امي وامك --- يالله تلطف بحالهم

في سورة البقرة (وإذ أخذ الله ميثاق بني إسرائيل لا تعبدون إلّا الله وبالوالدين إحسانًا) .
في سورة النساء (واعبدوا الله ولا تشركوا به شيئًا وبالوالدين إحسانًا) .
في سورة الإسراء (وقضى ربّك الّا تعبدوا إلّا إيّاه وبالوالدين إحسانًا) .
-------------------------
(بسم الله الرحمن الرحيم )

بتكلم عامي فامعليش واعتذر لكم
اليوم مدري وش جوي حاطه على شات بدايه (مع انه يرفع لي الضغط ويجيب لي المر ) بس ادمان لازم اخذ جرعه احباط
المهم كان محور الجدال (الهواش ) الام وزوجة الولد
والله يهي حرب سجال بيناتهم يحسسوني ان ام الزوج شيطان واجرام لازم تبعد عنها حتى تعيش بسلام مع الزوج المحترم
اخر تقليعه للبنات الله يهديهم انو الولد ملزوم ببر امه بس وش بيسوي لها مراح يطبخلها ولا يبدلها فلو تروح الام عند بنتها احسن ( لا والله تترك بيت ولدها وتروح لبيت ولد الناس ؟؟؟؟ مايعرف يسوي لها شي يجيب لها خدامه خاااااصه لها ويجلسها ببيته معززه ومكرمه ) بس سؤال اذا امه لازم تروح لبيت بنتها اجل ام زوجة الولد وين بتروح له بتجي لبيت بنتها ؟؟؟؟ هع هع يطلع امه عشان يجيب ام زوجته ( هزووووولات )
ووحده تقول امه ماتسكن معه الزوجه لها سكن مستقل ...... طيب هذا حق لزوجه وانتجادل فيه بس
اذا امه بلحالها ببيتها شلون يهناله النوم وشلون يرتاح نفسيا وامه وحيده ببيتها هنا اقول مب لازم الزوجه توافق على وجود الام لان مب منطقي هالوضع مره كبيره بالسن تجلس لوحده اذا حتاجت شي من يقوم بها
يعني الام تحملت تعب الحمل والولاده والتربيه وحطو ببالكم على وقت امهاتنا ماكان فيه شغالات والعيال كثار يعني كانت حياة الغالبيه كرف وكد وتعب فيوم كبرت واحتاجت عيالها نقولها لا تجينهم ترا مب من حقك تعيشين بيت واحد منهم ؟؟؟؟؟ بالله هذا منطق
ودي افهم بس ذولي وش لون يفكرون ومن اي مجتمع ومن اي دين ؟؟؟
الايات واضحه الله عز وجل من سابع سما نزل ايات توجب بر الاهل وبعد عبادة الله عزوجل جا البر يعني يناس افهمو هذا امر مانجادل فيه البر واجب عالابن والبنت
انتي يالزوجه ماتبين تطبخين لمه بكيفك الله يغنيها عنك ...ماتبين تغسلين لها بعد بكيفك والله مب ناقص الام شي
بس لا تجين تقولين ماأبيها ببيتي ( ترا البيت بيت ولدها مب بيتك ) انتي الطالعه وهي الداخله
لكل زوجه اقول هذي امه امه امه
انتي لما تنصحين البنات وتقولين لا مب من حقها تسكن ببيت ولدها ترضين مرت اخوك تقول لأمك كذا وتقضبها الباب وتقولها توكلي على بيت بنتك ؟؟؟؟؟ قسم بالله لتمسحين بكرامتها الارض
فاليت الوحده تتقي الله بتعاملها مع اهل زوجها وخصوصا امه وتحط ببالها كما تدين تدان وتعتبر برها لام زوجها باب من ابواب الجنه ودفعت بلا عنها وعن زوجها وعيالها
ليتنا نغير النظره الشينه لاهل الزوج ونعتبرهم اهل لنا
وبالنهاية الله يخليلي امي ويرزقني برها ويرزق اخواني وزوجاتهم برها والله يخليلي ام زوجي ويرزقني انا وزوجي برها