امي الحنونه تغيرت 💔

امي احن انسانه بالدنيا كنت اسمع صاحباتي يتكلمون عن تصرفات امهاتهم وعدم اهتمامهم استغرب ع بالي كل الامهات مثل امي واقول الحمدالله ع النعمه والله يخليها لي وكنت امدح امي واقولهم امي غير ..


امي باقي حنونه مع الكل لكن معي تغيرت صرت احسها تفرق بيني وبين خواتي لو اتكلم حتى لو امزح ع وحده من خواتي تهاوش وتسكتني وكانها مركزه ع اي تصرف مني واحيانا تظلمني ماكون غلطانه واسكت ، تسبني وتسب زوجي قدام اهلي وتطلب مني اشياء مقدر اسويها بسبب ان ظروفه صعبه ، تجرحني بالكلام ماتحن لي لما ازورهم للبيت ماتهتم ولا تجلس معي عكس لما يجون باقي اخواني اتصل عليها ماترد واقول مشغوله لماتفضى ترجع تكلمني ولا تتصل .. واقولها ي الغاليه انا مابي اقطعك بس كل ماكلم تكوني برا او مشغوله اذا انتي فضيتي كلميني سولفي لي واسولف لك ولا تتصل طبعاً ..

حتى لما اجلس فتره ماكلم عادي ماتفرق معها وخواتي الباقي لما اكون عندها اشوف كيف تدق وتسال عنهم يحز بخاطري واحس بجرح واسكتتت ..

لو انها مع الكل كذا بقول طبعها عادي بس امي حنوووونه ماتعودت عليها كذا تنزل دمعتها ع الغريب ليش معي كذا !!

انا احبها كثيييير يشهد الله كل من في البيت يعرف اني اكثر وحدده احب امي ومتعلقه فيها ودايماً اتباهى فيها اقول محد عنده مثل امي

واسوي كاني مو منتبهه لتصرفاتها وبس اكون لحالي دموعي تنزل كل شيء يهووون بالكون الا الجفاء من والدينك ..

هل ممكن تصرفات امي معي عين او حسسد !! لان كنت اتكلم فيها عند صديقاتي وكانوا يحسدوني امك مافيه مثلها وشلون اعالج الموضوع وتكون علاقتي ب امي مثل باقي اخواني الله يسعدكم ..

💔💔