امي واختي :(

مدري كيف ابتدي ولا انتهي

زي ما عرفتكم انتم مثل الخوات لي

واشوفكم توقفون مع كل وحدة تطلبكم ولا اظنكم بتخذلوني

حنا كنا عائلة كان يضرب فيها المثل عائلة مرتاحة سعيدة كلن يتمنى يعيش زي حياتنا

والحمد الله على كل حال حياتنا انقلبت فوق تحت

امي تعبانه ورجانا واملنا بربنا كبير كل مالها وتصير اسوء من الفتره اللي راحت انحرمت من الروحات والجيات وانحرمت من نص بيتها صارت ما تقدر ابدا تهوب للجهه الخلفية للبيت قد حلمت حلم فيذيك الجهه وعيا يفسره المفسر وكل ما ذكرت الحلم شوي وتنهار وتموت ولا تقرب من ذيك الجهه يجيها شي ماادري وشلون اوصفة

تخيلوا ياناس حرمة تنحرم من نص بيتها وموب بكيفها ولا هواها

انحرمت من الروحات والزواجات والاعياد والله اني شايلة هم ذا العيد .. العيد اللي فات راحت بتعيد على جدتي وجتها دوخة وتععععب ارتاعوا عليها وطلعوا من البيت

وتراها على هالحال من كم سنه كل ماراحت بيت فيه عزيمة والا عيد والا ناس على طول تدوخ وتتعب ولاعاد تدري عن نفسها نصير نمسكها لين تطلع وترجع للبيت اللي انحرمت من نصة صارت ماتطلع من غرفتها وان طلعت جت للصالة نص ساعه وتقول ما اترحت خلاص برجع هناك

تخيلوا لين شفت الحريم اللي بعائلتنا وهم بسنها ماشاء الله ويمكن اكبر منها يرقصون بزواجات عيالهم ويفرحون ويجون ويروحون تضيييييق بوجهي الدنيا

امي يوم زواج اخوي وش جاها زواج بكرها اللي تتمنى تشوفه عريس وانحرمت منه بغت تموت طلعناها من المكان وهي ما تدري عن عمرها والله العظيم اني ذيك الساعه اقول ياربي سلم ياربي سلم زاغت عقولنا من الصياح انحسنا بذيك الليلة الله يعوضها خير ياربي كل ام تتمنى تشوف ولدها معرس وترقص وتخدم على ضيوفها بذاك اليوم وامي انحرمت من هالشعور

امي تعبانه 24 ساعه وانا بموت لين شفتها توها صغيره ومنحرمة من الزيارات والاعياد والعروس حتى العزا ماتقدر تروح تعزي كل الروحات والجيات منحرمة منها محبوسة فالبيت

واختي توها صغيره و فيها الدسك والروماتيزم وركبها بعد مدري وش فيها ومسوين لها عملية وتكيس فمبايضها

وكل ما راحت للدكتور طلع فيها بلوى زيادة وكل فتره يجيها شي جديد هالحين باديت تشتكي من الكلى وعلى هالحال توها 25 سنة ومن يوم وهي 16 سنة مبتلية بالعين والسحر الحمد الله على كل شي

من يومها صغيره وحياتها صعبه تشوف اللي بسنها عايشين سنهم وحياتهم فلة وجمعات بنات وطلعات وجيات وهي من شيخ لشيخ ومن دكتور لدكتور ولا تذوق النوم لا بالليل ولا بالنهار من الالم

حياتنا بكل اختصار كئيبة لين شفتي اللي حولك يصيحون من الالم والا من الهم والا من القهر والا من تعسير الامور تضيق فيك الدنيا



تكفون ما ابي منك الا الدعاء موب لازم تردون على الموضوع بس ادعوا لهم بظهر الغيب طلبتكم

الله لا يذقكم الهم ولا الغم ولا المرض ادعوا لهم تراهم محتاجييييييين وربي محتاجين

(( عن أبي الدرداء رضي الله عنه أنه سمع رسول الله صلى الله عليه وسلم

يقول: "ما من عبد مسلم يدعو لأخيه بظهر الغيب إلا قال الملك: ولك

بمثل" أخرجه مسلم.

وفي رواية أن رسول الله صلى الله عليه وسلم كان يقول: "دعوة المسلم

لأخيه بظهر الغيب مستجابة، عند رأسه ملك مؤكل كلما دعالأخيه بخير

قال الملك الموكل به: آمين ولك بمثل".))


ولا تنسون فضل الدعاء للمسلمين بظهر الغيب انه من عمل الأنبياء والصالحين

و أقرب للاستجابة لتحقيق الإخلاص فيه لله والمحبة للمؤمنين ولتأمين الملك عليه