كيف حالكم ان شاء الله بخير
انا عضوة جديده وهذا اول موضوع لي
ما ادري اذا صح هذا المكان المناسب للموضوع والا لا؟
ياليت المشرفات ينقلوه للقسم المناسب
انا بنتي الحين عمرها سنه وخمس شهور
للاسف لما كانت صغيره كنت اخليها ع التلفزيون
وخصوصا طيور الجنه ، لاني ساكنه وحدي وماعندي احد يسليها وكنت اشوفها تفرح عليه ف خليتها
مو اهمال و لكن قلة وعي للاسف
والحمد لله ع كل حال
لما صار عمرها سنه لاحظت انها ما تلتفت اذا ناديناها
وما تتكلم بس تنطق حروف قليله
واذا بغت حاجة تجلس تبكي وما تحاول تقول اسمها او حتى تأشر عليها
كانت تخاف كثير وتبكي لما تشوف احد غريب
وترفرف بيدينها
و تركز كثير وهي تطالع في اشياء معينه
المهم لما لاحظت منعت عنها التلفزيون
والحمد لله خلال ثلاث شهور تحسنت كثير
صارت تلتفت لاسمها
وتتفاعل معانا كثير وتتواصل معنا بعيونها
وتنطق حروف بس مو مفهومه
وتمسك فرشاة الشعر وتمشط شعرها
ولما اطلب منها حاجة في يدها تعطيني
ولما اقول لها صفقي تصفق
وتحب انا نلعب معاها
تعرف اني امها وتعرف ابوها بس ما تنادينا
تاشر باصبعها بس ما تاشر على الاشياء اللي تبغاها
النطق لا زالت لا تنطق كلمات واضحه
فقط تقول مم مم يعني ماء
وتقول اح للاشياء الخطره
ارجووووكم ساعدوني من مرت في هذي التجربة من قبل الله يفرج همكم
و ايش رايكم هل هو توحد ، والا هو بسبب الاهمال ؟
و وين ممكن اروح في جدة
يعني دلوني ع دكتور اطفال كويس ممكن يساعدنا
اتمنى منكم المساعده او رفع الموضوع محتاجة ردودكم من بعد الله