الي تابع موايضعي يدري اني غثيتكم منزله موضوع ابي طريقه المحلى لاني بصراحه مااضبطه دايم قطع متكتله ادري انه مايبيل له شي بس مهنا سنع ولما ضبط معي اول من ذكرت اخواتي الغاليات والقهر اني ماصورت الخطوات لاني ماتوقعت يضبط معي بس ماشالله تبارك الله طلع يهبل طبعا انا اخذته من ردود الاخوات مع اضافات ونقصان في المقادير ادري طولت هذره ^^^^بس ابربر من الفرحه
اليكم الطريقه
جيبي تمر خلاص مكنوز وشيلي العبس والراس حقه مقدار كاس جبت كاس وقمت اعبي فيه لين امتلى ^^^قولي يامصلك وشوله ندري وشلون مقارد الكاس بس لاتلوموني ماصدقت يضبط
وجيبي القدر وحطي التمر واضيف له 3 كاسات ماء مغلي جدا وحركيه اصلا على طول بيذوب التمر وتبقى طبعا قطع واضيفي له علبه جبن كرافت حجم وسط (انا زيكم استغرب شلون نضيف جبن مع تمر بس قلت نجرب :)(المهم جيبيها وقطعيها قطع كبيره تقريبا العلبه هذي قطعيها عشوائي 6 قطع وزحلقيها مع التمر والماء وحركيه وخليه ربع ساعه لان الي في القدر بتحطه في الخلاط بس خلوه يبرد شوي علشان الخلاط مايخرب من المويه ^^^متعقده من كثر مايخرب المهم في اثناء الربع ساعه جيبي كاس طحين بر واحمسيه مع اصبع زبده حجم وسط خليه يتشقر شوي مو تخلين لونه اسود واذا خلطتي التمر في الخلاط والجبن اضيفي الدقيق معه وخليه ينخلط زين وبعدين رجعيه القدر وعلى الناااار اذا فار وبدا يغلى اقصري عليه مررررررررره وحطي تحته هذيك ماادري وش يسمونها الي تحطونها تحت القدر اذا جيتوا تسوون جريش هع هع الله من زين الوصف اول ساعه حركيه كل نص ساعه بعدين خليه لايقل عن 3 ساعات انا خليته 3 ساعات ونص وقبل ماتصكين عليه بساعه اضيفي ملعقه كبيره حبه سوداء (الي مايحبها لايضيفها ) وبسسس جربوه
وهذي صوره متواضعه مازبرقناها ويزنها لانها للعائله الي قلتكم تكفي 9 كبر هذا الصحن
ادري طولت هذره بس اذا مافهمتوا شي اعيد تامرون امر
