امي وابوي دمّروا حياتنا

الأسرة والمجتمع

السلام عليكم


على بلاطة وبالمختصر انا انسانة تعبت وقرفت من حياتي
ماابي كلام مثالي ووو ابغى شي واقعي اسويه
لأن الحال وصل حده
انا عمري ٢٢ سنة اخر سنة جامعية
ماعمري انخطبت اوكي ركزوا ماعمري انخطبت ولا حسيت ببوادر خطوبة
سمرا جميلة شعري طويل جسمي حلو
وكاملة والكامل ربي
لكن للأسف ماجاء النصيب
واتمنى النصيب يجي اليوم قبل بكرا لأن الوضع في البيت لايحتمل
مو قادرة اصبر فعليا كل شي يجيب الكئابة
يابنات انا انسانة فيني طاقة ايجابية واحب الحياة
اقرأ كتب عندي مدونة
من الناس البشوشة اللي تفكيرها حلو
بس تعرفون لما تكون الظروف اقوى منكم
فيه شي جالس يصير مً طبيعي
بنات مو قادرة اتحمل وضع أمي
مو قادرة أتحمل البيت
امي عمرها ٤٧ سنة احبها اموت فيها وكل شي
لكن بقولكم حالها
امي ياجماعة الخير من يوم كنا صغار وبينها وبين ابوي مشاكل كبيرة وكثيرة
وكملت معاه وجابتنا وكبرتنا وكل شي
الوضع الأسري بالبيت مدمّر
بمعنى ابوي عايش بالملحق
امي بالبيت كأنها ارملة او مطلقة
وهو عايش
ادري الوضع مؤلم..
بس المشكلة مو بالوضع المشكلة بأمي
وهي السبب بكل شي يصير
امي ماتبي تتغير متألمة من الوضع ودايم تقارن نفسها بالناس
وسسسسسلبيييييييية جدا
تخيلوا يابنات كل كلامها عن الموت
والله العظيم قسم بالله ماقد شفتها تضحك
امي وصلت لمرحلة ماتجلس معانا بالصالة
تدرون اني اترجاها تطلع من غرفتها
بس جالسة تحفظ قران او ع الجوال
كل مااكلمها تقول ماابي شي من الدنيا بس بحفظ قران
امي ماعندها صديقات
ماعندها هوايات ماعندها حياة
والله العظيم حياة ماعندها
وهذا الشي دمّرنا احنا بناتها
الوضع بالبيت لايطاق
انا اكبر وحدة حاولت اغير اشياء كثير
بس مااقدر الوضع اكبر مني
ابوي احيانايطلع فوق احسه ندمان احسه بيعدل اشياء وبيحسنها
لكن ماتجلس معاه ماتعطيه وجه
قبل كم يوم طلّع فراشه بينام فوق وجاب اكل
هذا انجاز اقولها امي حاولي تجلسين معه بالصالة
هو جارحها ادري..لكن ابغاها تدارك عمرها وتحسن الأوضاع
قلتلها امي سوي نعناع واكسبي هاللحظة وخلي الأمور تتعدل
قالتلي ماابي اجلس معه
احسها انبسطت لما طلع بس مو قادرة تبادر
ولا هو يبي يبادر
بنات من عيد الحج مايتكلمون مافيه بينهم حوار
مستوعبين؟
تخيلوا كيف وضعنا احنا بالبيت
من اول ماتصحى امي من الصباح
وقبل مانروح الجامعات والمدارس
وهي تصارخ قسم بالله صراخ مو طبيعي
تحسون فيها شي
يعني ممكن تدخل غرفتي تشوف شي طايح بالأرض مثلا شي تافه وعادي
تقول حسبي الله عليك الله ياخذ الساعة اللي شفتك فيها
الله يلعنكم كلكم ليتني ماشفتكم ليتني ماربيت وجبتكم.ربيت ربيت وشقيت وهذي النهاية
تخيلوا
ممكن وحدة من اخواتي تنام العصر
تدعي عليها دعوات كذا
البيت كله هواش
عارفين يابنات انا حتى حوار مو قادرة ابني مع امي مو قادرة اتحاور معاها
كل كلامها صراخ وهواش
تستخف بكلامي اقولها تغيري كيف حياتك اطلعي سوي شوفي ..الخ
تقول روحي انتي عدلي حياتك
امي متحكمة بشكل مو طبيعي كل حياتها فرض اراء
ماعندنا شي اسمه حوار
تتحكم بأكلي تاكلين ذا ماتاكلين ذا
وكلمت السواق قالتله لما البنات يرسلونك تروح مطعم ياويلك تروح
تتحكم بنومي
تنامين بذا الوقت وتصحين بذا الوقت
طبعا انا كأي انسانة عادية يتخربط نومي ويتصلح احيانا اضطر اسهر احيانا انام بدري
امي تشوف هالشي عقوق فيها
ممكن ماتكلمني بالأيام عشان نومي انا عشان اكلي
عشاني حياتي عشان معيشتي
العيشة صعبة قسم بالله صعبة صعبة صعبة
وجالسة اضغط ع نفسي قد مااقدر
ابغى اتزوج انفك اعيش حياة ثانية
واحيانا اقول ليش اصير انانية
اتمنى اغيرها بس هي ماتبي تتغير
اقولها كلمي مستشار
الوضع مو مأزمها هي مأزمنا احنا
ابوي يابنات مو داري اني الحين بآخر سنة جامعية
مايدري انا ايش صارلي بحياتي مايدري عننا
ولا اقدر افتح حوار معه
بس العلاقة اللي بيني وبينه فلوس
هي مجروحة امي من الماضي ومشاكله
بس ماتبادر ماتسوي شي
تخيلوا انها تقول انا راح يتغير وضعي من الاذكار والتسبيح
١٠ سنوات تسبّح بدون اي مبادرة ولاتغير شي
متواكلة جدا وماتاخذ بالأسباب
أمي محطمة
حطمتني دمرتني افقدتني الثقة بنفسي
ماتشوف فينا شي واحد ايجابي
ولا تشوف حسنة وحدة فينا
علاقتنا معها مثل علاقة الحيوانات مجرد سؤال عن الأكل والنوم
لدرجة تمر ايام الحوار الوحيد
متى قمتي متى نمتي
جبتي من مطعم
ايش اكلتي؟
بس
ياكثر الكلام اللي بقلبي ياكثر الاشياء اللي مريت فيها ابي اقولها لأمي ماالقاها
اتمنى اقولها لأبوي ماالقاه
وادري انهم الإثنين مدمرين
حتى ابوي مريض بالسكر وتعبان وندم على سنواته اللي راحت وكنه يبي يحسن العلاقة
بس المشكلة احس اخواتي مايحبونه
اذا طلع فوق محد يجلس معاه
اذا قعد ع السفرة محد يكلمه
ماتعلمنا نسلم عليه نكلمه نسأل عنه لا
امي اذا قعدت معها بالصالة كل كلامها عن شكلي
ووزني ولوني وشعري وكله سب طبعا
وقبل كم يوم جاتني صدمة لما فتحت جوالها ولقيتها كاتبه بالبحث ادعية للمتأخرات بالزواج
احس جتني صدمة صدمة صدممممممة
كارهة كل شي
كل شي حرفيا
تدرون ايش النهاية؟
فقدت معنى العائلة السعيدةوالاسرة السعيدة
انا امي وابوي حطموني هم السبب بكل شي
والنهاية كل وحدة من اخواتي بغرفتها
نتجمع ثلاث ساعات باليوم بس
بدون امي
ومانتجمع كلنا ونتكلم بأشياء مختلفة
تجي امي ترمي علينا كم كلمة وتروح
امي هي اللي علمتني كيف مااحب نفسي
وهي حطمت ثقتي فيها
كاسرة خاطري مرة
مااتخيل انسان عايش بهالكمية من السوداوية
سوداويتها اثرت بالبيت اثرت فينا
كل شي جالسة تسويه انعكس علينا
وامي عنيدة جدا ماتتقبل من اي احد ولا تسمع كلام اي احد
اكلم مين؟ اشكي لمين؟ وانا اشوف الحياة تمشي وأسرتنا كذا
ودي اعيش حياة مستقرة سعيدة
انا داخليا فيني عاطفة مدري وين افرغها
لازم اتزوج احس الحل بحالتي الزواج
لكن مابليد حيلة
امي حتى السفر تكرهه.
حتى التغيير تكرهه
لدرجة وصلت لمرحلة تخيلوا تاكل الأكل عشان تغدي نفسها وتعيش
يعني فقدت معنى التلذذ بالأكل
مستحيل تجيب اكل عشان تستمع او عشانها مشتهية
لا ..تمشي نفسها بأي شي عشان مالها نفس بشي
حتى الصباح اذا قمت وسويت فطور بيض وجبن واشياء عادية
تهاوش ليش ماتاكلين تمر وعسل
كل هذي الأشياء ماتنفعك وماتفيدك
احيانا ناكل كوكيز او سوفليه مع القهوة
تقول ليش تاكلون اشياء ماتفيدكم
اقولها احيانا الواحد ياكل عشان يستمتع عشان من حقه على نفسه يكرمها بأشياء يحبها
مو لازم ناكل عشان نمشي نفسنا بالحياة..
والله وصلت للمرحلة هذي
قمة الكئابة.. اتمنى اتمنى احد يساعدني
انا البنت الكبيرة واحس اني متحطمة وكارهة كل شي
106
29K

يلزم عليك تسجيل الدخول أولًا لكتابة تعليق.

تسجيل دخول

ميموشاااا
ميموشاااا
اولاً اسأل الله ان يفرج همك و هم امك و ابوك
صدقيني امك مرت بشيء كبير كبير خلاها تعيش كذا
واضح انها فاقده كل شيء جميل بحياتها و كل سوداويتها و دعاويها عليكم و عنادها من شيء كبير حطمها

الحل انها تراجع طبيب نفسي احس بيريحها كثير لو تتعالج .. بس عنادها مشكله
فيه رقم ممكن تكلمينهم تستشيرينهم في حالتها بعطيك اياه خاص و تراه رقم عام حكومي مو لشخص

الله يعينك
ملك بنت خالد
ملك بنت خالد
اسمحي لي امك في اكتئاب.من ضغوط الحياه...لازم تراجع دكتور نفسي
وابوك ضروري هو الي يبادر معها ويحسسها بالحب والحنان الي حرمها منه
امك الحين تحس انها خلاص حياتها مالها داعي لانها فاقده اهم شي في حياتها فاقده الحب والاهتمام من ابوك...وانتي ماتقدرين تعطينها هاشي...
هاشي عند ابوك هي محتاجه ابوك....
khlood_1398
khlood_1398
حبيبتي صعب إني اقولك الوضع عادي وتحملي ووووو الخ لكن ف الواقع هذا هو الحل "التعايش، التأقلم التكييف" عودي نفسك على هذه الكلمات بكل يوم تصحين فيه عودي الي حولك "آقصد خواتك" لان امك وابوك وبالأخص آمك يبي لهاا وقت لتخرج من الي فيه ولاحظي امك مو حلها انها تتعايش لأن وضعها جداً صعب ووصولها لهالمرحله مو شي سهل آمك عانت وقابلت ظروف جداً صعبه خلتهاا تنحط بهالحاله وهالظرف بأختصار آمك ماتنلام ولازم تساعدونها تطلع شوي شوي من هالجو وبإذن الله راح تقدرين لإنك ذكيه تدرين ليش ! عرفتي الشي الي هي قادره تتقبله وهو الاستغفار والتسبيح انتي هنا آستغلي هالنقطه وخذيها من جانب إيجابي مثلاً وقت تعرض اذكار المساء او الصباح بالتلفزيون طلعي الصوت وخلي البيت كله هالصوت تدريجياً امك بيريحها هالصوت وبتطلع من غرفتها شوي شوي ، الشي الثاني لما بتحسو انها تحسنت شوي تجمعي إنتي وخواتك والي بيدها حنا والثانيه معاها زيت زيتون والثالثه قهوه وحلى وادخلو عندها وبالكلام الطيب والهادي واللين " يمه نبي ندلعك اليوم " اذا رفضت هالشي لاتوقفون عنه بلعكس سووه مره ثانيه وثالثه ورابعه ومن ثم وقفو عن هالشي يومين مثلاً خلوها تفقده و لمن ترجعون تسوون هالشي مره ثانيه راح تفرح من جواتها حتى لو مابينت وراح توافق بالنهايه ، لو تحققت هالخطوه واقتربتم منها بهالشكل وقتها خلاص مابيبقى عليكم شي غير تروحون لها تسولفون معها توفرون لها الي تحب تخلونها تتكلم وتفضفض على الي جواتهاا بدون ماتضغطون عليهاا وشوي شوي حاولو تطلعونهاا من الغرفه وان شاء الله راح تتحسن بكثير لأن اولاً الكلام الطيب يلين الصخر مابالك بقلب آم ، ثانياً الاهتمام الجميل بدون الضغط يحسن كثير من النفسيه ويعطي الثقه ، ثالثاً لو حققتو هالشي راح تكون نقطة تحول كبيييره راح تسعد كل الاطراف وتحقق الثقه بالنفس والتفاؤل والسعاده بإذن الله .. آتمنى أكون افدتك لو بشي بسيط وآتمنى تسوين الي قلت عنه ولاتيأسين واجتهدي وثابري وراح تلقين ثمار جهدك وصبرك وربي راح يحقق الي ببالك كفايه إنك جالسه تحاولين ترضين امك ورضا الام من رضا الله ،لاتنسين الصلاه والدعاء وخصوصاً صلاة الوتر آكبر سند لك بعد الله سبحانه ..

لو بغيتي شي ثاني اناا موجوده .

سبحانكك اللهم وبحمدك آشهد إن لا إله إلا أنت آستغفرك وآتوب إليكك
khlood_1398
khlood_1398
اسمحي لي امك في اكتئاب.من ضغوط الحياه...لازم تراجع دكتور نفسي وابوك ضروري هو الي يبادر معها ويحسسها بالحب والحنان الي حرمها منه امك الحين تحس انها خلاص حياتها مالها داعي لانها فاقده اهم شي في حياتها فاقده الحب والاهتمام من ابوك...وانتي ماتقدرين تعطينها هاشي... هاشي عند ابوك هي محتاجه ابوك....
اسمحي لي امك في اكتئاب.من ضغوط الحياه...لازم تراجع دكتور نفسي وابوك ضروري هو الي يبادر معها...
آسمحيلي اعلق على شي بسيط،
هي فعلاً محتاجه الأب لكن هالشي تقريباً معقد بسبب ان كل واحد فيهم منفصل عاطفياً عن الثاني بدون مبادره منهم وخصوصاً الأم الي محتاجه اولادها ووقفتهم معهاا اكثر من اي شي ثاني وهي لاتقربت من اولادها وتحسنت علاقتها فيهم الا مايجي يوم وتتحسن علاقتها مع زوجهاا وكلهاا مسألة وقت ، الخلاصه من ذا كله لو شعر الأنسان بإن هناك من يهتم به ويحبه سيغير كثيراً من نفسيته ، ومو شرط يكون الحب والاهتمام من الزوج فقط حتى الاولاد اهتمامهم وحبهم راح يعطي نتيجه آفضل بكثير من الزوج والدليل القصص الي حولك " مابتطلق من زوجي عشان عيالي" معناته حب الاولاد قادر يعيشها ويخليهاا تضحي لأجلهم .
حلم مفقود ..
حلم مفقود ..
آسمحيلي اعلق على شي بسيط، هي فعلاً محتاجه الأب لكن هالشي تقريباً معقد بسبب ان كل واحد فيهم منفصل عاطفياً عن الثاني بدون مبادره منهم وخصوصاً الأم الي محتاجه اولادها ووقفتهم معهاا اكثر من اي شي ثاني وهي لاتقربت من اولادها وتحسنت علاقتها فيهم الا مايجي يوم وتتحسن علاقتها مع زوجهاا وكلهاا مسألة وقت ، الخلاصه من ذا كله لو شعر الأنسان بإن هناك من يهتم به ويحبه سيغير كثيراً من نفسيته ، ومو شرط يكون الحب والاهتمام من الزوج فقط حتى الاولاد اهتمامهم وحبهم راح يعطي نتيجه آفضل بكثير من الزوج والدليل القصص الي حولك " مابتطلق من زوجي عشان عيالي" معناته حب الاولاد قادر يعيشها ويخليهاا تضحي لأجلهم .
آسمحيلي اعلق على شي بسيط، هي فعلاً محتاجه الأب لكن هالشي تقريباً معقد بسبب ان كل واحد فيهم منفصل...
طول عمري واحنا محسسين امي بحبنا لها كل صباح اسلم عليها واحاول اغيرلها جو بس ماشفت اي نتيجة امي بلحظة تنسف كل شي
وتشوف اننا مانقدّرها ونحترمها وانناشؤم بحياتها
البي بقوله لك امي تحتاج تغيير بس مو مني انا من شخص مختلف او لازم احد كبير يتدخل