كوبونات الراقية تسجيل الدخول

إيمـــــان

امي نكديه وش أسوي معها ،، ادعوا لها بالهداية

الأسرة والمجتمع •

سلام عليكم ،، يا بنات والله إني ترددت كثير أكتب الموضوع او لا
بس الضيقة اللي بصدري متعبتني مرة والسبب أمي الله يهديها لما رحت بيت أهلي من كم ليلة والله ضاقت بي الدنيا وحسيت بالكآبه كله من هذرتها وحكيها عن البلاوي وعن حالها وحال خواتها ( اللي هم خالاتي )،، ودايما تقول إن حظهم أحسن منها وإن هي جتها بلاوي من وهي صغيرة ( يعني اللي يسمعها يقول هي ببيت وخواتها عايشين ببيت ثاني ما شافوا اللي شافته ) المهم عاد محور حديثها مصايب في مصايب ونكد و هم وتقعد تقول شوفي بنات خالتك فلانه ماخذين من وإنتو ا من ( تقصد انا وخواتي ) ،، ياربي القهر تقول لنا إنتوا ماخذتو ناس عدلين بالله عليكم في وحده ترضى على زوجها ينقال عنه هالحكي ،، يعني يوم ماهم غنيين وعدهم فلوس ولا لهم مكانه بالبلد زي هالكبارية على قولتهم صاروا خلاص موبعدلين إش هالكلام اللي يقهر أهم شي إنه من عايله طيبة وملتزم ويحبني ولله الحمد وعايشين مستقرين ،،، بس أمي خلاص من النوع الغيور و كله تتشكى من حالها ،،، تصدقوا من وإحنا صغار عيشتنا بنكد وسواليفها من وهي صغيرة لحد ماتزوجت أبوي كلها نعرفها و للحين وهي تعيد وتزيد فيها والله ساعات إذا تذكرت إشلون أمي تكلمنا عن أيام ما تزوجت ومشاكلها مع اهل أبوي أقول حراااااااااام حراااااااااام عليك يمه إحنا صغار عمرنا 10 و 12 سنه وهي أستغفر الله تعلمنا نحقد على فلانه وعلانه وزوجة عمي وعمتي و.......... وهذي قالت لي كذا وهذي سوت كذا ........ وحا قده على المجتمع كله وتصدقون والله ما بالغ أمي علمتنا نحقد على العايلة كلها ولازم اللي بينها وبين وحدة من قرايبنا مشاكل وعداوة لازم إحنا بعد نعادي بناتها ونعاديها ،،، صرنا كأنا إحنا اللي عشنا حياتها يوم هي صغيره من كثر ما تحكي عنها عيشتنا بخوف وصرنا كأننا عجايز وإحنا بعدنا بال18 كانت تضربنا وإحنا صغار على أتفه الأشياء تضربنا بأي شي قدامها ومرة ماكان عدها شي وانا وأختي متخبين برى في الحوش مسكتنا من شعورنا وضربتهم في الحيط وكانت تستفرد بنا لما يكون أبوي في العمل والله كلما تذكرت هالموقف تدمع عيني وأبكي على حالي وحال خواتي ،، ولما كبرنا كانت تفشلنا عند الناس وتكسح فينا تخيلوا أم تحكي عن بناتها كذا هبلان وغبيان ما يعرفون يسسون شي مايعرفون يرتبون حاجه وأكثر بس ما أبي أقوله،، هذا الحكي من كنا بعمر 8 سنين إلى يوم دخلنا الجامعه يالله هونت عن ذا الحكي لأنا صرنا كبار ونعرف ندافع عن نفسنا ،، بس ساعات أفكر ليش يمه تقولي غنا كذا وإحنا اللي كل وحده متكفلة بواحد من اخوتها و مسؤولة عنه لأن هي صارت تجيب ورا بعض وإحنا اللي قمنا بهم نسبحهم وناكلهم ونطلع بهم وكل شي وإحنا بنات صغار وفوق هذا نطلع بهايم ما نعرف نسوي شي !!!!! حياتنا كانت كلها تهزيئ في تهزيئ وضرب وإهانات .... ويوم كبرنا تبى الناس يخطبونا ويحفون علينا من وين يحسرة وإنتي مطيحتنا قدام العالم والناس
تصدقون ما باقي إلا كم نفر من العايلة نزورهم والباقي خلاص صار بينا وبينهم مقاطعه أعوذ بالله وأنا خايفة شسوي هذا بدل صلة لأرحام ياربي تعينا ..
طبعا أنا ما بالغت ولا في كلمة صدقوني وما خفي كان أعـــظم أنا وخواتي كرهنا حتى نطب بيت أهلي كله صراخ ونجرة وتشكي وياما نصحنا وحاولنا أنا وخواتي بكل الطرق وحاولوا أخوالي بعد لكن مافيه فايده أمي صعب تتغير وراسها يابس وطبعا هي متعقدة من أشياء كثيييييييييييرة ،، وصارت ما تسمع لحد حتى أبوي وجوده ملغي ولا له كلمة أصلا ،،، تصدقوا أحس إن الكل صار يكره يزورنا لو يتصل فينا حتى والله تعبت وألحين أمي تلومنا يوم تزوجنا وصرنا نكره الروحه لبيت أهلي آآآآآآآآآآآآه ياربي ،،،،
لما رجعت من بيت أهلي ذيك الليلة زوجي حس إني متضايقة بس ما حبيت أحكي له إش بيقول كفايه اللي يعرفه وبعد ما نام ظليت أبكي وقمت صليت وإستغفرت ربي وقريت قرآن بس هذني لليوم هذرتها مو راضيه تفارق تفكيري يمكن لأني ما حكيت لأخواتي عنها ماأبيهم يتضايقون مثلي لان وحده في نفاس والثانية الله يعينها على اللي فيها ،، مع العلم إن أنا وخواتي ما نحكي لها عن مصايبنا أو مشاكلنا الخاصة بس نفضفض لبعض أحيانا ،،،والبارحة زوجي لما حس بضيقتي طلعني السوق ومشاني بعد بس لما رجعت البيت رجعت لي الحالة الكئيبة فقلت أحكي لكم شوي يمكن تخف الضيقة اللي بصدري ،، وأسألكم الدعاء يا بنات يمكن وحده فيكم دعوتها مستجابة تدعي لي بظهر الغيب أرجوكم لا تنسوني من دعاكم
31
17K

يلزم عليك تسجيل الدخول أولًا لكتابة تعليق.

تسجيل دخول

يالبى قلبه*
يالبى قلبه* •
الله يهديهآ ويسخرهآ لكم ياربي


اهم شيء انتبهي تعصينهآ

ترى محد يعرف قيمة الوالدين الا الي فقدهم
r1ksa
r1ksa •
يا قلبي

في ناس للأسف كذا

انتوا طنشوا

المشكله هي ما راح تتغير وهذا واقع

بس ما في حل الا تحرجينها بالدين و العيب

و شوفي نقاط ضعفها

انا ماما فيها عيوب مهمه و من ضمنها التسفيه قدام الناس بأساليب غير والدتك

لكن انا مسكتها تهديد ووعيد و حتى انتقاد لاذع قدام خالاتي و ما اكذب عليك احرجها كثير اوقات لين تعدلت معاملتها

هل انا اكره امي؟؟ هل ابي اصغرها قدام الناس؟؟

لا طبعا ولكن ابيها تقدرني عشان اقدر اتصرف معاها بتقدير

انتي شوفي الاسلوب الدفاعي والتقويمي الانسب لامك

ترى احيانا يوصلون لعمر حنا نربيهم مو هم يربوننا

الله يغفر لنا ولهم ويصلحهم
مها الرس
مها الرس •
والله مايحس فيك الا الي يمر مثلك بنفس الشي انا امي اقولها اسراااااااااااااري تخيلوا اسررررررررررررررراري تعايريني فيها قدام الناس
وتسب ابوي قدامنا وتتمسكن قدام الناس ومشاكلنا كل الناس يعرفونها
وتحقر اهل ابوي وانا والله ابوي مو مقصر عليها بشي والله
والي يقهر انها ملتزمه وتقول انتم ماتعرفون الدين وطول اليوم دعاوي علينا
راجيةالجنه
راجيةالجنه •
مهم يصير هذي امك
سوي الواجب للوالده من الوصل والدعوه الحلوه في ظهر الغيب لمك
والزياره والوصل واجب عليك لو حاولت تتكلم بمواضيع ماتحبينها حاولي انك تغيرين الموضوع((وبلوالدين احسانا))محد راح يعوضك ولا يحن عليك بشدايد غير قلب الام

واسئل الله رب العرش العضيم ان الله يهديك ويهدي الوالده
ترى الحريم الكبار ما يبيلهم غير انك تسايسيهم
تقبلي مروري
ام الوليد
ام الوليد •
الله يعينك ويعينها لاتظنين انها مرتاحه نفسيا .
امك يبغالها وعظ من ناحية الدين خذيها لمحاضرات دينية لداعيات معروفات بالاسلوب المؤثر.
وانتي كل اللي عليك تحسنين التعامل معها وتحتسبين الاجر..
وابعديها عن دائرة التأثير عليك..
يعني حاولي ماتخلين لرسائلها السلبية اي تأثير عليك..
وادعي لهاااااا والله ان الدعاء علاج..
الله يهديها ويسخرها لكم..