امي تعذبت في حياتها ولازالت تتعذب..

السلام عليكم ورحمة الله وبركاته
اكتب لكم كلماتي هذه وانا احبس دموع القهر والحرقه على امي الحبيبه واتمنى منكم ان تساعدوني ولو بالدعاء لها ان يفرج الله كربها ويسعد قلبها اللي ماارتاح ولا ذاق الراحه
بحكي لكم من البدايه من يوم تزوجت امي ابوي عذبها هو واهله باهاناتهم الدائمه لها واختلاق المشاكل لين ولدتني ولما صار عمري 8 شهور طلقها ابوي بسبب اهله وتركني معها لحد ماصار عمري سبع سنوات واخذني منها و كان يوديني لها في السنه اسبوع او 10 ايام لحد مادخلت المتوسط وهنا حرمني منها ومن زيارتها وكانو بس الناس يوصلون لي سلامها وانها مشتاقه لي وانا نفس الشي وفي ناس كانو يجون يتوسطون عند ابوي واهله انه يوديني لامي بس كان ابوي يرفض واللي قاهرني انه كان يقول ان امي تكشفني وماتغطيني و ماتحافظ علي و مهي امينه علي وهو خايف علي وعلى عرضه
والله والله يابنات انه ظلمها ووالله ان امي انسانه ملتزمه اكثر منه ومحافظه علي وحتى حجابي دايم يوم كنت اروح لها زياره تقول لي البسي عباية راس وماتتركني البس بناطيل او عريان عكس ابوي اللي كان مايهتم بحجابي انا واخواتي ولا بلباسنا وفوق هذا ماقدر يحافظ علي مثل ماكان يقول لان عمي اللي هو اخوه كان يتحرش فيني جنسيا حسبي الله ونعم الوكيل عليه وابوي مايدري فاتح له بيته يسرح ويمرح فيها ويظلم امي بكلامه
ومرت 7 سنوات والله رزقني بزوج طيب وولد حلال والحمدلله دايم يوديني لامي ويحترمها حتى يوم يصير بيني وبينه زعل واطلبه اني اروح لامي يقول لو كان مكانثاني ماوديتك بس امك مستحيل امنعك منها
والحمدلله اللي قرت عيني بشوفتها الله يحفظها لي
بس يوم اروح لها والله اني ارجع وقلبي متقطع عليها ومقهوره لان كل خالاتي تزوجو وكل خوالي تزوجو ومابقى غيرها مع جدي وجدتي هي اللي تخدمهم وتداريهم وهي اللي تسوي لهم كل شي وفوق هذا مايقدرونها ولايحترمونها ..جدي مايبيها تسافر ولاتتنفس ولا تطلع من البيت وكل ماكلمته انا وزوجي وقلنا نبيها تسافر معنا المدينه اللي حنا ساكنين فيها يقول لا ماعندنا احد يقوم فينا غيرها مع العلم ان واحد من خوالي متزوج وساكن عندهم في نفس البيت وزوجته موجوده ..وقبل فتره تقدم لامي رجال يبي يتزوجها بس مهو سعودي وانا فرحت وقلت ان شاء الله يتم هالزواج وتطلع امي من هالسجن وهي كانت موافقه وقام جدي بدون مايستشيرها وراح حط ع الرجال مهر 100 الف وكله عشان يشرد الرجال وبالفعل الرجال راح ولاعاد رجع ..مااقول الا حسبي الله ونعم الوكيل ..ودايم يابنات يحرجها بالكلام قدامنا وقدام خالاتي وخوالي وكل ماتكلمت يقولها انتي ماتفهمين ..اسكتي احسن انتي وش دراك والله اني انقهر احيانا واقول برد عليه بس هي تمنعني وتقول عادي تعودت على كلام جدك..وحتى جدتي ماتقصر فيها طول اليوم ليش ماسويتي وليش ماحطيتي ماتبغاها تترتاح والله العظيم انها تقوم من الفجر ومن شغله لشغله يادوب تجلس شوي ويجي الليل وهي مهدود حيلها حتى احيان اسولف معها وتنام وهي ماتحس الله لايحرمها الاجر ومره كلمت جدي وجدتي وقالت لهم انها ودها تقسم الشغل بينها وبين زوجة خالي اللي ساكن عندهم لكن خاصموها وقالولها استحي على وجهك عيب عليك تبغين بنت الناس تقوم فينا وانتي موجوده ..وسكتت وماعاد تكلمت
حتى خوالي وخالاتي الباقين لاجوهم في الاجازات طول الليل سهره وسواليف وامي تستحي تروح تنام وتخليهم فتجلس معهم للفجر اقولها ياامي روحي نامي ماعليك منهم انتي وراك قومه الفجر لان جدي وجدتي ينامون بدري ويصحون الفجر ولازم تصحى امي تسوي لهم قهوه وحليب وفطور وتقوللي لا استحي انام واخليهم وتجلس معهم لين الفجر ووهم كل وحده تروح تنام لين الظهر والا العصر وامي الله يرحم حالها تجلس مواصله عشان جدي وجدتي وشغل البيت حتى خواتها اللي هم خالاتي الوحده تجي كنها ضيفه ماتساعدها بشي ويشوفون نفسهم عليها عشانها مطلقه ودايم يدقونها بالكلام لدرجة ان مره وحده من خالاتي جلست تدق امي بالكلام وردت عليها امي وقامت خالتي مدت يدها عليها وصارت هوشه بينهم وجاء جدي وضرب امي ضربه قويه في ظهرها وخالتي بس سحبها وبعدها عنها وانا خلاص اختنقت حسيت اني ودي اضربه باي شي لين يموت وترتاح امي من ظلمه ..والله يابنات اني قلبي محترق على حالة امي ومدري وش اسوي عشان اطلعها من هذا البيت وهذا العذاب ..حتى المرض تمرض وتتعب ولااحد يرحمها يوديها المستشفى ..اسنانها لها سنين متسوسه وتوجعها ولا احد وداها المستشفى ماغير زوجي الله يجزاه خير وداها وصلحوها لها ب4الاف ريال يقول الدكتوره تقول لامي انتي كيف ساكته على اسنانك كلها معدومه واضح ان لها سنوات ..ولو جلستي اكثر من كذا كانت طاحت وامي قالت لها وش اسوي مااحد فاضي يوديني .. والله اني صرت ادعي ان ربي يرزقها الزوج الصالح اللي يريحها ويعوضها عن هالعذاب والاياخذ روح جدي ويفكها منه عشان اخذها تعيش عندي
وبس ارجوكم يابنات ادعو لامي ان الله يفرج كربتها ويرزقها السعاده والراحه والزوج الصالح اللي يعوضها
والله لايحلل ولايبيح اللي ترد رد جارح ..