الي موظفة او مبتعثة من غير زوجها او بعيدة عنه تتفضل

مرحبا اخواتي حابة أستشيركم وياريت تنصحوني
محدثتكم طبيبة متزوجة وعندي بنوته موظفة بدوام من 8 - 4 المساء و يوم في الأسبوع انام في المستشفى غير السفر للمؤتمرات كل فترة كرف وتعب ما أُوصِّف لكم والله.


حاليا جاتني فرصة وظيفة أكاديمية وبدوام قصير يومين في الأسبوع فقط بس مشترطين الابتعاث ولازم أوقع على تعهد بدا الشي مع قرار التعيين .


المشكلة ظروف عمل زوجي ما تسمح له يرافقني نهائيا يعني راح اضطر اسافر واترك بنتي عند ماما او اخد ماما معايا تمسك بنتي ويقعد هوا هنا لحالو 3 سنوات .


زوجي عمره ما كان ضد دراستي وشغلي من يوم ما اتزوجنا وهوا يشجعني ويدعمني وحتى لما كلمته عن موضوع الوظيفة الجديدة قالي أستخيري وانا معاكي في اللي تختاريه وممكن اخد اجازة كل فترة واجي عندك.
بس حاسة انه متضايق وما يبغى يتكلم وكمان صار نادرا ما يتكلم معايا ويفضفض لي زي زمان او نطلع مع بعض لانه اصلا مو لاقيني وصار يطّلع مع أصحابه كتيييير انا ما بشك فيه لا سمح الله بس بالنهاية هوا راجل وبشر زي باقي البشر وكل شي جايز.
انا دحين افكاري مشوشة وبين خيارين او نارين بمعنى أصح
الاول : اني اكمل في شغلي دا وأفضل في الدوام الطويل المتعب والمناوبات الى ما شاء الله وما أفضى لحياتي ابدا.
التاني : اني اقبل الوظيفة الجديدة واتغرب وابعد عن زوجي 3 سنوات وبعدها خلاص ارتاح وأتفرغ لنفسي ولبيتي .
طبعا قبل كدا فكرت اني اترك كل دا وأصير ربة منزل بس ماما زعلت واعتبرته ظلم لتعبهم فيا وإني ملزومة أحقق حلمها هيا وبابا وأصير دكتورة قد الدنيا فخيار اني اترك الشغل مستحييييييل ولا أنا ودي والله اليوم قبل بكرا.
اتمنى من كل وحدة فيكم مرت بتجربة زي دي او حتى تحط نفسها مكاني وتنصحني والاهم من دا كله تنصحوني كيف ارجع علاقتي بزوجي زي زمان لاني حاسة انو فعلااا زواجي بيتدمر مع الانشغال والبعد .
معليش طولت عليكم بس حاولت اختصر على قد ما اقدر .