السلام عليكم ورحمه الله وبركاته
امي حبيبتي ونور عيوني دنيتي وصديقتي الغاليه واقرب شخص لي في الدنيا
عساني ما افقدك عساك للجنه ياغاليه
امي الحمد لله بينا ولسى بصحتها وروحها الحلوه
بس حبيت ادعي لها في بدايه كلامي
راح اقولكم عن شي في حياتي الجميله السعيده
ودي تستفيدون منه وابغى الاجر بس ما ابغى احد يمدح والا يسب ويشهد ربي اني ابغى انصح وربي يعطيني على نيتي
طفولتنا كانت تعيسه نوعا ما لانها مليانه بالمشاكل العائليه
بعطيكم من البدايه عشان تفهمون
انا من قريه حريمها جبابره ظلمه يغلب عليهم المكر والدهاء الظلم عندهم والافتراء شي عادي جدا ومن مكونات الحياه
لكن في عماتي الوضع متردي ومستفحل
امي غريبه عنهم عشان كذا كرهوها على فطرتها ونيتها صافيه تعرف الحلال والحرام هي من نفس العائله ولكن تربت بعيد عنهم وما تشبعت من سمومهم
قبل 40 سنه تزوج ابويه حبيبي امي بعد ما فسخ خطبته من بنت خاله المحببه لعماتي
وبدا مشوار الكره والحقد والحسد
ابويه من صغره معتمد على نفسه من طفولته له كيانه الخاص وشخصيته ورجولته بدت عليه من صغره صار كلام بين الكبار ان فلانه لفلان اللي هي بنت خاله ولمن كبر رفضها وحب امي وتقدم لها وتزوجها صغير السن وهي كذلك
اشتعلت الغيره في صدورهم كيف واحد مثل هذا يا خذ وحده من مكان ثاني وكيف كسر كلمتهم (اقصد عماتي وخالاتهم وبعض نساء القريه اللي ماسكات الزعامه )
عمتي الكبيره من النوع الغيور جدا المحب للتملك متسلطه قويه حقوده الى ابعد حد ممكن
ما عجبها انه اخوها حبيبها يحب انسانه غيرها اللي هي امي
وبدت تاثر على والدي وتفتعل المشاكل بدون اسباب وكلها ظلم وللاسف كانت تقدر توقع امي وتقدر تثبت كلامها وان امي زعلتها وامي ما تدري عن شي ابدا ولا تعرف للمكر والكذب
كل هذا كان بمباركه بقيه الحريم المقربات واللي عاحبهم الوضع
وكانوا يكيدون لامي كثير وتسببوا في تعاستنا واحنا صغار وفي حرمان امي من حياه سعيده ومن راحه بال ابويه
الكره عندهم يشمل كامل السلاله كرهوا الام واطفالها واحفادها
كنا واحنا صغار منبوذين مكروهين محد يكلمنا ولا يقربنا من الصغار والكبار كنا نزعل ونبكي واذا شكينا لامي تقول ماعليكم منهم انتم صح وهم غلط
مرت السنين وكبرنا وكبرت المشاكل وزادت كم من المرات اشوف دموع امي وابكي جنبها ما اقدر اسوي شي غير اواسيها وفي طفولتي ابكي معاها وما ادري وش سبب دموعها
حسيت ان الدنيا مافيها امان توقعت ان الزواج لازم مشاكل ودموع ونكد كبرت وكبر خوفي من الدنيا والحياه والناس
عماتي الحين حققوا نص هدفهم وهو تخريب الحياه العائليه هدفهم الاكبر كان طلاق امي لكن ابويه يحبها رغم كل المشاكل وما يرضى فيها لكن كان زي الاعمى معتقد ان كلام اهله هو الصح
على قد العمر هذا حاولوا زرع الفتنه بينا انا وخواتي حاولوا التفرقه بكل الوسائل لكن كانت امي لهم بالمرصاد
في كل مره تشوف وتسمع محاولات التفرقه كانت تشد علينا اكثر وتحببنا في بعض اكثر وعلمتنا انه مافي شي يعوض عن الاخوان
عمرها ما حرضتنا عليهم ابدا كانت تلزمنا نحترمهم ونقدرهم مو حب فيهم لا بس كانت تربينا على الصح مع الكل تربينا على مبادئ وقيم ونرد الاساءه بالاحسان او نتغاضى عن رد الاساءه اذا كنا مجروحين
بكينا كثير زعلنا تشوهت سمعتنا انهانت كرامتنا قلت قيمتنا ومازالت امي تزرع فينا الحب والخير والاحترام والخوف من الله مراعاته تربينا على الاصول وعلى القيم ووالدي كان مثلها لكن كان بعيد عنا بسبب ضروف عمله
الان وبعد 40 سنه
وش النتيجه
اقسم بالله العظيم الكل يحسد امي علينا وعلى تربيتنا الكل يمدح فينا وفي اخلاقنا
انا تزوجت في منطقه الثانيه احسن زواج وهم اللي حاولوا يوقفون نصيبي
تزوجت ورفعت راس امي وابويه في السما سمعتي عند اهل زوجي وجماعته زي الذهب والكل يحبني ويحترمني امي زوجي تدعيلي ليل نهار وزوجي شخص محترم رجال بمعنى الكلمه والكل قاله اهله بيتهم افضل بيت في منطقتهم سمعتهم اطيب من الطيب نفسه في ايان خطوبتي كنت اشوف نظرات الحسد وحاولوا يخربون الزواج بس ربي نصرني
اختي تزوجت زواج افضل مني الحمد لله
واختي الثانيه مخطوبه لمهندس قد الدنيا وبيته بيت دين معروف
امي الحمد لله يارب بصحتها وعافيتها وحب ابويه لها قاعد يزيد وهم قاعده تزيد نارهم
ابويه حاولوا يدمرونه لكن اقسم بالله العظيم سمعته في كل مكان والكل يقول فلان رجال مافي مثله محبوب مقدر من الناس له كلمته وهيبته وحكمته عند اهل زوجي لانهم ما يعرفونه من اول كلهم يمدحونه اي شخص يعرفه يحترمه ووصلني كلام الرجال عنه
واحنا انا وخواتي زي اليد الوحده مافي خوات يحبون بعض زينا
ولا عمره سارت بينا اي مشكله لا صغيره ولا كبيره
اللي في يدي لاختي واللي عند اختي لي وعيالنا زي اخوان
ورجالنا اصحاب ويحبون امي وابويه ويخدمونهم برموش عيونهم
وهم
اش وضعهم
من سيئ لاسوا
من مشكله للثانيه
المشاكل اللي تمنوها لنا صارت في بيوتهم
امي كانت تدعي اذا زعلت منهم وتقول الله يكفيني شرهم ويردهم عني وبس
وربي استجاب دعاها وارضاها
امي كانت صديقه لنا مو ام مع انها كانت تضربنا وشديده علينا بس ما كنا نخبي عنها شي
كنت اقولها يمه شوفي عمتي تمدحني قدام اختي اكثر كانت ترد عليه وتقول ماعليكم منها انتم خلوكم مع بعض وبس
او اذا شافت وحده منا بتتاثر بكلامهم تهاوشها وتخاصمها
انا ما كتبت الكلام هذا اتشمت او افرح فيهم لا والله العظيم
بس حبيت اوريكم كيف التربيه على الحب على الخير وعلى الفطره
اللي تعلم عيالها على الحقد والكره والانتقام والله ترجع بينهم لانه خلاص تربوا عليها صارت من شخصياتهم
ولو ما كانت امي قريبه منا وصديقتنا ما كانت كنا نحكي لها شي ونسولف معاها بالساعات
اقربوا من بناتكم لا تنشغلون عنهم قربوا من افكارهم نفسياتهم احتياجاتهم ازماتهم
حبوهم وعلموهم الحب وربوهم عليه
كارهه الدنيا @karhh_aldnya
عضوة جديدة
يلزم عليك تسجيل الدخول أولًا لكتابة تعليق.
غيور الله يسلمك ويارب من بعد الحرمان ربي يرزقك
لا تياسين من رحمه الله
شوفي امي بعد اكثر من 30 سنه ربي نصرها وارضاها
لا تياسين من رحمه الله
شوفي امي بعد اكثر من 30 سنه ربي نصرها وارضاها
الله لايفرقكم عن بعض
ويكتب لكم الخير وينصركم على من ضلمكم
الغيره والحسد وحب تملك الاشخاص هي السبب
ويكتب لكم الخير وينصركم على من ضلمكم
الغيره والحسد وحب تملك الاشخاص هي السبب
الصفحة الأخيرة
الله يكفينا شرهم الحمد الله ان عزكم به والله يطول بعمرها
وسلمي عليه وخليها تدعي لي ١٤ سنه حرمان