امي دايم تدعي علي وماتحبني الحقوا علي

السلام عليكم ورحمه الله وبركاته

لاحظت بالفتره الاخيره كثير من المواضيع اللي تحمل نفس عنواني او قريب منه

ولاحظت تفاعل العضوات مع المواضيع والمشاكل

انا بصراحه نادرا مااتفاعل مع مواضيع زي كذا

لاني اشوف كثير حولي يتذمرون من امهاتهم ويشتكون منهم وانهم مايحبونهم ولا يبون الخير لهم والحقيقه عكس ذلك تماما

تلقين الام مقطعه نفسها علشان عيالها وهذا مو شي غريب لكن الغريب ان بنات هالوقت يفسرن الامور على كيفهم

مثلا اذا الام منعت بنتها من طلعه لصديقتها والام طبعا من خوفها على بنتها تمنعها تقوم البنت تفسر تصرف امها انها تكرهها ولاتحب لها الخير ولاتبيها تنبسط وتستانس

ومثال ثاني اتوقع كثير من الامهات يعانون منه هالوقت

اللبس وماادراكم ماللبس البنت تصيح وتولول تبي تلبس مثل فلانه وعلانه بنطلون ولا قصير والام ترفض خوفا عليها من عذاب الاخره والبنت تفسره ان امها ماتبي تكشخ وتبي تفشلها عند صديقاتها

الام تدعي لبنتها بالزواج والستر على اختلاف الدعوات والعبارات لكن هدف الام انها تشوف بنتها مبسوطه وسعيده ببيت زوجها والبنت تفسر ان امها ماتحبها وتبي الفكه منها

وممكن يتقدم للبنت واحد كفؤ والاهل مايبون يفرطون فيه لانهم يعرفون انه بيحافظ على بنتهم والبنت ترفض لاي سبب وتصرخ اهلي بيغصبوني على الزواج يبون الفكه مني

والمواقف تكثر والبنات يصيحون ويشتكون من اغلى البشر اللي مافيه مخلوق على وجه الارض بيحبها ويحن عليها كثرها

وفيه اشياء ومواقف وتصرفات من الامهات ممكن ماتعرفين سببها الا بعد ماتصيرين ام

اذكر موقف وحده من صديقاتي تقول يوم كنا صغار تقول يمكن بالابتدائي كنا داخلين غرفه حنا بنتين اظن ومعهم ولد او لودين مااذكر العدد بالضبط لكن تقول مسكرين علينا الغرفه ومسكرين الانوار ونلعب تقول جوا امهاتنا وشافوا الوضع كذا تقول طلعونا وضربونا وحنا ماندري وش السالفه تقول وهم يرددون الله يستر بس تقول حنا صغار ولافهمنا وش السالفه الا اننا مسوين شي غلط مع اننا نلعب لعب عادي لكن تسكيره الغرفه والانوار هي اللي خلت اهلنا يشكون فينا

تقول بعد ماكبرت وصرت افهم عرفت ليش ضربونا اهلنا وعرفت ليش خافوا

بعيد عن التعليق عن هالموقف انا ذكرته علشان ابين انه فيه اشياء ممكن ماتفهمينها ولا تستوعبينها الا بعدين اذا صرتي ام وجربتي معنى انك تكونين ام

صدقيني مافيه احد يحبك كثر امك ولااحد بيحس فيك كثرها واذا تبين تعرفين قدرها اسالي اللي فقدوا امهاتهم وهم يعلمونك قدر الام

طبعا ممكن يكون يعض القصص حقيقيه وتكون الام تكره عيالها <<<< على اني ماني مقتنعه لكن ممكن تكون الام مريضه نفسيا او فيه مشاكل مع الاب ادت الى كره الابناء وهذي حالات نادره


في النهايه نصيحه للبنات بروا بامهاتكم وطيعوا شورهم بما يرضي الله وبتلقون الفلاح بالدنيا قبل الاخره

وبتلاحظون الفرق بمعمالاتهم معكم وكيف راح تتحسن


مايحتاج اتكلم عن فضل بر الوالدين يكفي انه مقرون بعباده الله سبحانه


والله يعينا على برهم ويرزقنا رضاهم والجنه

الحكي كثير لكن اكتفي بما ذكرت اتمنى فكرتي وصلت وبانتظار اضافاتكم اللي بتنور موضوعي