امي ليست ام ..

السلام عليكم ورحمة الله وبركاته


هنا راح اتكلم عن موضوع بس قبل اتكلم بالموضوع الموضوع مو كره بأمي او انتقام او غيبه وووووو الخ

لا ابدا ...هذا الموضوع من يوم كنت صغيره وانا شايله همه وعندي الف سؤال فيه ووووو الخ

وجت الفرصه اني اتكلم لأني حابه اعرف الحقيقه هل امي حاله خاصه وتختلف عن الأمهات او يوجد مثلها

انا من يوم كان عمري 7 سنوات وحتى قبل مايجي اخوي وامي تهملني احس فيها كره لي اكثر من محبه وعطف

وحنان الأم...طبعا احساس الأطفال لا يخطئ ..حتى تحطمني وانا صغيره وتقارني بقريباتي وتقولي شوفي بنات

عمك احسن منك ...في هالوقت يوم قالت هالكلام حسيت ان كل شخصيتي تحطمت من الى ..حتى انا ماكنت

شرانيه او اخرب والله هاديه ومطيعه ..لكني العب كثير عندي طاقه العب كل نهاري لحد ما انام ولكن بدون ما اخرب شي ومع ذالك انا مو كويسه في نظر امي ..

انا السابعه بين اخواني واخواتي ..

وكبرت واحس الكره بقلبها يزود ..وكبرت وصلت سن المراهقه وهي تحطمني مره فشلتني عند الضيوف وانا والله كنت اساعدها ..

وكانت تفضل اختي الصغيره علي ومازالت ...اذكر إذا قلت رايي تقولي لا انتي خطأ اختك صح حتى بدون ماتفهم الموضوع ..


المهم وبختصار ...ما احس انها امي ولا احس بحنانها ولا احس بأي شي إلا يومكم هذا ..مره انفجر الفرن بوجهي ماقالت لي اي شي تدرون وش قالت قالت " انتي الغلطانه " والله ماكنت غلطانه ولا دريت انه راح ينفجر بوجهي

زوجة عمي صرخت بوجه امي "حرام عليك تقولك انفجر به الفرن " وزوجة عمي تسمي علي وامي والله ما حركت ساكن ...

حتى إذا مرضت كنت انام كل اليوم بغرفتي ما تفكر ولا تقول اشوف بتي ..إلا إذا صارت تبي تنام تطق الباب علي بس حاجه في نفسها ..حتى تنام ..


حتى بزواجي مو همها انا سعيده او لا ..اكثر ما همها ان الناس مايقولون على بنتها مطلقه...حتى لو كان زوجي يضربني مو همها ... اهم شي مايتكلمون فيها الناس ...تهتم لسمعتها بين الناس اكثر من اهتمامها بي ..


حتى إذا قارنتها بخالاتي ومعاملتهن لبناتهن يختلف عن امي فيه حنان فيه خوف وامهات بنات عمي بعضهم يخافون عليهم من نسمة هواء.

مدري انتم عندكم امهات بهالشكل او فيهم شوية حنان واهتمام وخوف عليكم ؟