امي عايزة تتجوز اعمل ايه .. انصحوني

انا هحكلكم حكاية امي وانصحوني بصدق اتصرف ازاي احنا كنا ثلاث اخوة بنتين وولد انا اكبر اخواتي امي وابويا كانو بيشتغلوا في السعودية من زمان من السبعينيات وكان ابويا علي حسب كلام ماما بياخد الفلوس وبيساعد اهلة علشان والدة كان متوفي وامي كانت بتساعد في البيت ومتحملة مسؤوليتنا احنا الثلاثة الكلام دة كان من اكثر من 25 سنة حصلت مشاكل مع والدتي في الشغل وقررت تنزل مصر معانا وعشنا في مصر سنة كنا لسه صغيرين كنت انا في 3 ابتدائي واختي ثانية ابتدائي واخويا يمكن 3 سنيين ، امي اتعرفت علي ابن عمتها علي اساس انه يديلنا دروس تقوية في الانجليزي ومن هنا بدأت المشكلة الاب مسافر والام لوحدها مع الولاد وابن العم بدا يتقرب منها المهم امي حبتة وكرهت والدي لاسباب كتيرة منها الحرص علي المال وانة بيدي اهلة فلوس وانة بعيد مش عارفة... المهم حصلت خلافات كتير وفي الاخر اتطلقت من ولدي واتجوزت ابن عمتها قعدت معاة سنة وجابت اختنا الرابعة ، وبعد كدا قالت انا مش مرتاحة انا عايزة اتطلق كان في الوقت دة والدي عامل قضايا علشان يضمنا ليه وبين المحاكم اتبهدلنا انا واخواتي الاثنين وامي رجعت اختي الرابعة لابوها وقالتله انها هترجع لوالدي المهم مرجعتش لابويا ومخدتش اختي الرابعة تركتها مع ابوها وجدتها الي ورتها العذاب الوان لانها بنت ست محافظتش علي بيتها ولا علي عيالها .

في كل المشاكل دة كبرنا وانا خلصت الثانوي ودخلت الجامعة وقررت اسافر اشتغل واصرف علي نفسي واساعد والدتي في الحياة واصرف علي اخواتي الي لسة بيتعلموا المهم قعت سنة ربنا كان لطيف بيا والحمد لله سترها معايا ومحصليش مشاكل في الشغل وكنت ببعت المصروف كل شهر كاني انا الراجل وبعد كدا بدات اكبر ويزداد الطمع فيا لاني لوحدي ووسط الرجال كنت زي الراجل بالظبت ورنا سترها عليا الحمد لله وانا لسة في البلد الي بعمل فيها حتي الان.

خلصوا اخواتي تعلمهم وجت اختي الي اصغر مني بسنة معايا واشتغلنا قالتلي امي لازم نشتري شقة تمليك علشان نسكن فيها بدل الايجار بعتلها فلوس انا واختي مقدم وكل شهر مبلغ معين قسط المهم خدت الفلوس واتعرفت علي راجل اقل منها في العمر واتجوزتة ومقالتلناش عنة حاجة وفوجئنا انها بتقول لاخويا انها اتجوزت من الشاب دة لما راح يزورها مرة ولقاه هناك عندها في البيت المهم انها كانت مستغليانا نصرف عليها وعلي جوزها واحنا منعرفش .

المهم زي العادة بعد سنتين اطلقت وقالت انه مش كويس وكان طمعان فيها وانه بتاع ستات وكلام من ده بعدها انا طلبت من اختي الصغيرة تستأذن من ابوها وتروح تعيش مع امي علشان متعش لوحدها خاصة ان اخويا بيشتغل في شرم الشيخ ، عاشت معاها اختي الصغيرة 7 سنوات لغاية لما خلصت جامعة وكنت ببعتلها مصروف لماما ومصاريف الجامعة كمان وصل سني ل 28 سنة ومتجوزتش في معمعة امي واخواتي المهم الحمد لله ربنا رزقني بزوج صالح اخرت صبري واتجوزت قولت لامي الوضع اتغير يا ماما انا اتجوزت وبكرة ***** الله اخلف ومش هقدر اساعد بكتير بس بمبلغ قليل ثارت وازاي ومستعجلة علي الخلفة لية والكلام دة وبعدين ارادت ربي اني اقعد 6 سنيين بعد الجواز مخلفش في الاثناء ديه بعت لاخويا انة يجي معايا انا واختة وبالفعل جه هنا واشتغل وبقالوا دخل محترم قولتله انا مسؤوليتي انتهت انت لازم تهتم بامي وتشوف طلباتها ،، طبعا لان اخويا مترباش مظبوط مش فارق معاة امه خالص شهر يبعتلها وشهرين لا وطريقة كلامة معاها مش كويسه علي طول يقلها انتي رمتينا في الشارع والي همك نفسك وبس واختي الصغيرة كانت علي طول واخدة جنب منها في الشقة وبتكلمها بحدود ومبتحكلهاش حاجة عن حياتها خالص وكدا المهم من كام يوم امي اتصلت وقالت انها هتتجوز تاني علي العلم ان عمرها تقريبا 58 سنة انا مش عارفة اتصرف ازاي انا عن نفسي متلخفنة علي الاخر وحاسه بإنها مش سوية ومبتفكرش فينا خالص واختي الاصغر مني بتقولي انها زي ما يكون وقع عليها عمارة واختي الصغيرة بتقولي انا معمريش حسيت بيها كأم وجودها زي عدم وجودها واخويا ثاير ومش طايق نفسه

دة مشكلتي بإختصار ارشدوني اعمل ايه معها

بالنسبة انا خلفت واخواتي البنات متجوزيين ومخلفيين واخويا بس هو الي متجوزش لسه انا اكبر اخواتي عندي 33 سنة واصغر اخواني عندها 26 سنة .