امس كتبت موضوع وانحذف عن زوجي وسالفة جدته ام امه

السلام عليكم 
اتمنى لكم السعاده جميعا
رجاءا لاحد يتحمس ويلومني ويقسو علي
لانه لو عاش الضغط اللي عشته تكلم مثلي واقوا

بنات قبل امس نزلت موضوع عن قصة زواجي
ولقيت ردود وكنت طالعه برا البيت قلت اذا رجعت بقراها زين
وتفاجأت ان الموضوع محذوف من الاداره

ورب البيت ضقت لمين اقدر اشكي
اكيد الشكوى لغير الله ماتصلح 
لكن تمر لحظات ضعف تدورين احد تحكين له وتفضفضين
انا مرررررره مررررررره تعبت تفكير وهواجيس ودموع 
ولا احد من اللي حولي داري
وانا حامل وصحتي النفسيه رايحه فيها


قبل امس كتبت مشكلتي وهي نسب زوجي من جهة جدته ام امه
وكيف درت عنها حرمه من جماعتنا وصارت تتكلم عند ابوي

وابوي وصلي كلامها
وكيف ابوي ندمان ومتحسف على زواجي 
ويتمنى اني خذيت من جماعتنا 
وكيف اقتلوا فرحتي بزواجي
يعلم ربي لي 3 شهور ماوقف الدمع من عيني 
انا ما اكبر السالفه بس اللي مريت فيه ماتخيلت يوم في حياتي بمر بظرف مثل كذا
كنت اعرف ان المجتمع عنصري بس ماتخيلت اني بعاني من عنصريته 
ربي خلقني من قبيله معروفه فما توقعت بعاني من هالمشكله

زوجي طيب معي
واهله ماشفت منهم الا الخير
بس يظل هالكلام يلاحقني وين ماتوجهه
والله تغيرت معاملتي مع امه ماعاد صرت احتك فيها 
اقسم بالله غصب عني 
وانا حامل منه وبيجيني طفل فالطريق ان شاء الله

دايم افكر فالمستقبل
اقسم بالله ودي اهاجر 
واحيان كثيره اتمنى اموت 
اتمنى ينتهي عمري وارتاح 
والله ابوي سمعني كم كلمه وراح عاش حياته مايدري كلامه شلون سكاكين في صدري

مابي احد يشمت فيني ويعايرني بشي انا مالي يد فيه

تعبت وانا افكر بعيالي هل بينظر لهم بنظرة نقص 
والا لا

ودي ادخل في صدر امي واشوف من جوا اخاف تكون متحسفه اني تزوجت هذا الشخص مع انها اكثر وحده شجعتني بس هي كان على بالها ان محد بيدري 
ماتخيلت ان الدنيا صغيره والملاقيف واجد

تعبت وهلكت ولو الموت ينباع شريته
طول عمري احقق درجات عاليه فالدراسه واهلي فخورين فيني
ماتخيلت اذا تزوجت بيستحون من اشياء فيني وبيخبونها
اه اه ياقلبي

اتمنى ان الله ينسيني مرارة الاياام 
مادري هاللي امر فيه طبيعي لاني فترة حمل
والا مرحلة اكتئاب
ماخليت استشاريه ماكلمتها
ومره بالسوق حصلت وحده وجلست جنبها وماحسيت الا انا اشكي لها وابكي عندها 
امي واهلي مابي ابين لهم شي 
انهرت مره وحده عندهم وتندمت لازم ابين اني قويه