحمد يوم تزوجت كفلت يتيم من مهري وخليته هو بعد يكفل طبعا في زواجي الثاني اما الاول ماشفت درهم من مهري ؟ لاتسكتين عن حقج ولاضيعين عمرج على حد مايستاهل , خليج قوية واتمسكي بقرارج ورايج مهما كانت النتايج بالاخير الي الكسبانة , دراستج ثم دراستج الدراسة لاتفرطين فيها والوظيفة حتى لو مب محتاجة تنشغلين فيها بدل لاتجابلين ويه الريال ويكون شغلج الشاغل وتبدى المشاكل , عاملي الناس بحب تلاقين الحب
ادري طولت عليكم بس صدق واااايد ارتحت بعد ماكتبتلكم الله يرزق كل وحدة على قد نيتها ياااارب :35:
اسسسسسفه قصتي واااايد طويله بس كتبتها لاجل تعرفون المعانات الي عشتها وان بعد العسر يسر والصبر مفتااح الفرج يابنات
الله يوفقكم