امهات فرط الحركة وتشتت الانتباه ابيكم

السلام عليكم امهاتنا الغاليات كيف حالكم
عندي طفل الله يهديه ويشفيه تشخص فرط حركة وتشتت انتباه عمره 7 سنوات دخلته الروضة قبل كورونا قلت ممكن يتعدل يتغير لكن للاسف ماجلس الا كم يوم يضرب المعلمات ويتلفظ
وديته كذا عيادة ياخذ كم جلسة بعدين يقولون نعتذر مانقدر بنوقف الجلسات حالته محيرة اخر دكتورة قالت العيب منكم الولد مافيه شي
حرفيا ياحبيباتي تعبت مايبي يستحم ولايغير ملابسه هذا غير الصراخ والصياح وعنيييييييييييد بشكل مايوصف استفزازي درجة اولئ من يصحئ لين ينام وهو يحن ويطلب اشياء غير مقدور عليها مراوح غسالات ادوات كهربائية سيارات حقيقية بتقولون جيبي العاب ماخليت لعبة الاجبت يكسرها ولاتعجبه يبي شي حقيقي كهربائي كرهت الطلعات والاختلاط بالناس اذا شاف عندهم تحف او لمبات او اي شي تعالوا شوفوا الصياح والصرا خ الا يبي هالشي صرت ماروح لاحد الا اهلي وقبل اجي يخبون كل شي حتى غساله اهلي يحن الا بدخل فيها حرفيا بنات تعبت ماخليت اسلوب الاسويته جيته باللين واللطف والمسايرة يقولي انا مو دادا جيته بالحزم مانفع جيته بالعقاب يزود علي ماخلا شي بالبيت الاكسره مواعين تحف كنبات كل شي اخته اكبر منه لاشافها تلعب بالعابها يبدا يحوس عليها ويكسر اغراضها وتبدا حرب بينه وبينها ضرب وصراخ وهي تعانده فهمتها انتي الكبيرة العاقلة اخوك تعبان ابد مافي اي فايدة غير انه ملول حيل ودايم ضايق متململ مستحيل يقتنع ابد ولايخاف من احد ولاشي ارشدوني يابنات والله اني بهم مايعلم فيه الا ربي بتقولون جيبي عاملة ماديا ماقدر وحتئ لو جبت ماراح تتحمل لانه يضرب ويتلفظ كل شي سويته معه محتاجة وقفتكم مالي بعد الله غيركم اللي من القصيم تدلني علئ دكاترة شاطرين الله يهون عليكم ويفرج همكم لاتخلوني يابنات
ادري طولت اعذروني