امي وانا..

ايام زمان 😅

أمي.__6صباحآ_تقعد الصبح تسوي لنا فطور وتسوي صامولي بجبن فسحه وتلفه بالكيس..

امي.__8صباحآ_تلف الفطور بعد مانروح لدوام حنا وابوي وتغسل موعين الفطور ..

امي.__9ونص_تلبس عبايتها وتسير ع الجيران او تعزمهن..

امي.__11ونص_تدخل البيت تطلع دجاجه وتنصفه بالساطوره وهي ثلج حتي يدها تصير بارده.

امي.__12_تصلح الغداء وتبداء تستقبل عيالها الي بالابتدائي تفسخ ملابسهم وتشغل لهم التلفزيون او يلعبون بالحوش.

امي.__1ونص_تحط الغداء وعيالها بالمطبخ الصغار والكبار مع ابوي.

امي.__2_ادخل المواعين للمطبخ ويدخل ابوي ينام وامي تنسدح عند عيالها الي مايقيلون وتحط يده علي عيونه وتنام.

امي.__4العصر_تقوم تغسل المواعين والقهوه تطبخ وتقعد ابوي وخواتي واخواني الكبار.

امي.__4ونص وخمس_تحط القهوه والشاهي والتمر والكيكه بالفرن تفوح ريحة الفنيلياء بكل البيت.

امي.__5ونص_يطلع ابوي تروح ترش الحوش وتطلع القهوه وتعزم جاراتها.

امي.__7 _يروحون الجارات تقوم تطلع التلفزيون بالحوش ويجي ابوي وجدتي ام امي احيانآ.

امي.__8ونص_تدخل تسوي مرق وتفك معلبات وتقلطهم بالحوش .

امي.__10_تدخلنا ننام وتدخل تنظف المطبخ .

امي.__11_يدخل ابوي ينام تقعد تدخل الفرش والتلفزيون وتنظف البيت ..

امي.__12ونص_امي تدخل تنام

امي...و الضحكه ماتفارق وجهها ..السفر والسياحه ماتعرفها...الشغاله ماتعرفها...الشكوى و التحلطم ماتعرفها ..
قنوعه ..صبوره ..حليمه .. وسيعه بال ..رحوم


كبرت وماصرت زي امي
نفسي شينه ومتذمره ولحوحه اذا سويت فطور ماسويت غدا واذا سويت غداء قلت ترا مافيه عشاء عيالي ماتحمل لجتهم وانا صاحيه وشلون وانا مقيله ..

شتان بين امي و أنا 
{ربي ارحمهما كما ربياني صغيرا}